naḥamyah 4 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tabnnayt n‑ugadir

¹ lliġ isfld sanballaṭ is‑nzuyd ar‑nbnnu agadir, nkrn‑d gis iriyn iqlaql bahra, iṭnẓ ġ‑uwdayn

² yini ġ‑lgddam n‑mddn‑ns d‑iɛskriyn n‑ayt‑samira: «mayd skarn‑uwdayn‑ad ihruṣṣin? is‑ġaln is‑rad‑ssbiddn ih̬f‑nsn? is‑rad‑ġrṣn f‑ad‑kmmln ġ‑yan‑wass? is‑rad‑d‑rarn tudrt ula i‑iẓran lli‑ityawjdarn ġ‑igudiyn n‑usttif?»

³ yili ṭubiyah gu‑ɛammun ġ‑tama‑ns yini: «ġayd bnnun ntni, iġ‑srs‑iġli‑ubaġuġ, han ra‑d‑ih̬lu iẓran‑ns.»

⁴ sfld a‑rbbi‑nġ mamnk a‑yġ‑ḥgrn, trart taṭnaẓt‑ad f‑ih̬f‑nsn, tluḥt‑tn‑in ġ‑ufus n‑ma‑tn‑itakʷrn, awin‑tn s‑iskraf s‑mani yaggugn.

⁵ a‑ur‑tdlt lɛib‑nsn ula tsfiḍt ḍḍulm‑nsn zġ‑iẓri‑nk, ašku rgmn‑k ġ‑umnid n‑ibnnayn.

⁶ ġmkad a‑s‑nbna agadir kullut aylliġ‑t‑nsslkm mnaṣṣ ġ‑tiddi‑ns, ašku mddn zzgan ul‑nsn ad‑th̬damn.

⁷ imma sanballaṭ d‑ṭubiyah d‑waɛrabn d‑ayt‑ɛammun d‑ayt‑ašdud, lliġ sfldn is‑ittɛdl‑ugadir n‑urušalim, ittbnu gis maylli ih̬ʷlan, nkrn‑d gisn iriyn.

⁸ mšaškan‑d f‑urušalim a‑n‑fllas‑akʷin ssmrwin‑tt.

⁹ nẓẓall ġakudan i‑rbbi‑nġ, nskr aḍafn ġ‑iyḍ ula azal f‑ssibt‑nsn.

¹⁰ ula ayt‑yahuda ar‑ttinin: «d‑ġwid itasin isittitn, hati h̬wan ifaddn‑nsn, igatn fllanġ igudiyn‑ad n‑usttif. ur‑nẓḍar a‑nkmml agadir‑ad.»

¹¹ zaydn inuwwašn‑nġ ar‑ttinin: «ra‑nk ammas‑nsn nnġ‑tn, bla ssnn ula ẓran yat, nssbidd tawuri‑nsn.»

¹² ula udayn lli‑n‑izdġn ġ‑gr inuwwašn‑nġ ar‑di‑ttaškin inin‑aġ mnnawt‑twal: «rad‑fllawn‑akʷin zġ‑kraygatt tasga.»

¹³ ssbiddġ ilmma mddn s‑ugʷns n‑ugadir ġ‑innaġ sul izdr, asin uzzal d‑iḥrišn d‑lqwas.

¹⁴ mnadġ‑n kullu gisn, nkrġ ilmma sawlġ s‑ih̬fawn n‑tagʷmatin d‑ingabaln d‑wiyyaḍ kullutn iniġ: «a‑ur‑zġ‑gisn‑tiksaḍm. swangmat‑d siditun mnšk a‑imqqur ar‑issiwid, tmmaġm f‑aytmatun d‑tarwa‑nun d‑istitun d‑tmġarin‑nun d‑tgʷmma‑nun.»

¹⁵ sfldn inuwwašn‑nġ is‑nfaq i‑mad‑nuwwan, issann is‑asn‑irẓa rbbi ġaylli‑f‑d‑mšaškan. nwrri ġakudan s‑ugadir, izayd kud yan f‑twuri‑ns.

¹⁶ walaynni zġ‑ġassan mnaṣṣ n‑ih̬ddamn‑inu ar‑tsalan tabnnayt, mnaṣṣ yaḍni ar‑tasin iḥrišn d‑tmsntlin d‑lqwas d‑ibannkiwn. biddn iriyasn ar‑tgabaln kullu mddn‑an n‑ayt‑yahuda lliġ a‑bnnun agadir.

¹⁷ ula willi itasin isittitn ar‑tasin s‑yan‑ufus, asin tuzzalt ġ‑wayyaḍ.

¹⁸ ar‑bnnun ibnnayn, d‑kraygatt yan d‑tuzzalt‑ns ġ‑tsga‑ns. ibidd bu‑nnffar ġ‑tama‑inu.

¹⁹ iniġ i‑ih̬fawn d‑ingabaln d‑wiyyaḍ kullutn: «han tggut‑twuri, tlla ġ‑ugadir kullut, d‑nkkʷni nttbḍa naggug f‑ingratnġ.

²⁰ han innaġ‑n‑tsfldm i‑ijjij n‑nnfar, tmunm‑d s‑darnġ. hati rbbi‑nġ a‑ra‑fllanġ‑immaġ.»

²¹ nzayd ar‑ntlhu s‑twuri. mnaṣṣ gisn ar‑tasin iḥrišn, zġ‑lliġ ifaw‑wass aylliġ‑a‑di‑tbayyann itran.

²² uṣṣaġ‑tn ilmma a‑tqaman ula d‑iyḍ ġ‑urušalim, kraygatt yan d‑uh̬ddam‑ns, ad‑fllanġ‑tḍufn d‑iyḍ, ar‑tsalan tawuri ġ‑uzal.

²³ nkki d‑aytma d‑ih̬ddamn‑inu d‑waḍafn lli‑didi‑illan, ur‑jji‑nkkis maylli nlsa. iqama kud yan d‑tuzzalt‑ns ġ‑tsga‑ns.