naḥamyah 2 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

naḥamyah d‑ugllid n‑faras

¹ asggʷas wis sin id‑mraw (20) ġ‑tgldit n‑artaḥšašta, ġ‑wayyur n‑‹nisan›, lliġ‑d‑ttrsn‑waman n‑waḍil ġ‑lgddam n‑ugllid, asiġ zġ‑waman‑an ffiġ i‑ugllid. hati ur‑jjid nkki a‑mi‑ṭiyr ġ‑umnid n‑ugllid.

² isqsa‑yyi nttan: «lliġ ur‑thršt, mah̬ a‑ikrs‑uwdm‑nk? ġayan ur‑igi abla taguḍi n‑uwl.» iksaḍġ ġakudan bahra,

³ iniġ i‑ugllid: «ad‑bdda‑tdum tudrt‑nk ay‑agllid. mamnk a‑ur‑ra‑ikrs‑uwdm‑inu lliġ th̬ʷla‑tmdint lli‑ġ‑llan ismḍal n‑id‑baba, tthlkn ula iflwan‑ns s‑lɛafiyt?»

⁴ isqsa‑yyi‑ugllid: «ma‑trit?» ḍalbġ i‑rbbi n‑ignna,

⁵ iniġ i‑ugllid: «iġ‑ira‑ugllid, d‑iġ‑yufa‑uh̬ddam‑nk rrḍa ġ‑iẓri‑nk, ra‑yyi‑taznt s‑wakal n‑yahuda, s‑tmdint n‑ismḍal n‑id‑baba a‑stt‑daġ‑bnuġ.»

⁶ isawl‑d‑ugllid, d‑tgllidt tgawr ġ‑tama‑ns, yini‑yyi: «mnšk a‑ra‑n‑tkt ġ‑umuddu‑nk? managu ra‑di‑twrrit?» mlġ‑as managu a‑ra‑d‑wrriġ, s‑irḍa‑ugllid ġakudan a‑yyi‑yazn.

⁷ iniġ ilmma i‑ugllid: «iġ‑trit ay‑agllid, ad‑iyi‑tfkt tibratin a‑tnt‑awiġ i‑lḥukkam ġ‑tsga‑yan yaḍni n‑wasif, f‑a‑yyi‑adjn ad‑zriġ zġ‑tmazirt‑nsn ard lkmġ akal n‑yahuda.

⁸ tfkt‑iyi ula yat‑tbrat i‑ungabal asaf lli‑illan f‑taganin n‑ugllid, f‑ad‑iyi‑ifk akššuḍ ma‑s‑a‑skarġ isutar i‑imawn ġ‑ugadir lli‑ilulliyn i‑tgmmi tamẓlayt, ula i‑ugadir n‑tmdint, ula tigmmi lli‑ġ‑rad‑zdġġ nkki.» ifk‑iyi‑ugllid maylli‑as‑ḍalbġ, ašku illa‑flla‑ufus ifulkin n‑rbbi‑nu.

⁹ yazn‑didi‑ugllid iriyasn n‑lɛskr d‑imnayn. aškiġ‑d s‑dar lḥukkam n‑tsga yaḍni n‑wasif, fkġ‑asn tibratin zġ‑ugllid.

¹⁰ lliġ isfld sanballaṭ lli‑igan aġrib zġ‑ayt‑ḥurun, nttan d‑umɛawan ṭubiyah lli‑igan zġ‑ayt‑ɛammun, ṭiyr‑asn bahra, ašku ẓran is‑d‑yuška yan iqṣadn lh̬ir i‑ayt‑israyil.

naḥamyah ġ‑urušalim

¹¹ ġmkad a‑d‑iwnġ s‑urušalim, kġ gis kraḍ‑uwssan.

¹² nkrġ ilmma d‑iyḍ, nkki d‑kra idrusn ġ‑irgazn. ur‑mliġ i‑yan maylli iga rbbi‑nu ġ‑uwl‑inu a‑t‑skrġ f‑urušalim. ur‑dari kra n‑lbhimt abla talli ssudiġ.

¹³ ffuġġ d‑iyḍ zġ‑imi n‑talat, kġ dar talɛint n‑ulgʷmaḍ s‑imi n‑umazir, ar‑n‑taggʷaġ igudar n‑urušalim lli‑ih̬ʷlan d‑imawn‑ns lli‑itthlkn s‑lɛafiyt.

¹⁴ zriġ ilmma s‑dar imi n‑talɛint d‑tmda n‑ugllid, aylliġ ur‑sul‑illi mani‑zġ‑a‑tzray lbhimt lli‑ssudiġ.

¹⁵ awnġ ilmma d‑iyḍ i‑talat ar‑n‑taggʷaġ agadir. ġmkan ad‑d‑wrriġ, kšmġ‑d zġ‑imi n‑talat.

¹⁶ ur‑ssinn lḥukkam manis ddiġ ula mad‑skarġ. ur‑ta‑nniġ yat i‑uwdayn ula imsakmurn ula ih̬fawn ula lḥukkam ula wiyyaḍ lli‑ra‑iskr tawuri.

¹⁷ sawlġ srsn ilmma iniġ‑asn: «kunni tẓram taguḍi‑ad ġ‑nlla, mamnk a‑th̬ʷla urušalim, jdrn imawn‑ns s‑lɛafiyt. aškat‑aġ‑d ġilad a‑nbnnu agadir n‑urušalim, nssitti lɛar‑ad fllanġ illan.»

¹⁸ iniġ‑asn ilmma f‑mamnk a‑didi‑illa‑ufus n‑rbbi‑nu s‑ufulki, iniġ‑asn f‑iwaliwn lli‑s‑iyi‑inna‑ugllid. rarn‑iyi‑d ġakudan inin: «a‑nnkr nbnu.» zaydn ġakudan jjujadn ifassn‑nsn i‑twuri‑ad iṣlaḥn.

¹⁹ walaynni lliġ fllas isfld sanballaṭ gu‑ḥurun d‑umɛawan ṭubiyah gu‑ɛammun d‑gašam lli‑igan aɛrab, ar‑ginġ‑ṭṭnaẓn ḥgrn‑aġ ar‑ttinin: «ma‑iga ġayd tnawlm? is‑tram a‑tɛṣum agllid?»

²⁰ rarġ‑asn ġakudan: «rbbi n‑ignna a‑rad‑aġ‑itɛawan s‑lh̬ir. ra‑nnkr nkkʷnin ih̬ddamn‑ns ar‑nbnnu. imma kunni ur‑darun taġamt ula lḥqq ula kra igan winun ġ‑urušalim.»