naḥamyah 13 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tijli ula nndast ġ‑urušalim

¹ ar‑aqran f‑mddn ġassan ġ‑warra n‑musa, aylliġ lkmn agzzum lli‑ġ‑ityara f‑ayt‑ɛammun d‑ayt‑muwab, a‑ur‑sar‑ikšm yan gisn s‑tamunt n‑ayt‑rbbi.

² ašku ġakud lliġ muddan ayt‑israyil ġ‑lh̬la, ur‑asn‑d‑iwin aġrum ula aman, walaynni kʷran fllasn balɛam ad‑asn‑idɛu s‑nnɛlt, imma rbbi‑nġ irur nnɛlt s‑lbaraka.

³ ġir tsfld tamunt i‑ġaylli ityaran, nkrn mddn ġakudan ssufġn kullu iġribn zġ‑gr ayt‑israyil.

⁴ walaynni ur‑ta‑ijri mayan, han amsakmur alyašib lli‑illan f‑iḥuna n‑tgmmi n‑rbbi‑nġ, ifka yan‑uḥanu imqqurn i‑ṭubiyah [gu‑ɛammun], ašku alyašib iga kra i‑ṭubiyah.

⁵ aḥanu‑an kkan‑ttin ar‑gis‑tḥḍun imndi n‑isakmurn, ula lbh̬ur d‑irukutn, ula tis mrawt ġ‑imndi d‑waman n‑waḍil d‑zzit lli‑f‑yuṣṣa rbbi a‑tyawfkan i‑ayt‑lawi d‑inḍḍamn d‑waḍafn n‑imawn, ilint gis ula tiġamatin n‑imsakmurn.

⁶ tizi lli‑ġ‑as‑ifka aḥanu‑an, ur‑lliġ nkki ġ‑urušalim, ašku ddiġ s‑dar artaḥšašta agllid n‑babil ġ‑usggʷas wis kraḍ id‑mraw d‑sin (32) ġ‑tgldit‑ns, kkiġ‑n dars kra. amẓġ ilmma lidn ġ‑dar‑ugllid,

⁷ wrriġ‑d s‑urušalim. afġ‑d lh̬ʷšant lli‑iskr alyašib f‑ssibt n‑ṭubiyah, lliġ‑as‑ijjujad aḥanu‑an ġ‑usarag n‑tgmmi n‑rbbi.

⁸ ṭiyr‑iyi bahra, luḥġ‑d kullu ifškan n‑ṭubiyah zġ‑uḥanu s‑brra.

⁹ uṣṣaġ ġakudan ad‑ssġusn iḥuna. šškšmġ‑d daġ srsn irukutn n‑tgmmi n‑rbbi d‑imndi n‑isakmurn ula lbh̬ur.

¹⁰ afġ‑n ula tiġamatin n‑ayt‑lawi ur‑a‑ysn‑tyawfkant, fln ilmma tiwuriw‑nsn ntni d‑inḍḍamn, iwrri kud yan s‑igr‑ns.

¹¹ ẓiġ inmġurn ġakudan iniġ‑asn: «mah̬ aylliġ tbidd‑twuri n‑tgmmi n‑rbbi?» ssmunġ‑d ih̬ddamn rarġ‑tn‑d s‑dar‑twuriw‑nsn.

¹² awin‑d ilmma kullu ayt‑yahuda yat zġ‑kraygatt mrawt n‑imndi d‑waman n‑waḍil d‑zzit s‑iḥuna n‑lh̬zin.

¹³ gġ iḥuna n‑lh̬zin ġ‑ddu‑ufus n‑umsakmur šalamyah d‑uktatbi ṣaduq, ntni d‑badayah lli‑igan ġ‑ayt‑lawi. ar‑tn‑itɛawan ḥanan yus n‑zakkur lli‑igan yus n‑mattanyah. ašku iban gisn is‑gan id‑bab n‑lḥqq. uṣṣaġ‑tn ad‑aṭṭun tiġamatin f‑aytmatsn.

¹⁴ swangm‑iyi‑d a‑rbbi‑nu f‑mayan, d‑ad‑ur‑tsfiḍt lḥsab n‑ufulki lli‑skrġ ġ‑tgmmi n‑rbbi‑nu d‑twuriw‑ns.

¹⁵ ġ‑uwssan‑ad ẓriġ kra n‑mddn ġ‑wakal n‑yahuda ar‑taḍḍrn aḍil ġ‑lmɛṣṣrt ġ‑wass n‑usunfu. ar‑di‑tasin tafiw n‑imndi, ar‑tnt‑ssaqlayn f‑iġʷyal, ar‑di‑tasin ula aḍil d‑waman‑ns d‑ikuzarn d‑kraygatt kra igan asitti, ar‑tn‑d‑šškšamn s‑urušalim ġ‑wass n‑usunfu. ẓiġ‑tn iniġ‑asn a‑ur‑zznzan amššu ġ‑wass‑an.

¹⁶ ula ayt‑ṣur lli‑izdġn ġ‑urušalim ar‑di‑tawin islman d‑kraygatt kra igan ssliɛt, ar‑tn‑zznzan i‑ayt‑yahuda ġ‑wass n‑usunfu ula ġ‑wammas n‑urušalim.

¹⁷ ẓiġ ih̬fawn n‑tagʷmatin n‑ayt‑yahuda ġakudan iniġ‑asn: «matta lh̬ʷšant‑ad ttsalam ar‑tndasm ass n‑usunfu?

¹⁸ is‑urd ġmkad ad‑skrn id‑babatun ġayd izrin, aylliġ‑d‑izzugz rbbi‑nġ kullu tagat‑ad išqan fllanġ nkkʷni ula tamdint‑ad? han ar‑ttzayadm i‑lġaḍab‑ns f‑ayt‑israyil ġilad ġ‑a‑ttndasm ass n‑usunfu.»

¹⁹ ġ‑tdggʷat lli‑iqaman i‑wass n‑usunfu, ur‑ta‑d‑ḍrnt tillas ġ‑dar imawn n‑urušalim, amrġ mddn ad‑qqnn iflwan d‑a‑ur‑tn‑rẓmn ard izri‑wass n‑usunfu. gġ kra ġ‑ih̬ddamn‑inu f‑iflwan f‑a‑ur‑d‑ikšm kra n‑usitti ġ‑wass n‑usunfu.

²⁰ zġ‑ġassan ad‑nsan isbbabn d‑wiyyaḍ izznzan ssliɛt ġ‑brra n‑urušalim yat‑twal nġd snat.

²¹ ɛlmġ‑tn ilmma iniġ: «a‑ur‑sul‑ttnsam ġ‑brra n‑tmdint. wanna iɛawdn i‑ġmkan, ra‑t‑amẓġ.» zġ‑tizi‑an ur‑sul‑a‑di‑ttaškin ass n‑usunfu.

²² uṣṣaġ ayt‑lawi ad‑ssġusn ih̬fawn‑nsn munn‑d ilmma ad‑ḍufn imawn, f‑ad‑issann kullu mddn is‑ityawẓlay‑wass n‑usunfu i‑rbbi. swangm‑d mayan a‑rbbi‑nu trḍut flla, tḥnnut gigi s‑tugtt n‑tayri‑nk izgan.

²³ ġ‑uwssan‑an ẓriġ kra ġ‑uwdayn tahln ist‑ašdud d‑ist‑ɛammun d‑ist‑muwab.

²⁴ afġ‑n mnaṣṣ n‑tarwa‑nsn ar‑sawaln s‑wawal n‑ayt‑ašdud nġd iqbiln yaḍni. ur‑ssinn ad‑sawaln s‑wawal n‑ayt‑yahuda.

²⁵ ẓiġ‑tn nɛlġ‑tn, utġ kra gisn, bjrġ azzar‑nsn. ssgallġ‑tn s‑rbbi iniġ asn: «ad‑ur‑takkam istitun i‑tarwa‑nsn, ula da‑di‑ttawim istitsn i‑tarwa‑nun ula i‑ih̬fawn‑nun.

²⁶ is‑urd zund h̬tid a‑ijlan suliman agllid n‑israyil? han ur‑illi zund nttan ġ‑kullu igldan n‑iqbiln yaḍni, iɛzzu dar rbbi‑ns, ig‑t d‑ugllid f‑kullu ayt‑israyil. walaynni timġarin tiġribin a‑t‑ijlan ula nttan.

²⁷ is‑rad‑awn‑nsfld, nġḍr rbbi‑nġ s‑lh̬ʷšant‑ad imqqurn, baš a‑ntahl timġarin tiġribin zund kunni?»

²⁸ yili yan ġ‑gratnġ, ig zġ‑tarwa n‑yahuyadaɛ yus n‑alyašib lli‑igan anmġur n‑imsakmurn, itahl illis n‑sanballaṭ gu‑ḥurun. nkrġ ġakudan ssmsrġ‑t zġ‑dari.

²⁹ a‑ur‑tettut mddn‑an a‑rbbi‑nu, ašku ndsn tamunt n‑imsakmurn, rẓn lɛhd n‑imsakmurn d‑ayt‑lawi.

³⁰ ġmkan a‑s‑tn‑ssġusġ zġ‑kullu ma‑igan win iqbiln yaḍni, bḍuġ tiwuriw i‑imsakmurn d‑ayt‑lawi, kraygatt yan d‑ma‑ra‑iskar.

³¹ uṣṣaġ mddn ad‑di‑tawin ikššuḍn ġ‑tasaɛin n‑isakmurn ula tin‑twafkiw n‑lġllt tamzwarut. swangm‑iyi‑d a‑rbbi‑nu i‑ufulki.