naḥamyah 10 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tagallit n‑ayt‑yahuda

²⁸ mšaškan‑d mddn kullutn [d‑inmġurn‑nsn]. munn‑d imsakmurn d‑ayt‑lawi d‑waḍafn n‑imawn d‑inḍḍamn d‑ih̬ddamn n‑tgmmi tamẓlayt ula kullu willi iẓlin ih̬f‑nsn zġ‑iqbiln n‑ddunit ad‑skarn s‑ulmmud n‑rbbi, ntni d‑tmġarin‑nsn d‑tarwa‑nsn d‑istitsn, kullu willi iẓḍarn ad‑fhmn issann ma‑illan.

²⁹ biddn d‑aytmatsn inmġurn, ggalln ad‑bdda‑skarn s‑ulmmud n‑rbbi lli‑d‑ifka f‑ufus n‑uh̬ddam‑ns musa, ar‑tti‑tawin ġ‑kullu luṣiyat n‑rbbi siditnġ d‑lḥkamat‑ns d‑tnbaḍin‑ns ar‑bdda‑srsnt‑skarn. ḍalbn a‑tn‑ih̬zu rbbi iġ‑rẓan tagallit‑an.

³⁰ inin: «ur‑ra‑nakka istitnġ i‑iqbiln n‑ddunit, ula da‑d‑ntawi istitsn i‑tarwa‑nġ.

³¹ iġ‑a‑di‑tawin ayt‑iqbiln ġ‑wass n‑usunfu kra inzzan nġd kra n‑imndi, ur‑ra‑d‑darsn‑nsġ yat ġ‑wass n‑usunfu ula ġ‑uwssan lli‑ityawẓlayn i‑rbbi. kraygatt ssa n‑isggʷasn ra‑nfl igran‑nġ ad‑ssikkin, nsfiḍ lḥsab i‑kullu wanna‑mi‑n‑nḍfur kra.

³² nfrḍ ġilad f‑ih̬f‑nġ a‑yakka kud yan ginġ yat‑tqaridt n‑nnʷqrt kraygatt asggʷas f‑twuri n‑tgmmi n‑rbbi‑nġ.

³³ mayan a‑s‑ra‑nskar aġrum lli‑n‑ittrsn ġ‑umnid n‑rbbi, d‑isakmurn n‑imndi n‑kraygatt ass, ula tiġrṣiw jdrnin n‑kraygatt ass, d‑win‑uwssan n‑usunfu d‑ih̬fawn n‑iyrn d‑lɛyad yaḍni, ula tiwafkiw timẓlay d‑isakmurn ma‑itfukkun wanna ijlan ġ‑ayt‑israyil, ula kullu ma‑igan tawuri n‑tgmmi n‑rbbi‑nġ.»