naḥamyah 1 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

taẓallit n‑naḥamyah

¹ iwaliwn n‑naḥamyah yus n‑ḥakalyah. asggʷas wis sin id‑mraw (20) ġ‑wayyur n‑‹kislu›, lliġ nkki ġ‑tmdint n‑šušan lli‑igan tad ihiyyan [ġ‑tmazirt n‑faras].

² yašk‑id ḥanani lli‑igan yan ġ‑aytma, ntta d‑kra n‑irgazn yaḍni, zġ‑wakal n‑yahuda. sqsaġ‑tn ġ‑uwdayn lli‑n‑iqaman njmn zġ‑ukuf, sqsaġ‑tn ula ġ‑tmdint n‑urušalim.

³ inin‑iyi: «willi‑n‑iqaman njmn zġ‑ukuf, hatnin ġ‑tmmara d‑tdallit išqan. ih̬ʷla‑ugadir n‑urušalim, tyawjdarn imawn‑ns s‑lɛafiyt.»

⁴ lliġ sfldġ i‑ġaylli ttinin, gawrġ ar‑bahra‑allaġ. yan mnnaw‑uwssan ar‑nddrġ, ha‑yyi aẓumġ ar‑tẓallaġ ġ‑umnid n‑rbbi n‑ignna

⁵ ar‑ttiniġ: «wa rbbi da‑bdda‑illan, wa rbbi n‑ignna, wa rbbi imqqurn issiwidn lli‑bdda‑issuwfan lɛhd ula tayri idumn i‑willi dar tɛzzat awin‑tt bdda ġ‑luṣiyat‑nk,

⁶ adj imzgan‑nk ad‑ssḥssun, tadjt alln‑nk ad‑isfiwnt, tsfldt ġilad i‑tẓallit n‑uh̬ddam‑nk. ha‑yyi ġ‑iyḍ ula azal ar‑ki‑tḍalabġ f‑ayt‑israyil lli‑igan ih̬ddamn‑nk, ar‑tqrraġ s‑lh̬ʷšanat n‑ayt‑israyil lli‑gik‑nskr. ha nkki ula tagʷmat n‑baba nʷh̬šn dik.

⁷ nġḍr gik bahra, ur‑nskir s‑luṣiyat d‑tnbaḍin d‑lḥkamat lli‑s‑tumrt ah̬ddam‑nk musa.

⁸ wa siditnġ, swangm‑d awal lli‑s‑tumrt ah̬ddam‑nk musa lliġ‑as‑tnnit: ‹iġ‑iyi‑tġḍrm, ra‑kʷn‑ssuktġ ġ‑gr iqbiln,

⁹ walaynni iġ‑d‑dari‑twrrim tzgam ġ‑luṣiyat‑inu ar‑srsnt‑tskarm, han wah̬h̬a giwn illa ma‑n‑yakutn ġ‑tuggʷag n‑ddunit, ra‑tn‑d‑ssmunġ, awiġ‑tn‑d s‑udġar lli‑stiġ a‑fllas‑yili ism‑inu.›

¹⁰ hatni ġilad ih̬ddamn‑nk ad‑gan, gn mddn‑nk lli‑di‑tfukkit s‑lquwwa‑nk iggutn d‑ufus‑nk itjhhdn.

¹¹ wa siditnġ, adj imzgan‑nk ad‑sfldn s‑mayd itḍalab‑uh̬ddam‑nk ula mayd tḍalabn ih̬ddamn‑nk lli‑itfraḥn s‑luqr n‑ism‑nk. ḍalbġ‑k a‑tjjnjḥt ah̬ddam‑nk ġassad, a‑flla‑iḥnnu‑urgaz‑an.» ašku ġ‑uwssan‑an kkiġ‑ttin giġ walli itffin tissi i‑ugllid.