mih̬ah 6 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

imla‑yak a‑bnadm ma‑iṣlaḥn

¹ sfldayt i‑mayd inna rbbi siditun: «nkr ar‑ttaštkkat ġ‑lgddam n‑idrarn, tadjt iwrar ad‑sfldn i‑wawal‑nk.

² sfldayt a‑idrarn i‑uṣraḍ n‑rbbi da‑bdda‑illan, tsfldmt ula kunninti a‑tannalin dumnin ġ‑ddu‑wakal. ašku sidi rbbi illa dars kra f‑mddn‑ns, hati ra‑iṣrḍ i‑ayt‑israyil.

³ «wa mddn‑inu, mad‑awn‑skrġ? ma‑s‑kʷn‑ssrmiġ? rarayt‑iyi‑d awal.

⁴ nkkin a‑kʷn‑d‑issiwnn zġ‑tmazirt n‑miṣr, fukkuġ‑kʷn‑d zġ‑wakal n‑tsmugit. aznġ‑awn‑in musa d‑harun d‑maryam ad‑awn‑d‑zwurn.

⁵ ktyat‑d a‑mddn‑inu ma‑fllawn‑inuwwa balaq agllid n‑muwab, ula ma‑s‑as‑irur balɛam yus n‑baɛur. tktim‑d amuddu‑nun zġ‑šiṭṭim s‑gilgal, f‑a‑tissanm afulki n‑sidi rbbi.»

⁶ ma‑rad‑asiġ baš a‑n‑akmurġ s‑rbbi da‑bdda‑illan, knuġ ġ‑umnid n‑walli illan ġ‑tattuyt? izd ad‑as‑n‑ssakmurġ tiġrṣiw jdrnin, nġd igayzn kkanin asggʷas?

⁷ is‑ra‑irḍu rbbi da‑bdda‑illan s‑walfiwn n‑izamarn? is‑ra‑irḍu s‑wafḍan n‑isaffn n‑zzit? izd ad‑as‑n‑ssakmurġ ifh̬ddi‑nu a‑ifru ddnub‑inu? izd ad‑fkġ lġllt n‑ddat‑inu a‑irar atig f‑lh̬ʷšant n‑uwl‑inu?

⁸ hati imla‑yak a‑bnadm ma‑iṣlaḥn. ha ma‑zġ‑gik‑ira walli bdda illan. a‑tskart s‑lḥqq, tlhut s‑lḥnant, tftut s‑uwl ihnnan d‑rbbi‑nk.