mih̬ah 5 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

talalit n‑unjjam ġ‑bitlaḥm

¹ ssmun‑d ikabarn‑nm a‑tamdint n‑ikabarn, ašku glin‑aġ‑d ayt‑imiġ. aɛmud a‑s‑rad‑utn amadl n‑walli iḥkamn f‑israyil.

² [inna sidi rbbi:] «imma kmmi a‑bitlaḥm ġ‑afrata, wah̬h̬a tmẓẓit ġ‑gr tagʷmatin n‑ayt‑yahuda, rad‑d‑zġ‑gim‑ssufġġ ġwalli ra‑iḥkam f‑israyil. laṣl‑ns iga zġ‑zman, zġ‑uwssan zwurnin.

³ mayan a‑f‑ra‑ifl mddn‑ns ard taru h̬talli tlkm tizi n‑tlalit. ġakudan a‑rad‑d‑wrrin ġwilli‑n‑iqaman ġ‑aytmas s‑dar ayt‑israyil.

⁴ ra‑ibidd nttan iks tawrut‑ns s‑lquwwa n‑sidi rbbi ula s‑lmajd n‑ism n‑walli bdda illan ig rbbi‑ns. rad‑kullu‑zdġn mddn‑ns ġ‑laman ašku timuġra‑ns ra‑tlkm ttmi n‑ddunit,

⁵ d‑nttan a‑rad‑asn‑ig sslamt.» ġakud lliġ rad‑d‑kšmn ayt‑aššur s‑tmazirt‑nġ akʷln f‑lbruj‑nġ, ra‑d‑srsn‑nssnkr ssa n‑imksawn d‑tam iriyasn n‑bnadm.

⁶ rad‑rẓn tamazirt n‑aššur s‑uwzzal, ula tamazirt n‑‹nimrud› s‑jjhd. hati rad‑aġ‑jjnjmn zġ‑ayt‑aššur, ġakud nna‑d‑kšmn s‑tmazirt‑nġ akʷln f‑iwtta‑nġ.

lḥukm n‑rbbi f‑iqbiln tjhhdnin

⁷ han ġwilli iqaman ddrn ġ‑ayt‑yaɛqub, rad‑gn ġakudan zund tiġli n‑sidi rbbi ġ‑wammas n‑iqbiln ggutnin. gn zund anẓar lli‑iṭarn f‑tuga, ur‑a‑itql s‑bnadm ula da‑itmaṭal f‑tarwa n‑bnadm.

⁸ han ġwilli iqaman ddrn ġ‑ayt‑yaɛqub ġ‑gr ayt‑tmizar ula ġ‑wammas n‑iqbiln ggutnin, rad‑gn zund izm ġ‑gr luḥuš n‑tagant, ula zund yus n‑tizmt ġ‑gr‑tuwrutin n‑uwlli. ġakud nna‑izray, ar‑itaḍḍr ar‑issmuḍrus, d‑ur‑illi ma‑zġ‑gis‑ijjnjamn.

⁹ ra‑ityalal‑ufus‑nun f‑inuwwašn‑nun, tyawhlakn kullu ġwilli‑kʷn‑issrfufunn.

¹⁰ yini daġ sidi rbbi: «ġassan rad‑awn‑ssḍrġ iysan‑nun, rẓġ lkrarṣ‑nun,

¹¹ h̬luġ ula timdinin n‑tmazirt‑nun, luḥġ kullu lbruj‑nun,

¹² kksġ ula ssiḥr zġ‑ifassn‑nun, laḥ‑awn išuwwafn.

¹³ rad‑ssittiġ zġ‑gratun laṣnam ula ifariwn, d‑ur‑sul‑ra‑tknnum i‑mad‑skrn ifassn‑nun.

¹⁴ rad‑ssukfġ zġ‑gratun tiggjda n‑‹ašrah›, rarġ timdinin‑nun gnt uh̬ribn.

¹⁵ rad‑utġ lɛqubit s‑iriyn d‑lġaḍab f‑iqbiln lli‑yaggʷin ad‑sri‑sflidn.»