ismummʷin 3 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

sidi rbbi ur‑ra‑yġ‑ifl bdda

¹⁹ swangmġ‑d mamnk a‑tlulliyġ ar‑trfufunġ, tsmmum tudrt‑inu tḥrru.

²⁰ ass nna‑gis‑swingimġ, ar‑itġufu‑uwl‑inu.

²¹ ktiġ‑d ilmma awal‑ad, s‑ɛmmrġ s‑rrja.

²² lḥnant n‑sidi rbbi ur‑sar‑n‑tbbi, d‑rrḥmt‑ns tggut, ur‑dars ttmi.

²³ ṣbaḥ ar ṣbaḥ gnt‑d ljdid. tayri idumn a‑s‑a‑bdda‑tskart.

²⁴ yini‑uwl‑inu: «ur‑dari abla sidi rbbi, d‑mayan a‑f‑ra‑n‑gis‑trjuġ.»

²⁵ ifulki sidi rbbi i‑willi srs tqlnin, d‑wanna srs isiggiln zġ‑ttmi n‑uwl‑ns.

²⁶ yuf i‑yan a‑ifssa iṣbr ard‑t‑ijjnjm sidi rbbi.

²⁷ išwa i‑bnadm iġ‑yusi iḥlasn sul imẓẓi,

²⁸ a‑ifssa iskiws waḥdut, iġ‑tn‑in‑fllas‑isrs rbbi,

²⁹ issknu ih̬f‑ns ar akal, a‑ur‑imil injm,

³⁰ irar‑n amadl i‑walli‑t‑ikkatn, yasi tadallit‑ns.

³¹ ašku sidi rbbi ur‑ra‑yġ‑ifl bdda.

³² wah̬h̬a da‑yaġ‑issigat taguḍi, ra‑sul‑ginġ‑iḥnnu s‑unšk lli‑tlla tayri‑ns izgan.

³³ ur‑a‑t‑itɛjab a‑issrfufn tarwa n‑bnadm ula issṭiyr‑asn‑tt.

³⁴ iġ‑illa ma‑itaḍḍrn iḥbbasn ġ‑ddunit,

³⁵ iġ‑illa ma‑iluḥn lbaḍl f‑bnadm ġ‑iẓri n‑umattuy,

³⁶ iġ‑illa ma‑ikksn lḥqq i‑yan yulln aṣraḍ, is‑ur‑a‑itmnad sidi rbbi wan iskkirn‑an?

³⁷ ma‑iẓḍarn a‑yamr, izzga lamr‑ns, iġ‑ur‑t‑inni sidi rbbi?

³⁸ is‑urd dar‑umattuy a‑di‑ttkka lbaraka ula h̬ziyt?

³⁹ mah̬ a‑itqlaqal yan irfufnn f‑ddnub‑ns, iġ‑sul‑iṭṭaf tudrt?

nkrayt a‑nqllb iskkirn‑nġ

⁴⁰ nkrayt a‑nqllb iskkirn‑nġ nmiyyz‑tn, nwrri‑d s‑uġaras n‑sidi rbbi.

⁴¹ aškat‑d a‑nall ulawn‑nġ d‑ifassn‑nġ s‑rbbi n‑ignna.

⁴² ha‑yaġ nɛṣa‑k nʷh̬šn srk, d‑kiyi ur‑aġ‑tṣamḥt.

⁴³ lġaḍab a‑k‑in‑fllanġ‑issntln, tẓẓut ginġ thlkt‑aġ, ur‑aġ‑trḥimt.

⁴⁴ tssrgst ih̬f‑nk s‑umdlu a‑ur‑k‑in‑tlkm‑tẓallit.

⁴⁵ trart‑aġ ng amdduz n‑ddunit, ng irkan ġ‑dar kullu mddn.

⁴⁶ ar‑aġ‑kullu‑rggmn inuwwašn‑nġ.

⁴⁷ tawda d‑tksaḍ a‑yġ‑iġwin. ula tirẓi d‑tḍuri a‑yġ‑ihlkn.

⁴⁸ isaffn n‑imṭṭawn ayd iffin zġ‑walln‑inu, ašku tamdint n‑mddn‑inu, hatti tthlk.