isizwur 9 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

¹ ibark rbbi ġ‑nuḥ d‑tarwa‑ns yini‑asn: «a‑ttarum tigatm tɛmmrm ddunit kullutt.»

² rad‑zġ‑giwn‑iksaḍn kullu luḥuš n‑lh̬la d‑igḍaḍ n‑ignwan d‑ma‑itštutuln f‑wakal d‑islman n‑imdwan, ar‑giwn‑tġuwḍn. giġ‑tn kullu ġ‑ddu‑ufus‑nun.

³ ra‑tšttam zġ‑kullu ma‑iddrn ar‑itmussu. ġmklli‑awn‑yadlli‑fkiġ kullu tazgzut nna‑itmġayn a‑zġ‑gis‑tšttam, hati ġilad fkiġ‑awn kraygatt kra.

⁴ walaynni a‑ur‑tšttam tifiyi nna‑ġ‑sul‑llan idammn. ašku tudrt, idammn a‑ġ‑tlla.

⁵ wanna inġan bnadm ra‑ih̬llṣ atig‑ns, ig‑iyt luḥš nġd bnadm, ra‑immt f‑ssibt n‑idammn n‑walli inġa.

⁶ wanna iffin idammn n‑bnadm, f‑ufus n‑bnadm a‑f‑rad‑ffin idammn‑ns ula ntta, ašku rbbi iskr bnadm f‑ṣṣurt n‑rbbi.

⁷ imma kunni, zaydat ar‑ttarum tigatm, tɛmmrm ddunit kullutt.»

⁸ yini rbbi i‑nuḥ d‑tarwa‑ns:

⁹ «hati ġilad skrġ lɛhd ġ‑griyi didun ula amud‑nun tigira‑nun

¹⁰ ula kullu lmh̬luqat ddrnin lli‑didun‑llanin, d‑igḍaḍ ula lbhaym ula kullu luḥuš n‑lh̬la lli‑didun‑ffuġnin zġ‑wanaw. skrġ‑t d‑kullu luḥuš n‑ddunit.

¹¹ skrġ lɛhd ġ‑griyi didun a‑ur‑sar‑ssh̬siġ kullu ma‑igan tifiyi. ur‑sar‑rad‑ngin‑waman ad‑fnun ddunit kullutt.»

¹² yini rbbi: «ġmkad a‑ra‑tg‑tmatart n‑lɛhd lli‑skrġ ġ‑griyi didun d‑kullu lmh̬luqat lli‑didun‑ddrnin, ig lɛhd idumn zġ‑ġilad ula kullu mayd iftan.

¹³ ha taslit n‑unẓar giġ‑tt ġ‑umdlu n‑ignwan, ra‑tg tamatart n‑lɛhd n‑griyi d‑ddunit.

¹⁴ ġakud nna‑dlġ akal s‑imdla ra‑di‑tban‑tslit n‑unẓar,

¹⁵ swangimġ‑d lɛhd lli‑illan ġ‑griyi didun ula kullu ma‑iddrn ig tifiyi. ur‑sar‑rad‑ngin‑waman fnun kullu ma‑igan tifiyi.

¹⁶ ġakud nna‑di‑tban‑tslit n‑unẓar ġ‑imdla n‑ignwan, ra‑stti‑tmnadġ swangmġ‑d lɛhd lli‑idumn ġ‑griyi d‑kullu ma‑iddrn ig tifiyi ġ‑ddunit kullutt.»

¹⁷ yini rbbi i‑nuḥ: «ġmkad a‑tga‑tmatart n‑lɛhd lli‑skrġ ġ‑griyi d‑kullu ma‑igan tifiyi ġ‑ddunit.»

kraḍ tarwa n‑nuḥ

¹⁸ tarwa n‑nuḥ lli‑d‑dids‑ffuġnin zġ‑wanaw gan sam d‑ḥam d‑yafat. iga ḥam babas n‑kanɛan.

¹⁹ kraḍ‑ad a‑igan tarwa n‑nuḥ. ntni a‑zġ‑d‑kullu‑uškan mddn lli‑akutnin ġ‑ddunit kullutt.

²⁰ igr nuḥ ġ‑tfllaḥt iẓẓu aḍil.

²¹ isu zġ‑waman n‑waḍil iktin, imlilliy ign ġ‑uh̬iyyam‑ns, ityalal malssa‑ns.

²² yašk‑id ḥam lli‑igan babas n‑kanɛan, ar‑itmnad ġ‑babas ur‑ilsi yat, ar‑fllas‑isawal i‑sin aytmas ġ‑brra n‑uh̬iyyam.

²³ yasi‑d sam d‑yafat yan‑uḥayk f‑tġʷraḍ‑nsn, ar‑fttun tiġurdin dln igiwal n‑babatsn, ur‑n‑gllbn udmawn‑nsn ad‑ur‑ẓrn lḥalt lli‑ġ‑illa babatsn.

²⁴ ifaq‑d ilmma nuḥ zġ‑unufl, yissan mad‑as‑iskr yus lli‑imẓẓin,

²⁵ yini: «h̬ziyt a‑iga kanɛan. amqasa n‑imqasan a‑ra‑ig i‑aytmas.»

²⁶ yini‑daġ: «ambarki a‑iga rbbi sidis n‑sam. ra‑iwrri kanɛan ig amqasa n‑sam.

²⁷ a‑issigt rbbi i‑yafat, zdġn tarwa‑ns ġ‑ih̬iyyamn n‑sam, ig kanɛan amqasa ula i‑yafat.»

²⁸ tigira n‑unggay n‑waman f‑ddunit izzri nuḥ kraḍ id‑miyya d‑smmus id‑mraw (350) n‑usggʷas,

²⁹ aylliġ irgl ṭẓa n‑id‑miyya d‑smmus id‑mraw (950) n‑usggʷas, immt.