isizwur 8 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

izwa‑wakal ffuġn zġ‑wanaw

¹ rbbi iswangm ġ‑nuḥ ula luḥuš d‑lbhaym kullutn lli‑dids‑llanin ġ‑wanaw, yawi‑d aḍu ar‑iṣwaḍ f‑ddunit, wrrin ar‑tidrasn‑waman.

² iqqn isaffn n‑waman n‑ddu‑wakal, iqqn imawn n‑ignwan, ibbi‑unẓar.

³ ar‑tnaqaṣn‑waman kra s‑kra zġ‑iggi n‑wakal. lliġ kkan miyya d‑smmus n‑id‑mraw (150) n‑wass,

⁴ ġ‑wayyur wis ssa, ġ‑wass wis ssa d‑mraw (17), idrasn‑waman f‑wakal, ittrs‑wanaw f‑idrarn n‑araraṭ.

⁵ zaydn ar‑tidrasn‑waman ar ayyur wis mraw. ġ‑wass amzwaru n‑wayyur wis mraw, bann‑d ih̬fawn n‑idrarn.

⁶ zrin sul kkuẓ id‑mraw (40) n‑wass s‑irẓm nuḥ arryaḥ lli‑iskr ġ‑wanaw,

⁷ yazn yan‑uhaqqay s‑brra. iffuġ nttan izayd ar‑itlulliy aylliġ izwa‑wakal.

⁸ yazn ilmma nuḥ yan‑utbir a‑iẓr is‑wrrin‑waman zġ‑wakal.

⁹ walaynni ur‑yufi‑utbir maniġ a‑itrus, iwrri‑d s‑wanaw. ašku llan‑sul‑waman f‑iggi n‑ddunit kullutt. imdi‑as‑n nuḥ afus išškšm‑t‑id dars ġ‑wanaw.

¹⁰ iql daġ ssa n‑uwssan yaḍni, yazn atbir zġ‑wanaw.

¹¹ tadggʷat iwrri‑d dars yasi‑d yat‑tifrt izgzawn n‑zzit ġ‑imi‑ns. yissan nuḥ ġakudan is‑gguzn‑waman zġ‑iggi n‑wakal.

¹² iql ssa n‑uwssan yaḍni, yazn daġ atbir, ur‑sul‑d‑dars‑iwrri.

¹³ asggʷas wis sḍis id‑miyya d‑yan (601), ġ‑wass amzwaru n‑wayyur amzwaru, ur‑sul‑llin‑waman f‑iggi n‑wakal. yall nuḥ asddul n‑wanaw ar‑n‑itmnad, s‑iẓra is‑a‑izggu‑wakal.

¹⁴ ġ‑wayyur wis sin, ġ‑wass wis sin id‑mraw d‑ssa (27), izwu‑kullu‑wakal.

¹⁵ isawl rbbi ġakudan s‑nuḥ yini‑as:

¹⁶ «ffuġ zġ‑wanaw kiyi d‑tmġart‑nk d‑tarwa‑nk d‑tmġarin‑nsn.

¹⁷ tssufġt dik ula kullu ma‑dark‑iddrn ig tifiyi, igḍaḍ ula luḥuš ula lbhaym ula ma‑itštutuln f‑wakal, ad‑ddun ar‑tarun igatn ġ‑ddunit kullutt.»

¹⁸ iffuġ nuḥ ġakudan nttan d‑tmġart‑ns d‑tarwa‑ns d‑tmġarin‑nsn.

¹⁹ ffuġn ula luḥuš d‑ma‑itštutuln d‑igḍaḍ d‑kullu ma‑ittidun f‑wakal. iffuġ kullu kra illan, kra s‑kra.

lɛhd lli‑iskr rbbi d‑nuḥ

²⁰ ibnu nuḥ yan‑ukrkur ma‑f‑a‑n‑issakmur tiġrṣiw f‑ism n‑rbbi da‑bdda‑illan. yasi‑d kra zġ‑kullu ma‑igan lbhimt iḥllan ula agḍiḍ iḥllan, issattuy tiġrṣiw‑an ijdr‑tnt f‑ukrkur.

²¹ irḍu sidi rbbi s‑waḍu imimn, yini d‑ih̬f‑ns: «ur‑sar‑rad‑h̬zuġ ddunit f‑ssibt n‑bnadm. wah̬h̬a kullu ʷh̬šnn iswingimn n‑bnadm zġ‑mẓẓiy‑ns, ur‑sar‑rad‑hlkġ kullu ma‑iddrn ġmklli skrġ ġ‑uwssan‑ad.

²² maḥdd tqama ddunit, rad‑bdda‑yili‑uzmz n‑tiyrza d‑win‑tmgra, yili‑win‑usmmiḍ d‑win‑trġi, yili‑uzmz n‑ṣṣif d‑win‑tgrst, yili‑uzal d‑iyḍ.»