isizwur 7 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

anggay n‑waman dranin

¹ isawl daġ sidi rbbi s‑nuḥ yini‑as: «kšm ġilad s‑wanaw kiyi d‑tawjja‑nk kullukʷn, ašku tgit wad ifulkin ġ‑iẓri‑nu ġ‑gr mddn n‑tasut‑ad.

² šškšm dik ssa n‑iwtman d‑ssa n‑tiwtmin zġ‑kraygatt kra iḥllan i‑umššu, tšškšmt ula yan‑uwtm d‑yat‑tuwtmt zġ‑kraygatt kra ur‑iḥllan,

³ tšškšmt ula ssa n‑iwtman d‑ssa n‑tiwtmin zġ‑kraygatt kra igan agḍiḍ n‑ignwan, baš a‑injm‑wamud n‑kraygatt kra illan ġ‑ddunit.

⁴ ašku han wis ssa n‑uwssan ra‑n‑aznġ anẓar f‑wakal kkuẓ id‑mraw (40) n‑wass ġ‑uzal wala iḍ. rad‑ssittiġ kullu lmh̬luqat ddrnin zġ‑ddunit.»

⁵ iskr nuḥ kullu maylli‑f‑t‑yuṣṣa sidi rbbi.

⁶ nuḥ ikka sḍis id‑miyya (600) n‑usggʷas lliġ ngin‑waman f‑ddunit.

⁷ ikšm nuḥ s‑wanaw nttan d‑tmġart‑ns d‑tarwa‑ns d‑tmġarin‑nsn ad‑njmn zġ‑waman.

⁸ aškin‑d iwtman d‑tiwtmin zġ‑kraygatt kra iḥllan i‑umššu ula zġ‑ma‑ur‑iḥllan ula zġ‑igḍaḍ ula zġ‑ma‑itštutuln f‑wakal,

⁹ ar‑kššmn sin s‑sin s‑dar nuḥ ġ‑wanaw ġmklli‑t‑yuṣṣa rbbi.

¹⁰ zrin ssa n‑uwssan, ngin‑ilmma‑waman f‑ddunit.

¹¹ asggʷas wis sḍis id‑miyya (600) ġ‑tudrt n‑nuḥ, ġ‑wayyur wis sin, ġ‑wass wis ssa d‑mraw (17), ġassan a‑ġ‑d‑kullu‑bbaqin isaffn n‑waman ggutnin n‑ddu‑wakal, rẓmn ula imawn n‑ignwan.

¹² ibdu‑unẓar ar‑d‑itffi f‑ddunit kkuẓ id‑mraw (40) n‑wass ġ‑uzal wala iḍ.

¹³ ġassan a‑ikšm nuḥ d‑tarwa‑ns sam d‑ḥam d‑yafat s‑wanaw, ntni d‑tmġart n‑nuḥ d‑kraṭṭ‑tmġarin n‑tarwa‑ns.

¹⁴ ikšm didsn kraygatt kra igan luḥš, ula kraygatt kra igan lbhimt, ula kraygatt kra itštutuln f‑wakal ula kraygatt kra igan agḍiḍ ula kraygatt kra itaylaln.

¹⁵ yašk‑id‑uwtm d‑tuwtmt zġ‑kullu ma‑igan tifiyi teṭṭaf rruḥ n‑tudrt.

¹⁶ kšmn s‑wanaw sin s‑sin, awtm d‑tuwtmt, s‑dar nuḥ ġmklli‑t‑yuṣṣa rbbi. iqqn fllas sidi rbbi tiflut n‑wanaw.

¹⁷ izayd‑unggay f‑ddunit kkuẓ id‑mraw (40) n‑wass, igatn‑waman aylliġ usin anaw f‑iggi n‑wakal.

¹⁸ ġlin‑waman tjhhdn, ar‑itɛum‑wanaw f‑waman.

¹⁹ zaydn igatn‑waman bahra f‑wakal aylliġ‑d‑kkan aflla i‑kullu idrarn mqqurnin n‑ddunit.

²⁰ zaydn‑sul‑waman ġlin aylliġ dln idrarn s‑ssa n‑mitru.

²¹ immt kullu ma‑igan tifiyi ittidun f‑wakal, igḍaḍ ula lbhaym ula luḥuš ula ma‑itštutuln ula bnadm.

²² kullu ma‑issunfusn f‑wakal s‑rruḥ n‑tudrt, hati immut.

²³ ihlk kullu ma‑iddrn f‑wakal, mddn ula luḥuš ula ma‑itštutuln ula igḍaḍ n‑ignwan, ikks‑tn zġ‑ddunit. ur‑iqama abla nuḥ d‑willi dids illan ġ‑wanaw.

²⁴ ilin‑sul‑waman f‑ddunit miyya d‑smmus id‑mraw (150) n‑wass.