isizwur 6 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

twrri ddunit tʷh̬šn bahra

¹ lliġ a‑ttigatn mddn ġ‑ddunit, ar‑darsn‑tlalnt‑tfrh̬in.

² lmlayka n‑rbbi ar‑ẓrran is‑šwant istis n‑bnadm, ar‑tawin h̬tinna gisnti ttirin.

³ yini sidi rbbi ġakudan: «ur‑rad‑adjġ rruḥ‑inu ad‑bdda‑itẓi d‑bnadm, ašku tifiyi ka‑iga. ussan‑ns ġilad ur‑ra‑n‑ssurfn miyya d‑sin id‑mraw (120) n‑usggʷas.»

⁴ kkan‑ttin llan ‹nafilim› ġ‑ddunit ussan‑an ula tigira‑nsn, ġakud lliġ a‑tmunun lmlayka n‑rbbi d‑istis n‑bnadm, ar‑didsnt‑skarn tarwa. gn ntni iġzuyfa tjhhdnin, tyawssann bahra ġ‑uwssan‑an.

⁵ iẓr sidi rbbi is‑a‑bahra‑ttigat lh̬ʷšant n‑bnadm ġ‑ddunit. ġ‑iyḍ ula azal ur‑a‑swingimn mddn abla ġ‑ma‑yʷh̬šnn.

⁶ tʷgraẓ sidi rbbi f‑bnadm lli‑iskr ġ‑ddunit, ṭiyr‑as bahra.

⁷ yini sidi rbbi ġakudan: «han bnadm lli‑h̬lqġ, ra‑t‑ssittiġ zġ‑wakal. rad‑ssittiġ bnadm d‑luḥuš d‑igḍaḍ n‑ignwan d‑kullu ma‑itštutuln f‑iggi n‑wakal, ašku tʷgraẓ‑iyi ġ‑lliġ‑tn‑skrġ.»

⁸ imma nuḥ yufa rrḍa ġ‑iẓri n‑sidi rbbi.

nuḥ ibna anaw

⁹ ġmkad a‑iga‑warra n‑tasutin n‑nuḥ. iga nuḥ argaz ikmmln, iġus‑uwl‑ns ġ‑gr mddn n‑tasut‑an. nuḥ ar‑bdda‑itmunu d‑rbbi.

¹⁰ iṭṭaf kraḍ tarwa, gn ismawn‑nsn sam d‑ḥam d‑yafat.

¹¹ iẓra rbbi is‑tʷh̬šnn ddunit, tɛmmr s‑lbaḍl.

¹² twrri tigat lh̬ʷšant ġ‑ddunit ġ‑iẓri n‑rbbi. ašku bnadm kullut iwrri ar‑iskar ma‑yʷh̬šnn.

¹³ isawl rbbi s‑nuḥ yini‑as: «ha‑yyi rad‑gġ ttmi i‑kullu ma‑igan tifiyi, ašku tɛmmr ddunit s‑lbaḍl f‑ssibt‑nsn. han rad‑hlkġ kullu ma‑illan ġ‑ddunit.

¹⁴ zayd kiyi tbnut yan‑wanaw i‑ih̬f‑nk zġ‑ukššuḍ n‑gufr, tskrt gis iḥuna, tġʷmt‑as zzft zġ‑brra ula agʷns.

¹⁵ ġunškad a‑ra‑tssġlt anaw. a‑iġzzif s‑miyya d‑kraḍ id‑mraw d‑kraḍ (133) n‑mitru, yusɛu s‑sin id‑mraw d‑sin (22) n‑mitru, iɛlu s‑kraḍ d‑mraw (13) n‑mitru.

¹⁶ tskrt asddul i‑wanaw, a‑ig mnaṣṣ n‑mitru f‑uflla‑ns. tskrt imi ġ‑tsga n‑wanaw, tskrt kraṭṭ‑tduliw ġ‑ugʷns‑ns

¹⁷ ašku ra‑n‑aznġ anggay n‑waman f‑ddunit, hlkġ kullu ma‑igan tifiyi iṭṭaf rruḥ n‑tudrt. ra‑immt kullu ma‑illan ġ‑ddunit.

¹⁸ imma kiyi rad‑ak‑fkġ lɛhd. ra‑tkšmt s‑wanaw kiyi d‑tmġart‑nk d‑tarwa‑nk d‑tmġarin‑nsn,

¹⁹ tšškšmt dik sin zġ‑kullu ma‑iddrn ig tifiyi s‑wanaw, baš ad‑njmn ula ntni dik. ad‑gn awtm d‑tuwtmt

²⁰ zġ‑kraygatt kra igan agḍiḍ, ula kraygatt kra igan luḥš, ula kraygatt kra itštutuln f‑wakal. ra‑n‑dark‑aškin sin zġ‑kraygatt kra illan baš ad‑dark‑njmn.

²¹ ssmun kraygatt kra igan amššu, tasit‑t dik ġ‑wanaw a‑zġ‑gis‑tšttat kiyi ula ntni.»

²² inkr nuḥ iskr kullu maylli‑f‑t‑yuṣṣa rbbi.