isizwur 50 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

¹ iknu‑n yusf f‑uwdm n‑babas ar‑yalla issudn‑t.

² yamr yusf imqasan‑ns iṭbibn ad‑jjujadn babas i‑tmḍlt. ḥnnṭn ġakudan ddat n‑israyil.

³ ik mayan kkuẓ id‑mraw (40) n‑wass, ašku ġunškan a‑itkka lḥnṭ. ar‑fllas‑allan ayt‑miṣr ssa n‑id‑mraw (70) n‑wass.

⁴ lliġ zrin‑uwssan n‑lɛzzat, isawl yusf s‑ayt‑tgmmi n‑firɛawn yini‑asn: «iġ‑darun‑ufiġ rrḍa ġilad, tbdrm‑iyi ġ‑dar firɛawn, tsslkmm‑as iwaliwn‑ad:

⁵ ‹han issgulla‑yyi baba inna‑yyi: ġir imikk rad‑mmtġ. mḍl‑iyi‑n ġ‑umḍḍal lli‑skrġ i‑ih̬f‑inu ġ‑tmazirt n‑kanɛan. ġin a‑ġ‑ra‑yyi‑n‑tmḍlt.› ġir adj‑iyi ġilad ad‑dduġ a‑n‑mḍlġ baba. ra‑d‑wrriġ tigira.»

⁶ yini‑as firɛawn: «zayd tmḍlt‑n babak ġmklli‑k‑issgulla.»

⁷ imuddu yusf a‑n‑imḍl babas. munn kullu dids imqasan n‑firɛawn, d‑imɛawann n‑tgmmi‑ns, d‑imġarn n‑tmazirt n‑miṣr kullutn.

⁸ ddun dids ula ayt‑tgmmi n‑yusf kullutn d‑aytmas d‑ayt‑dars n‑babas. ur‑filn abla tarwa‑nsn d‑uwlli‑nsn d‑imugayn‑nsn ġ‑wakal n‑gušn.

⁹ munn dids id‑bab n‑lkrarṣ d‑id‑bab n‑iysan, gn yan‑ukabar bahra imqqurn.

¹⁰ lliġ‑n‑lkmn anrar n‑aṭad ġ‑tsga yaḍni n‑wasif n‑urdun, ibidd yusf ar‑yalla f‑babas ssa n‑uwssan, ar‑kullu‑tnuwwaḥn s‑imṭṭawn ggutnin.

¹¹ ayt‑kanɛan lli‑izdġn ġin, lliġ‑tn‑ẓran ar‑allan ar‑tnuwwaḥn ġ‑unrar n‑aṭad inin: «kra n‑lɛzzat išqan n‑ayt‑miṣr ayad.» mayan a‑f‑gan ism ‹abil‑miṣrayim› i‑udġar‑an illan ġ‑tsga‑yan yaḍni n‑wasif n‑urdun [tga lmɛna‑ns ‹lɛzzat n‑ayt‑miṣr›].

¹² ġmklli‑f‑yuṣṣa yaɛqub tarwa‑ns, ad‑as‑skrn.

¹³ asin‑t s‑tmazirt n‑kanɛan, mḍln‑t‑in ġ‑ifri lli‑illan ġ‑igr n‑makfila ġ‑tsga n‑mamra lli‑iwalan asġlay n‑tafukt, a‑t‑igan d‑igr lli‑isġa ibrahim ġ‑dar ɛifrun gu‑ḥit baš a‑t‑iṭṭaf a‑gis‑iskr amḍḍal.

¹⁴ imma yusf, lliġ‑n‑imḍl babas, iwrri s‑miṣr ntta d‑aytmas d‑kullu willi dids munnin a‑n‑mḍln babas.

rbbi inuwwa afulki

¹⁵ imma aytmas n‑yusf, lliġ ssnn is‑immut babatsn ar‑ttinin: «yusf, is‑ur‑ra‑yġ‑ikrhu ġilad, irar‑aġ f‑kullu ġaylli gis nskr yʷh̬šn?»

¹⁶ aznn awal i‑yusf inin: «han babak, ġakud lliġ ur‑ta‑immut, yuṣṣa‑yaġ:

¹⁷ ‹inyat i‑yusf: ḍalbġ‑k a‑tṣamḥt i‑aytmak f‑lɛib ula lɛar ula lh̬ʷšant lli‑gik‑skrn.› ha‑yaġ ġilad nḍalb‑ak a‑tṣamḥt f‑lɛib n‑ih̬ddamn n‑rbbi n‑babak.» ar‑yalla yusf lliġ‑as‑nnan mayan.

¹⁸ aškin‑d aytmas s‑dars ġakudan, knun ġ‑lgddam‑ns inin: «ha‑yaġ a‑sidi, imqasan‑nk a‑nga.»

¹⁹ yini‑asn yusf: «ad‑ur‑tiksaḍm. izd nkkin a‑igan rbbi?

²⁰ kunni tnuwwam gigi ma‑yʷh̬šnn, imma rbbi inuwwa srs afulki, baš a‑ijjnjm tudrt n‑mddn ggutnin ġmklli‑tn‑tẓram ddrn sul s‑ġassad.

²¹ ġilad ad‑ur‑tiksaḍm. ra‑kʷn‑asiġ kunni ula tarwa‑nun mẓẓinin.» isshnna‑tn yusf izzɛam‑tn.

lmut n‑yusf

²² iqama yusf izdġ ġ‑miṣr d‑ayt‑dars n‑babas. izri yusf miyya d‑mraw (110) n‑usggʷas,

²³ iẓr tarwa n‑afraym ard tis kraṭṭ tasutin, iẓr ula tarwa n‑makir lli‑igan yus n‑manaššah. lliġ‑d‑luln tarwa‑yan, yasi‑tn yusf f‑ifaddn‑ns.

²⁴ isawl yusf ilmma s‑aytmas yini‑asn: «han ġir imikk rad‑mmtġ. walaynni rbbi ra‑d‑srun‑yakmur a‑kʷn‑iɛawn. ra‑kʷn‑issawn zġ‑tmazirt‑ad, yawi‑kʷn s‑wakal lli‑f‑iggulla i‑ibrahim d‑isḥaq d‑yaɛqub.»

²⁵ issgall yusf tarwa n‑israyil yini‑asn: «s‑ṣṣaḥt ra‑d‑srun‑yakmur rbbi, tssawnm ġakudan ih̬ṣan‑inu zġ‑ġid.»

²⁶ ġmkan a‑s‑immut yusf, irgl miyya d‑mraw (110) n‑usggʷas. ḥnnṭn ddat‑ns, gn‑t ġ‑yan ṣṣnduq ġ‑miṣr.