isizwur 49 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ibark yaɛqub kullu tarwa‑ns

¹ iġr‑d ilmma yaɛqub i‑tarwa‑ns yini‑asn: «munat‑d ad‑awn‑mlġ ma‑ra‑ywn‑ijrru ġ‑uwssan‑ad‑d‑iftan.

² akmurat‑d ar‑tsflidm a‑tarwa n‑yaɛqub, trarm‑d amẓẓuġ s‑babatun israyil.

³ «rawbin, kiyi a‑igan ifh̬ddi n‑jjhd‑inu, tgt lġllt tamzwarut n‑trugza‑inu. tzwurt ġ‑tmuġra ula lquwwa.

⁴ walaynni tgit zund aman, ur‑a‑ttzgat. ur‑sar‑tgit anmġur, ašku tġlit s‑tisi‑nu tndst‑stt, tġlit s‑illiġ a‑iggan babak.

⁵ «šimɛun d‑lawi aytmatn ad‑gan, gn uzzal‑nsn d‑imqlad n‑ṭaẓit.

⁶ a‑ul‑inu, rwl zġ‑tamunt‑nsn, wala sar‑didsn‑tmšawart. ašku s‑lġaḍab a‑s‑nġan mddn, ula s‑taḍṣa a‑s‑rurn izgarn ad‑ssbiḍirn.

⁷ h̬zu lġaḍab‑nsn ašku išqa, th̬zut tanuwwašt‑nsn ašku tqjr. ra‑tn‑aṭṭuġ f‑ayt‑yaɛqub, ssuktġ‑tn ġ‑wakal n‑israyil.

⁸ «yahuda, ra‑k‑ttalġn aytmak, yili‑ufus‑nk f‑umggrḍ n‑inuwwašn‑nk, ar‑knnun tarwa n‑babak ġ‑umnid‑nk.

⁹ yahuda iga yus n‑izm. tumẓt a‑iwi tagʷmrt tasit‑stt. zund izm nġd tizmt a‑isskubbur ar‑imddi. ma‑izɛmn a‑t‑issduyy?

¹⁰ yahuda a‑ra‑yasi aɛmud n‑tgldit. d‑tarwa‑ns a‑ra‑bdda‑iḥkam, ard‑d‑yašk ġwalli mi tga‑tgldit, skrn ayt‑tmizar s‑wawal‑ns.

¹¹ ra‑yass asnus‑ns d‑uṣġar n‑waḍil, ikrf yus n‑tġyult d‑ddilit išwan, isird timlsa‑ns s‑waman n‑waḍil, issli ibrdan‑ns ġ‑idammn n‑ddilit.

¹² zggʷaġnt‑walln‑ns zund aman n‑waḍil, mlluln uh̬ṣan‑ns zund agʷfay.

¹³ «zabulun ra‑ittrs ġ‑tama n‑umda, ig antal i‑wanawn. awttu‑ns ra‑ig tamdint n‑ṣidun.

¹⁴ «yassakar iga aġyul iṣḥan, isskubbr ġ‑gr itlsan.

¹⁵ yaf maniġ a‑ithnna, iẓr tamazirt tfulki. walaynni ra‑n‑ig aġruḍ‑ns i‑uẓaẓu, ig ismg i‑tmmara.

¹⁶ «dan ra‑iḥkam f‑mddn‑ns, ig taqbilt ġ‑gr ayt‑israyil.

¹⁷ dan ra‑ig algʷmaḍ ġ‑tama n‑uġaras, ig ablinka ġ‑tama n‑tġarast, ilbi awurz i‑wayyis, iḍr‑n‑umnay tiġurdin.

¹⁸ ajnjm‑nk a‑ġ‑n‑rjiġ a‑sidi rbbi.

¹⁹ «gad, ra‑srs‑takʷin‑trubba n‑iqṭṭaɛn, imma ntta ra‑srsn‑iffuġ iẓẓu gisn.

²⁰ «ašir, ra‑tmim ṣṣabt‑ns, ra‑yakka timimin i‑igldan.

²¹ «naftali iga zund aznkʷḍ ar‑itazzal s‑inna ira, ar‑itaru izʷnkaḍ fulkinin.

²² «yusf iga zund aṣṭṭa yakkan lġllt, ig aṣṭṭa yakkan lġllt ġ‑tama n‑talɛint. knt‑d‑tṣṭṭwin‑ns f‑iggi n‑tabya.

²³ kurhan‑t id‑bu‑iẓḍkan, akʷin gis ssrfufnn‑t bahra.

²⁴ imma nttan, izga lqus‑ns, ifsasn ifassn‑ns, issdus‑t rbbi itjhhdn n‑yaɛqub, ig amksa n‑israyil, ig ajarif‑ns.

²⁵ ra‑k‑iɛawn rbbi n‑babak, ibark gik walli iẓḍarn i‑kulši s‑lbarakat n‑ignwan tasawnt ula tin‑tdrut n‑wakal tagsart, s‑lbarakat n‑tibbatin ula tin iḥlgan.

²⁶ ha lbarakat n‑babak mqqurnt f‑idrarn lli‑dumnin, utint iwrar lli‑bdda‑llanin, ilint kullu f‑ih̬f n‑yusf, ilint f‑ignzi n‑walli ityawẓlayn ġ‑gr aytmas.

²⁷ «bnyamin iga zund uššn, yaġ‑t‑laẓ ar‑igʷmmr. zikk ar‑iqqʷay ma‑ištta, tadggʷat ar‑yaṭṭu tagʷmrt.»

lmut n‑yaɛqub ula timḍlt‑ns

²⁸ ġwin a‑igan iqbiln n‑ayt‑israyil s‑sin d‑mraw (12), d‑ġmkan a‑s‑tn‑ibark babatsn, idɛu i‑kraygatt yan s‑lbaraka lli‑as‑igan.

²⁹ yuṣṣa‑tn ilmma yini‑asn: «ha‑yyi rad‑tyattayġ s‑dar ayt‑dari. mḍlat‑iyi‑n d‑id‑baba ġ‑ifri lli‑illan ġ‑igr n‑ɛifrun gu‑ḥit.

³⁰ illa ifri‑an ġ‑igr lli‑mi‑ttinin ‹makfila›, ġ‑tsga n‑mamra lli‑iwalan asġlay n‑tafukt, ġ‑tmazirt n‑kanɛan. isġa ibrahim igr‑an d‑ifri‑ns dar ɛifrun gu‑ḥit, baš a‑t‑iṭṭaf a‑gis‑iskr amḍḍal.

³¹ ġin a‑ġ‑ityawmḍal ibrahim d‑tmġart‑ns sarah. ġin a‑ġ‑ityawmḍal isḥaq d‑tmġart‑ns rifqa. ġin a‑ġ‑mḍlġ layah.

³² ittsġa igr‑an d‑ifri lli‑gis‑illan dar ayt‑ḥit.»

³³ lliġ ikmml yaɛqub iwaliwn lli‑s‑yuṣṣa tarwa‑ns, issmun‑d iḍarn‑ns s‑iggi n‑tisi. tffuġ‑t rruḥ‑ns, ityattay s‑gr mddn‑ns lli‑zrinin.