isizwur 48 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

yaɛqub ibark tarwa n‑yusf

¹ izri ma‑izrin s‑isfld yusf i‑wawal: «han babak ihrš.» inkr yawi dids sin tarwa‑ns manaššah d‑afraym.

² lliġ isfld yaɛqub izd yus yusf ayd dars yuškan, ig‑n tiqqi‑ns a‑iskiws f‑tisi‑ns.

³ isawl‑d yaɛqub lli‑igan israyil s‑yusf yini‑as: «rbbi da‑iẓḍarn i‑kulši, iban‑iyi‑d ġ‑tmdint n‑luz ġ‑tmazirt n‑kanɛan, ibark‑iyi

⁴ yini‑yyi: ‹ha‑yyi rad‑ak‑ssigtġ tasut‑nk, fkġ‑ak tarwa ggutnin, ard twrrit tgt aqbil n‑tqbilin ggutnin. rad‑fkġ akal‑ad i‑wamud‑nk tigira‑nk, a‑ti‑ṭṭafn kullu mayd iftan.›

⁵ imma ġilad sin tarwa‑nk lli‑dark‑iluln ġ‑tmazirt n‑miṣr, ġakud lliġ‑ur‑ta‑d‑dark‑uškiġ, ra‑tn‑gġ d‑winu. afraym d‑manaššah rad‑gn winu zund rawbin d‑šimɛun.

⁶ walaynni tarwa nna‑ra‑dark‑ilal tigira‑nsn rad‑gn wink, kšmn ntni ġ‑lwrt n‑sin aytmatsn imzwura.

⁷ ašku lliġ muddiġ zġ‑tmazirt n‑aram, taġ‑iyi‑tguḍi bahra, ašku tmmut‑iyi innak raḥil ġ‑uġaras ġ‑tmazirt n‑kanɛan, ur‑n‑bahra‑naggug zġ‑tmdint n‑afrat. mḍlġ‑tt‑in ġ‑tama n‑uġaras n‑afrat.» ar‑as‑ttinin ula ‹bitlaḥm›.

⁸ iẓr israyil tarwa n‑yusf isqsa‑t: «mad‑gan ġwid?»

⁹ yini yusf i‑babas: «tarwa‑nu ayad lli‑yyi‑ifka rbbi ġid.» yini‑as israyil: «ġir ssakmur‑iyi‑tn‑d a‑tn‑barkġ.»

¹⁰ israyil rmint‑walln‑ns ašku yuwssr bahra, idrus iẓri‑ns. lliġ‑as‑tn‑in‑issakmur yusf, issudn‑tn iḥbbl‑tn.

¹¹ yini israyil ġakudan i‑yusf: «ur‑tamġ ad‑ẓrġ udm‑nk. hati ġilad ifka‑yyi rbbi ad‑ẓrġ ula tarwa‑nk.»

¹² yusf issmatti‑d tarwa zġ‑dar ifaddn n‑babas, issknu‑n ih̬f ar akal ġ‑lgddam‑ns.

¹³ izayd yusf ġakudan issakmur‑tn‑in daġ s‑sin s‑dar babas, yamẓ afraym s‑ufasi‑ns issbidd‑t ġ‑uẓlmaḍ n‑israyil, yamẓ manaššah s‑uẓlmaḍ‑ns issbidd‑t ġ‑ufasi n‑israyil.

¹⁴ imma israyil issnh̬alaf ifassn‑ns, imdi‑n afus‑ns afasi isrs‑t f‑ih̬f n‑afraym lli‑mẓẓin. isrs aẓlmaḍ‑ns f‑ih̬f n‑manaššah lli‑igan ifh̬ddi.

¹⁵ ibark yusf ġakudan yini: «ḍalbġ rbbi lli‑d‑munn id‑baba ibrahim d‑isḥaq, ig rbbi lli‑yyi‑iksan kullu mad‑kkiġ sul s‑ġassad,

¹⁶ ig lmalak lli‑yyi‑ifukkan zġ‑kullu ma‑yʷh̬šnn. ḍalbġ‑as a‑ibark tarwa‑yad, baš a‑fllasn‑yili ism‑inu d‑ism n‑id‑baba ibrahim d‑isḥaq. ad‑asn‑bahra‑ttigatn tarwa ġ‑wakal.»

¹⁷ imma yusf ṭiyr‑as lliġ iẓra babas isrs‑n afus‑ns afasi f‑ih̬f n‑afraym. yamẓ‑d afus n‑babas a‑t‑issitti zġ‑ih̬f n‑afraym isrs‑t‑in f‑ih̬f n‑manaššah.

¹⁸ yini yusf i‑babas: «urd ġmkan a‑baba, ašku ġwad yaḍni a‑igan ifh̬ddi. srs‑n fllas afus‑nk afasi.»

¹⁹ walaynni babas yagʷi, irar‑as: «ssnġ a‑iwi, ssnġ. ula nttan ra‑iwrri ig taqbilt, ig wad imqqurn. walaynni gʷmas imẓẓin ra‑t‑yagʷr, iwrri‑wamud‑ns ig kigan d‑tqbilin.»

²⁰ ġmkan a‑s‑tn‑ibark israyil ġassan yini‑asn: «ismawn‑nun a‑s‑ra‑tdɛun ayt‑israyil s‑lbaraka ar‑ttinin: ‹a‑k‑ig rbbi d‑zund afraym ula zund manaššah.› » ġmkan a‑s‑iga afraym amzwaru f‑manaššah.

²¹ yini israyil ġakudan i‑yusf: «han ġir imikk rad‑mmtġ, walaynni rbbi rad‑didun‑yili irar‑kʷn s‑wakal n‑id‑babatun.

²² kiyi a‑mi‑rad‑zaydġ yat‑tġruṭṭ f‑tin aytmak, tga‑tt‑tġruṭṭ n‑udrar lli‑kkisġ i‑ayt‑amur s‑uwzzal d‑lqus.»