isizwur 47 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

gawrn ayt‑yaɛqub ġ‑miṣr

¹ iddu yusf s‑dar firɛawn yini‑as: «yuška‑d baba d‑aytma zġ‑tmazirt n‑kanɛan, awin‑d ulli‑nsn d‑imugayn‑nsn d‑kullu mad‑ṭṭafn. hatni ġilad ġ‑gušn.»

² yawi‑d ilmma smmus zġ‑aytmas išškšm‑tn s‑dar firɛawn.

³ isqsa‑tn firɛawn: «ma‑igan tawuri‑nun?» inin i‑firɛawn: «imqasan‑nk a‑sidi, imksawn n‑uwlli a‑nga nkkʷni ula imzwura‑nġ.»

⁴ zaydn inin‑as: «nuška‑d a‑ngawr a‑sidi ġ‑tmazirt‑ad, ašku illa‑uġʷni išqan ġ‑tmazirt n‑kanɛan, ur‑sul‑nufi maniġ a‑nkssa ulli. ġilad nḍalb zġ‑gik a‑tadjt imqasan‑nk a‑nzdġ ġ‑wakal n‑gušn.»

⁵ yini ilmma firɛawn i‑yusf: «yuška‑d dark babak d‑aytmak.

⁶ ha tamazirt n‑miṣr ġ‑lgddam‑nk, a‑izdġ babak d‑aytmak ġ‑wakal nna‑gis‑ifulkin. adj‑tn ad‑zdġn ġ‑wakal n‑gušn. d‑iġ‑tssnt kra n‑irgazn ḥaršnin ġ‑gratsn, tgt‑tn d‑imġarn f‑lksibt‑inu nkki.»

⁷ inkr yusf ġakudan yawi‑d babas yaɛqub, išškšm‑t s‑dar firɛawn. ibark yaɛqub ġakudan firɛawn.

⁸ isawl firɛawn s‑yaɛqub isqsa‑t: «mnšk ayd tkkit ġ‑tudrt‑nk?»

⁹ yini‑as yaɛqub: «ussan lli‑ġ‑a‑tlulliyġ ġ‑ddunit, miyya d‑kraḍ id‑mraw (130) n‑usggʷas ad‑gan. drusn šqun‑uwssan lli‑kkiġ ġ‑tudrt. ur‑lkimn unšk lli‑kkan imzwura‑nu ġ‑uwssan n‑ilulliyn‑nsn.»

¹⁰ ibark daġ yaɛqub firɛawn, iffġ ilmma zġ‑dars.

¹¹ iddu yusf issasstwa‑n babas d‑aytmas ġ‑miṣr, ifk‑asn ad‑ɛmmrn akal lli‑kullu‑ifulkin ġ‑tmazirt n‑miṣr ġ‑tsga n‑raɛmsis, ġmklli‑t‑yuṣṣa firɛawn.

¹² ar‑yakka yusf amššu i‑babas d‑aytmas d‑tawjja n‑babas kullutn, kraygatt yan d‑unšk nna‑gan tarwa‑ns.

illa‑uġni išqan ġ‑kraygatt mani

¹³ ġ‑uwssan‑an laḥ amššu ġ‑kraygatt mani. iwrri išqu‑uġʷni aylliġ bahra hršn ayt‑miṣr d‑ayt‑kanɛan s‑laẓ.

¹⁴ ar‑d‑issmunu yusf kullu iqaridn lli‑illan ġ‑tmazirt n‑miṣr d‑tmazirt n‑kanɛan, ašku ar‑d‑kullu‑saġn mddn imndi zġ‑dars. ar‑n‑itḥḍu iqaridn ġ‑tgmmi n‑firɛawn.

¹⁵ lliġ tmman iqaridn ġ‑miṣr ula ġ‑kanɛan, aškin‑d ayt‑miṣr s‑dar yusf ar‑ti‑tḍalabn inin‑as: «fk‑aġ ma‑nštta. is‑ra‑ginġ‑tmnadt ar‑ntmmtat ġ‑lgddam‑nk? ašku tmman‑aġ iqaridn.»

¹⁶ yini‑asn yusf: «iġ‑awn‑laḥ iqaridn, awyat‑d lksibt‑nun, ssnflġ‑awn‑tnt s‑ma‑tšttam.»

¹⁷ awin‑d lksibt‑nsn i‑yusf. iysan d‑uwlli d‑imugayn d‑iġʷyal a‑s‑asn‑issnfl amššu. asggʷas‑an ar‑asn‑yakka mad‑šttan, fkn‑as kullu lksibt‑nsn.

¹⁸ lliġ izri‑usggʷas‑an, aškin‑d daġ s‑dars wis sin isggʷasn inin‑as: «ur‑ra‑fllak‑nssntl a‑sidi, ur‑nṭṭaf iqaridn. d‑lksibt‑nġ tlla kullu ġ‑ddu‑ufus‑nk. ha‑yaġ ġ‑lgddam‑nk, ur‑darnġ abla ih̬f‑nġ d‑igran‑nġ.

¹⁹ is‑ra‑ginġ‑tmnadt ar‑ntmmtat ġ‑lgddam‑nk, nkkʷni ula igran‑nġ? ssnfl‑aġ amššu s‑ih̬f‑nġ d‑igran‑nġ. ra‑ng ismgan i‑firɛawn, ig‑wakal‑nġ wins, tfkt‑aġ ġir amud a‑nddr, f‑ad‑ur‑nmmt, ih̬wu‑wakal.»

²⁰ isġ yusf kullu akal n‑miṣr i‑firɛawn. ayt‑miṣr kullutn zznzan‑as igran‑nsn, ašku iḥawl‑asn laẓ. ġmkan a‑s‑iwrri‑wakal iga kullu win firɛawn.

²¹ ula mddn, iga‑tn kullu yusf d‑ismgan, zġ‑ttmi n‑miṣr ar ttmi yaḍni.

²² walaynni igran n‑ikahann ur‑tn‑isġi, ašku ikahann ar‑tamẓn tiġrad‑nsn zġ‑dar firɛawn, ar‑šttan zġ‑maylli‑asn‑yakka firɛawn, ur‑tn‑ih̬ṣṣa ad‑zznzn igran‑nsn.

²³ isawl yusf s‑mddn yini‑asn: «ẓrat ġassad sġiġ‑kʷn kunni ula ikalln‑nun i‑firɛawn. hay‑amud, zaydat tkrzm akal.

²⁴ ġ‑uzmz n‑tmgra ra‑tẓlim i‑firɛawn tis smmust, tamẓm kkuẓṭ i‑ih̬f‑nun a‑srsn‑daġ‑tkrzm akal, ar‑zġ‑gisn‑tšttam kunni d‑ayt‑darun d‑tarwa‑nun mẓẓinin.»

²⁵ inin‑as: «tjjnjmt tudrt‑nġ a‑sidi. lliġ nufa rrḍa ġ‑iẓri‑nk, ra‑ng ismgan i‑firɛawn.»

²⁶ ig‑t yusf d‑tnbaṭṭ ġakudan ġ‑tmazirt n‑miṣr, tlla sul s‑ġassad. ar‑ttyawẓlay tis smmust i‑firɛawn, abla igran n‑ikahann a‑ur‑iṭṭaf firɛawn.

²⁷ ġmkan a‑s‑wrrin ayt‑israyil zdġn ġ‑tmazirt n‑miṣr ġ‑wakal n‑gušn. ar‑gis‑teṭṭafn ayda ar‑gis‑tarun tarwa, aylliġ a‑di‑ttigatn bahra.

²⁸ ik yaɛqub ssa d‑mraw (17) n‑usggʷas ġ‑tmazirt n‑miṣr, irgl miyya d‑kkuẓ id‑mraw d‑ssa (147) n‑usggʷas ġ‑tudrt‑ns.

²⁹ lliġ iqrrb a‑immt, iġr‑d i‑yus yusf yini‑as: «iġ‑dark‑ɛzzaġ, ġir srs afus‑nk ġ‑ddu‑umṣaḍ‑inu, tggallt‑iyi s‑lḥqq d‑lḥnant ur‑iyi‑ttmḍalt ġ‑miṣr.

³⁰ riġ a‑n‑gnġ ġ‑gr id‑baba. ġir asi‑yyi zġ‑miṣr, tmḍlt‑iyi‑n didsn ġ‑umḍḍal‑nsn.» yini‑as yusf: «rad‑skrġ ġmklli‑s‑tnnit.»

³¹ yini‑as yaɛqub: «ggall‑iyi.» iggall‑as yusf. iknu israyil ġakudan f‑ih̬f n‑tisi‑ns.