isizwur 46 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

amuddu n‑ayt‑yaɛqub s‑dar yusf

¹ inkr israyil yasi kullu ma‑iṭṭaf imuddu s‑bir‑šibaɛ, iġrṣ gis i‑tġrṣiw i‑rbbi n‑babas isḥaq.

² isawl‑d rbbi s‑israyil ġ‑tiwuẓra n‑iyḍ yini‑as‑d: «yaɛqub, yaɛqub». yini‑as: «ha nkki».

³ yini‑as: «nkkin a‑igan rbbi, gġ rbbi n‑babak. ad‑ur‑tiksaḍt a‑thuwwdt s‑miṣr, ašku rad‑gik‑skrġ ġin yan‑uqbil imqqurn.

⁴ ra‑n‑dik‑huwwdġ s‑miṣr, ssawnġ‑d ilmma tarwa n‑tarwa‑nk zġ‑gis. han afus n‑yusf ġ‑isiggʷra a‑ra‑iqqn alln‑nk.»

⁵ iftu yaɛqub ġakudan zġ‑bir‑šibaɛ. asin tarwa n‑israyil babatsn d‑tarwa‑nsn d‑tmġarin‑nsn ġ‑lkrarṣ lli‑d‑yuzn firɛawn a‑gisnt‑ssidun.

⁶ awin didsn ula lksibt d‑wayda lli‑ṭṭafn ġ‑tmazirt n‑kanɛan. ġmkan a‑s‑ikšm yaɛqub s‑miṣr ntta d‑wamud‑ns,

⁷ a‑t‑igan d‑tarwa‑ns d‑tarwa‑nsn d‑istitsn. hay‑amud‑ns kullut, yiwi‑t s‑miṣr.

²⁶ sḍis id‑mraw d‑sḍis (66) ad‑gan ayt‑yaɛqub lli‑dars‑iluln, gn amud‑ns lli‑dids‑ikšmn s‑miṣr, munnt‑d‑didsn ula timġarin n‑tarwa‑ns.

²⁷ iḥasb ula sin tarwa n‑yusf lli‑yuru ġ‑miṣr. s‑tga tasut n‑yaɛqub lli‑illan ġ‑miṣr, ssa n‑id‑mraw (70).

²⁸ yuzn yadlli yus yahuda s‑dar yusf, ad‑as‑izwur iml‑as aġaras n‑gušn. ġmkan a‑s‑lkmn akal n‑gušn.

²⁹ inkr yusf ġakudan iqqn lkurriṣa‑ns, yawn a‑n‑imnaggar babas israyil ġ‑gušn. lliġ‑t‑in‑ilkm yusf, yamẓ gis iḥbbl‑t‑id iqama ar‑yalla.

³⁰ yini ilmma israyil i‑yusf: «ġir mmtġ‑iyt ġilad ġ‑ẓriġ udm‑nk, issanġ is‑sul‑tddrt.»

³¹ isawl ilmma yusf i‑aytmas d‑tawjja n‑babas yini‑asn: «rad‑dduġ a‑n‑ɛlmġ firɛawn iniġ‑as: ‹han aytma d‑tawjja n‑baba uškan‑d dari zġ‑tmazirt n‑kanɛan.

³² ntni ikssabn ad‑gan ar‑kssan lksibt, iwin‑d didsn ulli d‑imugayn ula kullu mad‑ṭṭafn.›

³³ imma kunni iġ‑awn‑d‑iġra firɛawn s‑dars isqsa‑kʷn: ‹ma‑igan tawuri‑nun?›

³⁴ tinim‑as: ‹imqasan‑nk a‑sidi, zġ‑mẓẓiy‑nġ sul s‑ġilad, ikssabn a‑nga, nkkʷni ula imzwura‑nġ.› ra‑kʷn‑yadj ġakudan a‑tzdġm ġ‑wakal n‑gušn.» ašku imksawn n‑uwlli, hatni ḥrmn ġ‑dar ayt‑miṣr.