isizwur 45 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

yusf isawl i‑aytmas

¹ yusf ur‑sul‑iẓḍar a‑yamẓ ġ‑ih̬f‑ns ġ‑wammas n‑willi‑t‑itqasan, yall awal‑ns yamr‑tn ad‑kullu‑ffuġn. ur‑sul‑dids‑iqama abla aytmas lliġ‑asn‑imla ih̬f‑ns.

² ar‑yalla s‑jjhd. sfldn‑as ayt‑miṣr, sfldn‑as ula ayt‑tgmmi n‑firɛawn.

³ yini yusf ġakudan i‑aytmas: «yusf ad‑giġ nkki. is‑sul‑iddr baba?» imma aytmas ur‑ẓḍarn ad‑as‑jawbn, ašku ksuḍn bahra.

⁴ izayd yusf yini i‑aytmas: «ġir akmurat‑d s‑dari.» lliġ‑n‑dars‑akmurn yini‑asn: «nkki a‑igan gʷmatun yusf lli‑tzznzam s‑miṣr.

⁵ imma ġilad, a‑ur‑tasim taġuft ula tsshuwwlm ih̬f‑nun f‑mamnk a‑yyi‑tzznzam s‑ġid, ašku rbbi a‑yyi‑d‑yuznn a‑kʷn‑d‑zwurġ baš ad‑jjnjmġ tudrt n‑mddn.

⁶ ašku sin isggʷasn ayd‑s‑illa‑uġʷni ġ‑tmazirt, d‑smmus isggʷasn a‑sul‑iqaman, ur‑ra‑gisn‑tili la tiyrza ula tamgra.

⁷ yazn‑iyi‑d rbbi a‑kʷn‑d‑zwurġ, baš ad‑qamant tasutin‑nun f‑wakal, tnjm tudrt‑nun s‑ujnjm ihiyyan.

⁸ nniġ‑awn han urd kunni a‑yyi‑d‑yuznn s‑ġid, walaynni rbbi a‑yyi‑d‑yuznn, ig‑iyi d‑umšawar i‑firɛawn ar‑tḥkamġ ġ‑tgmmi‑ns, ig‑iyi d‑lḥakm f‑tmazirt n‑miṣr kullutt.

⁹ ḥarrwat ġilad twrrim s‑dar baba tinim‑as: ‹inna‑yak yuk yusf: han iga‑yyi rbbi d‑lḥakm f‑miṣr kullut. ašk‑id dari, a‑ur‑n‑tmaṭlt.

¹⁰ ra‑tzdġt ġ‑tsgiw n‑gušn, takmurt‑d sri kiyi d‑tarwa‑nk d‑tarwa‑nsn d‑uwlli d‑imugayn ula kullu ma‑dark‑illan.

¹¹ ġin a‑ġ‑ra‑ywn‑akkaġ aynna‑kʷn‑ih̬ṣṣan, ašku ra‑sul‑yili‑uġʷni smmus isggʷasn. ur‑ra‑k‑ih̬ṣṣa yat kiyi ula tawjja‑nk wala lksibt‑nk.› »

¹² izayd yusf yini: «hati ġilad tukʷzm‑iyi, yakʷz‑iyi ula gʷma bnyamin, tissanm izd nkkin ayad srun isawaln.

¹³ inyat i‑baba f‑luqr‑ad dari illan ġ‑miṣr, tɛawdm‑as f‑kullu ma‑tẓram. ḥarrwat tawim‑d baba s‑ġid.»

¹⁴ yamẓ ilmma yusf gʷmas bnyamin ġ‑gr ifassn‑ns iḥbbl‑t‑id ar‑yalla. iḥbbl‑t‑id bnyamin ula nttan ar‑yalla.

¹⁵ izayd yusf issudn aytmas kullutn iḥbbl‑tn‑d ar‑yalla. ar‑ilmma‑dids‑sawaln aytmas.

¹⁶ lliġ sfldn ayt‑tgmmi n‑firɛawn izd aytmas n‑yusf a‑d‑yuškan, ifrḥ firɛawn d‑imġarn‑ns s‑lah̬bar.

¹⁷ yini firɛawn i‑yusf: «sawl s‑aytmak tinit‑asn: ‹ġmkad a‑ra‑tskrm. asyat i‑lbhaym‑nun twrrim s‑tmazirt n‑kanɛan,

¹⁸ tawim‑d ilmma babatun d‑tawjja‑nun twrrim‑d s‑dari. rad‑awn‑fkġ akal lli‑kullu‑ifulkin ġ‑miṣr, ar‑tšttam zġ‑ṣṣabt n‑tmazirt.›

¹⁹ fkiġ‑ak ula awal‑ad a‑ysn‑ti‑tinit: ‹awyat lkrarṣ zġ‑miṣr ma‑f‑a‑di‑ttasim tarwa‑nun d‑tmġarin‑nun, tawim‑d ula babatun twrrim‑d.

²⁰ ad‑ur‑tlhum s‑wayda lli‑ra‑n‑tflm, ašku akal lli‑kullu‑ifulkin a‑ra‑ig winun ġ‑tmazirt n‑miṣr.› »

²¹ skrn tarwa n‑israyil ġmkan. ifk‑asn yusf lkrarṣ ġmklli‑t‑yuṣṣa firɛawn, ifk‑asn lɛwin i‑uġaras.

²² ifk timlsit n‑ljdid i‑kud yan gisn, imma bnyamin ifka‑yas kraḍ id‑miyya (300) n‑uqarid n‑nnʷqrt d‑smmust‑tmlsa n‑ljdid.

²³ yazn yusf tiwafkiw‑ad i‑babas, mraw iġʷyal usin timih̬ar n‑miṣr, d‑mrawt‑tġʷyal usint imndi d‑uġrum d‑lɛwin lli‑ra‑iḥtajja babas i‑umuddu.

²⁴ isafḍ ilmma aytmas yini‑asn: «a‑ur‑tlamam i‑ngratun ġ‑uġaras.»

²⁵ awnn‑d zġ‑miṣr aškin‑d s‑tmazirt n‑kanɛan s‑dar babatsn yaɛqub.

²⁶ inin‑as: «han yusf sul iddr, iwrri iga lḥakm f‑tmazirt n‑miṣr kullutt.» imma ntta, itġaša‑uwl‑ns ašku ur‑tn‑yumin.

²⁷ walaynni lliġ‑as‑ɛawdn f‑kullu iwaliwn lli‑s‑asn‑inna yusf, iẓr ula lkrarṣ lli‑as‑d‑yuzn yusf baš a‑t‑asin s‑miṣr, twrri‑d ilmma rruḥ babatsn yaɛqub.

²⁸ isawl ġakudan israyil yini: «yuwda‑yyi ġir iwi yusf, lliġ sul iddr. rad‑dduġ a‑t‑ẓrġ ur‑ta‑mmutġ.»