isizwur 44 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

yusf yurm aytmas

¹ yamr yusf ġakudan amġar n‑tgmmi‑ns yini‑as: «ɛmmr itlsan i‑irgazn‑ad s‑imndi s‑unšk nna‑mi‑ẓḍarn a‑t‑asin, tgt‑n i‑kraygatt yan gisn iqaridn‑ns ġ‑imi n‑utllis‑ns.

² tḥḍut lkas‑inu n‑nnʷqrt ġ‑imi n‑utllis n‑walli gisn imẓẓin, tgt‑n dids iqaridn lli‑s‑isġa imndi.» iskr‑umġar maylli‑s‑as‑inna yusf.

³ lliġ a‑d‑itfaw‑wass, isafḍ irgazn‑an d‑iġʷyal‑nsn.

⁴ ġir ffuġn zġ‑tmdint yan imikk, yamr yusf amġar n‑tgmmi‑ns yini‑as: «nkr tẓẓut ġ‑irgazn‑an. iġ‑tn‑in‑tlkmt tinit‑asn: ‹mah̬ aylliġ trurm ma‑ifulkin s‑ma‑yʷh̬šnn?

⁵ is‑urd lkas‑an a‑ġ‑a‑issa sidi ar‑srs‑itkašaf? han ġayd tskrm yʷh̬šn bahra.› »

⁶ iddu‑umġar. lliġ‑tn‑in‑ilkm, isqsa‑tn ġmkan.

⁷ rarn‑as: «mah̬ aylliġ tnnit a‑sidi wan iwaliwn‑ad? ur‑jjid imqasan‑nk a‑iswangmn ad‑skrn zund ġaya.

⁸ tssnt iqaridn lli‑n‑nufa tawala‑yan yaḍni ġ‑imawn n‑itlsan‑nġ, hati nrur‑ak‑tn‑d zġ‑tmazirt n‑kanɛan. mamnk a‑ra‑niri a‑nakʷr nnʷqrt nġd urġ zġ‑tgmmi n‑sidik?

⁹ ẓr ġilad, iġ‑tufit lkas dar kra n‑yan ginġ iqqan‑t‑id a‑immt, nwrri ng kullwaġ ismgan ġ‑ddu‑ufus‑nk a‑sidi.»

¹⁰ irar‑asn: «a‑yili ġmklli‑s‑tnnam, walaynni wanna dar‑t‑in‑ufiġ, ntta waḥdut a‑ra‑dari‑ig ismg. wiyyaḍ ur‑ra‑fllasn‑yili yat.»

¹¹ ḥarrun kullutn zzugzn‑d itlsan‑nsn s‑wakal rẓmn‑tn.

¹² ar‑gisn‑iššnubbuš‑umġar yan s‑yan zġ‑win walli imqqurn ar walli imẓẓin, yaf‑n ilmma lkas ġ‑utllis n‑bnyamin.

¹³ ṭiyr‑asn kullu bahra, bbin timlsa‑nsn. asin kullu f‑iġʷyal‑nsn wrrin‑d s‑tmdint.

¹⁴ lliġ ilkm yahuda d‑aytmas s‑dar yusf, afn‑t‑in sul illa ġ‑tgmmi. ḍrn s‑wakal ġ‑lgddam‑ns.

¹⁵ isawl‑d yusf yini‑asn: «ma‑iga ġayd tskrm? is‑ur‑tssinm izd wan nkki iẓḍar a‑itkašaf?»

¹⁶ yini‑as yahuda: «ma‑s‑ra‑nrar awal a‑sidi? ma‑rad‑ak‑nini? mamnk a‑s‑ra‑nssbrra ih̬f‑nġ? ha‑yaġ ġilad, rbbi iḥasb‑d fllanġ lɛib‑nġ. rad‑kullu‑ng ismgan‑nk, a‑sidi, nkkʷni ula walli dar ityafa lkas.»

¹⁷ imma yusf irur‑asn yini: «ha nkki ur‑rad‑ẓḍarġ ad‑skrġ ġmkan. ġir walli dar ityafa lkas a‑ra‑d‑dari‑ig ismg. kunni awnat s‑dar babatun ġ‑sslamt.»

¹⁸ yakmur‑n srs yahuda yini‑as: «wa sidi, ġir adj amqasa‑nk ad‑ak‑iniġ yan‑wawal a‑sidi. ad‑ak‑ur‑ṭiyr f‑umqasa‑nk a‑sidi, kiyi lli‑dar taḥkimt n‑firɛawn.

¹⁹ tsawlt yadlli i‑imqasan‑nk a‑sidi, tsqsat‑aġ: ‹is‑darun babatun nġd kra n‑gʷmatun yaḍni?›

²⁰ nenna‑yak a‑sidi: ‹illa darnġ babatnġ yuwssr bahra, yili yan gʷmatnġ imẓẓin, yuru‑t ġ‑tuwssrt‑ns. aḥšmi‑an, immut gʷmas, d‑ntta waḥdut a‑iqaman ġ‑tarwa n‑innas, iɛzzu bahra dar babas.›

²¹ tnnit ġakudan i‑imqasan‑nk: ‹awyat‑t‑id s‑dari a‑t‑ẓrġ.›

²² nenna‑yak a‑sidi: ‹aḥšmi‑an, ur‑iẓḍar babas a‑dids‑ibḍu. ašku iġ‑dids‑ingara, ra‑immt babas.›

²³ walaynni tnnit‑aġ: ‹iġ‑ur‑di‑tiwim gʷmatun imẓẓin s‑dari, ur‑ra‑tẓrm udm‑inu.›

²⁴ nwrri ġakudan s‑dar‑umqasa‑nk baba, nɛawd‑as awal lli‑s‑aġ‑tnnit a‑sidi.

²⁵ ik lḥal ma‑ikka yini‑aġ babatnġ: ‹wrryat tsġm‑aġ‑d kra n‑ma‑nštta.›

²⁶ nrar‑as: ‹ur‑nẓḍar a‑nhuwwd s‑ġin. abla iġ‑didnġ‑imun gʷmatnġ imẓẓin a‑ra‑nhuwwd. ašku ur‑nẓḍar a‑nkšm s‑dar lḥakm iġ‑ur‑didnġ‑illi gʷmatnġ imẓẓin.›

²⁷ isawl‑d‑umqasa‑nk baba yini‑aġ: ‹tssnm is‑iyi‑turu‑tmġart‑inu sin tarwa.

²⁸ yan laḥ‑iyi‑t, iniġ: yuza‑t kra n‑luḥš, ha‑yyi ur‑jji‑t‑sul‑ẓriġ zġ‑ġakudan.

²⁹ walaynni iġ‑iyi‑tiwim ġwad ula nttan ijru‑as kra, han s‑tguḍi a‑s‑ra‑tzzugzm ššib‑inu s‑tdrut n‑wakal.›

³⁰ ġilad a‑sidi, iġ‑n‑wrriġ s‑dar‑umqasa‑nk baba, ma‑rad‑as‑yili iġ‑nnit‑ur‑didnġ aḥšmi‑ad lli‑dars‑iɛzzan uggʷar n‑tudrt‑ns?

³¹ iġ‑iẓra ur‑didnġ aḥšmi, han lmut a‑ra‑t‑yawi a‑sidi, d‑tguḍi a‑s‑ra‑nzzugz ššib n‑umqasa‑nk babatnġ s‑tdrut n‑wakal.

³² ašku nkki a‑t‑iḍmnn i‑baba, iniġ‑as: ‹iġ‑ur‑ak‑t‑id‑rurġ ġ‑laman, asiġ nkki lɛib ġ‑dark a‑baba, kullu ma‑rad‑kġ ġ‑tudrt‑inu.›

³³ ġilad a‑sidi, adj‑iyi ad‑qamaġ ġ‑udġar n‑uḥšmi, gġ dark ismg, tadjt‑t ntta a‑iddu d‑aytmas.

³⁴ ašku man udm ra‑n‑skrġ s‑baba iġ‑ur‑didi‑imun‑uḥšmi? ur‑ẓḍarġ ad‑ẓrġ taguḍi lli‑ra‑yasi baba ġakudan.»