isizwur 43 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

uškan‑d daġ aytmatn s‑miṣr

¹ išqa‑bahra‑uġʷni ġ‑wakal.

² lliġ ššan kullu imndi lli‑d‑iwin zġ‑miṣr, yini‑asn babatsn: «wrryat tsġm‑aġ‑d imikk n‑ma‑nštta.»

³ imma yahuda irur‑as: «han iɛlm‑aġ‑urgaz‑an s‑maɛqul yini‑aġ: ‹ur‑ra‑tẓrm udm‑inu iġ‑ur‑d‑didun‑imun gʷmatun.›

⁴ azn didnġ gʷmatnġ, nhuwwd nsġ‑ak‑d amššu.

⁵ walaynni iġ‑ur‑didnġ‑imun, ur‑ra‑nddu. ašku argaz‑an inna‑yaġ: ‹iġ‑ur‑d‑didun‑imun gʷmatun, ur‑ra‑tẓrm udm‑inu.› »

⁶ irar‑asn israyil: «mah̬ a‑yyi‑tskrm tamukrist‑ad, tnnam i‑urgaz‑an ‹illa darnġ yan gʷmatnġ yaḍni›?»

⁷ inin‑as: «isqsa‑yaġ‑urgaz‑an bahra, isqsa ġ‑ayt‑darnġ yini: ‹is‑sul‑iddr babatun? is‑darun kra n‑gʷmatun yaḍni?› ur‑as‑nbdir abla maylli‑f‑aġ‑isqsa. mah̬ nssn is‑rad‑aġ‑yini ‹awyat‑d gʷmatun s‑ġi›?»

⁸ yini yahuda i‑babas israyil: «azn aḥšmi didi. ra‑nnkr nddu ġilad baš a‑sul‑nddr, a‑ur‑nmmt nkkʷni ula kiyi ula tarwa‑nġ kullutn.

⁹ d‑nkki ad‑ak‑t‑iḍmnn, tḍalbt‑t zġ‑ufus‑inu. iġ‑ur‑ak‑t‑id‑rurġ ssbiddġ‑t ġ‑lgddam‑nk, rad‑asiġ nkki lɛib kullu ma rad‑kġ ġ‑tudrt‑inu.

¹⁰ ašku mra is‑ur‑a‑ntmaṭal, lukun ndda nwrri‑d f‑snat‑twal.»

¹¹ isawl‑d ilmma babatsn israyil yini‑asn: «iġd ġmkan a‑d‑iqqann, skrat s‑wawal‑ad. asyat kra zġ‑tmih̬ar n‑tmazirt‑nġ ġ‑itlsan‑nun, a‑tfkm tasmġurt i‑urgaz‑an. awyat‑as imikk n‑lbh̬ur d‑tammnt d‑tujjut imimn d‑lmurr d‑kawkaw d‑lluz.

¹² tawim iqaridn f‑snat‑twal, trarm‑as iqaridn lli‑n‑tufam ġ‑imi n‑itlsan‑nun. likun akkʷ ur‑ssinn mddn‑an mad‑skrn.

¹³ tawim didun gʷmatun ula nttan. nkrat ġilad twrrim s‑dar‑urgaz‑an.

¹⁴ ḍalbġ rbbi da‑iẓḍarn i‑kulši a‑irar argaz‑an a‑fllawn‑iḥnnu, yadj gʷmatun yaḍni d‑bnyamin ad‑d‑didun‑wrrin s‑dari. imma nkki, iġ‑iyi‑th̬wa‑tgmmi, th̬wu‑iyt.»

¹⁵ nkrn aytmatn huwwdn s‑miṣr, awin didsn tasmġurt‑an, asin iqaridn f‑snat‑twal, imun didsn bnyamin, aylliġ biddn ġ‑lgddam n‑yusf.

¹⁶ imma yusf, lliġ iẓra is‑didsn‑illa bnyamin, yini i‑umġar lli‑illan f‑tgmmi‑ns: «šškšm irgazn‑ad s‑tgmmi‑nu, tġrṣt i‑tġrṣi, tjjujadt tirmt, ašku ra‑didi‑ššn imkli.»

¹⁷ iskr‑umġar s‑wawal‑ns, yawi irgazn s‑tgmmi n‑yusf.

¹⁸ lliġ‑tn‑yiwi s‑tgmmi n‑yusf, iksaḍn ntni bahra, inin d‑ih̬f‑nsn: «f‑ssibt n‑iqaridn lli‑aġ‑d‑iwrrin tawala‑yan ġ‑itlsan‑nġ, ġayan a‑f‑ad‑aġ‑d‑išškšm s‑ġid. yiri ad‑aġ‑issmuttl yakʷi ginġ, irar‑aġ a‑ng ismgan, yawi iġʷyal‑nġ.»

¹⁹ lliġ lkmn imi n‑tgmmi, biddn sawln d‑umġar n‑tgmmi n‑yusf

²⁰ inin‑as: «ṣamḥ‑aġ a‑sidi, tawala yaḍni nuška‑d a‑nsġ amššu,

²¹ walaynni ġassan lliġ nlkm adġar lli‑ġ‑ra‑nns, nrẓm itlsan‑nġ, naf‑n iqaridn n‑kraygatt yan ġ‑imi n‑utllis‑ns. ġunšk lli‑yadlli‑gan ad‑gan. ha‑yaġ ġilad nusi‑d iqaridn‑an kullutn. hatni ġ‑ufus‑nġ.

²² nasi‑d didsn iqaridn yaḍni, f‑a‑nzayd nsġ ma‑nštta. ur‑nssin mad‑aġ‑n‑isrsn iqaridn‑an ġ‑itlsan‑nġ.»

²³ yini‑asn: «thnnayt d‑ih̬fawn‑nun, ad‑ur‑tiksaḍm. is‑urd rbbi‑nun d‑win babatun a‑igan lh̬ir ġ‑itlsan‑nun? ašku iqaridn‑nun lkmn‑iyi‑d tawala‑yan.» issufġ‑asn‑d ilmma šimɛun.

²⁴ izayd‑urgaz išškšm‑tn s‑tgmmi n‑yusf, ifk‑asn‑d aman, sirdn iḍarn‑nsn. lliġ ɛlfn iġʷyal‑nsn,

²⁵ ḥiyyln tasmġurt lli‑rad‑fkn i‑yusf. ar‑srs‑tqln a‑d‑yašk ġ‑tuẓẓunt n‑wass, ašku sfldn is‑rad‑dids‑ššn imkli.

²⁶ lliġ‑d‑yuška yusf, awin‑as‑d tasmġurt s‑tgmmi, knun ar akal ġ‑lgddam‑ns.

²⁷ isqsa‑tn f‑sslamt‑nsn yini: «ula babatun is‑ihnna? afqqir lli‑f‑iyi‑tsawlm yadlli, is‑sul‑iddr?»

²⁸ inin‑as: «amqasa‑nk babatnġ thnna dars luqt, sul ukan iddr.» ssknun ih̬fawn‑nsn ġ‑lgddam‑ns.

²⁹ yall yusf alln‑ns s‑a‑itmnad bnyamin lli‑igan gʷmas zġ‑innas, isqsa‑tn: «izd gʷmatun ayad, ġwalli giwn imẓẓin lli‑f‑iyi‑tsawlm? a‑k‑ibark rbbi, a‑iwi.»

³⁰ iḥarru yusf iffuġ zġ‑darsn, ašku tbbi tasa‑ns lliġ iẓra gʷmas, aškin‑as‑d imṭṭawn, ikšm s‑tḥanut‑ns ar‑yalla.

³¹ isird ilmma udm‑ns, inbḍ ġ‑ih̬f‑ns, iffuġ‑d yini: «awyat‑d tirmt.»

³² ẓlin‑as‑d tirmt‑ns waḥdut, ẓlin tin aytmas waḥdutn, ẓlin tin ayt‑miṣr lli‑dids‑šttanin waḥdutn. ašku ayt‑miṣr ur‑a‑drrun ġ‑uruku d‑ayt‑ɛibr. iḥrm ġunškan ġ‑dar ayt‑miṣr.

³³ imma yusf issgawr aytmas ġ‑umnid‑ns, kud yan ġ‑tama n‑wayya zġ‑wad imqqurn ar wad imẓẓin. ar‑tmnadn ġ‑ingratsn ar‑tɛjjabn.

³⁴ ar‑asn‑in‑imddi yusf tiwṭṭitin zġ‑maylli dars illan, imma tawṭṭit lli‑ifka i‑bnyamin tugʷr tin wiyyaḍ f‑smmust‑twal. ššn sun frḥn kullu dids.