isizwur 40 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tiwargiwin n‑sin iḥbbasn

¹ izri ma‑izrin, ha walli itffin tissi i‑ugllid n‑miṣr d‑walli‑as‑d‑israsn aġrum, ntni skrn kra ur‑iɛjib siditsn agllid n‑miṣr.

² iqlaql firɛawn f‑sin imqasan‑lli, amġar n‑id‑bu‑tissi d‑umġar n‑id‑bw‑uġrum.

³ iluḥ‑tn‑in ġ‑lḥbs ġ‑tgmmi n‑unmġur n‑waḍafn. iga‑t lḥbs lli‑ġ‑illa yusf.

⁴ anmġur n‑waḍafn yuṣṣa yusf a‑tn‑itqasa ġ‑lḥbs. qaman‑in gis kigan d‑uwssan.

⁵ ha yan‑iyḍ wargan s‑sin ġ‑lḥbs, amġar bu‑tissi d‑umġar bw‑uġrum n‑ugllid n‑miṣr, kud yan d‑twargit‑ns, kud tawargit d‑lmɛna‑ns.

⁶ ikšm darsn yusf zikk ṣbaḥ, imnad gisn iẓr‑tn ġuwḍn.

⁷ isqsa imġarn‑an n‑firɛawn lli‑dids‑llanin ġ‑lḥbs n‑tgmmi n‑sidis, yini‑asn: «mah̬ aylliġ‑krsn‑uwdmawn‑nun ġassad?»

⁸ inin‑as: «iwarga kud yan ginġ yat‑twargit, walaynni ur‑illi mad‑aġ‑imalan lmɛna‑nsnt.» yini‑asn yusf: «is‑urd rbbi a‑imalan lmɛni? ġir inyat‑iyi‑tnt.»

⁹ iɛawd‑umġar bu‑tissi tawargit‑ns i‑yusf yini‑as: «ẓriġ ġ‑twargit yat ddilit n‑waḍil ġ‑lgddam‑inu,

¹⁰ ilint ġ‑ddilit kraṭṭ‑tṣṭṭwin. ad‑ukan‑tluḥ tayyawin s‑tjjujg, s‑nwant‑tzrmin n‑waḍil.

¹¹ yili lkas n‑firɛawn ġ‑ufus‑inu, amẓġ‑d aḍil‑lli, ẓmmġ‑t ġ‑lkas, fkġ‑t‑in ġ‑ufus n‑firɛawn.»

¹² isawl‑d yusf yini‑as: «ġmkad a‑tga lmɛna‑ns. kraṭṭ‑tṣṭṭwin gant kraḍ‑uwssan.

¹³ wis kraḍ‑uwssan ra‑yall firɛawn agayu‑nk, irar‑k s‑udġar‑nk, ar‑as‑daġ‑takkat lkas ġ‑ufus‑ns, ġmklli tskart ġayd izrin lliġ tgit amġar n‑tissi.

¹⁴ walaynni swangm‑iyi‑d ġakud lliġ thnnat. ġir skr‑iyi afulki‑ad, tbdrt‑iyi ġ‑dar firɛawn, tssufġt‑iyi‑n zġ‑tgmmi‑ad.

¹⁵ ašku s‑ifaddn a‑s‑di‑ttyattayġ zġ‑tmazirt n‑ayt‑ɛibr. ula ġid ur‑gis‑skirġ ma‑f‑a‑yyi‑di‑tggan ġ‑tnuḍfi‑ad.»

¹⁶ lliġ isfld‑umġar bw‑uġrum is‑tfulki lmɛna‑yad, yini‑d ula ntta i‑yusf: «ẓriġ ula nkki ġ‑twargit‑inu is‑usiġ kraṭṭ‑tryal n‑tngwal f‑iggi n‑ih̬f‑inu.

¹⁷ h̬talli n‑uflla, illa gis kullu ma igan aġrum išwan lli‑ittiri firɛawn, walaynni han igḍaḍ ar‑n‑šttan zġ‑tryalt‑an iwalan aflla.»

¹⁸ isawl‑d yusf yini‑as: «ġmkad a‑tga lmɛna‑ns. kraṭṭ‑tryal gant kraḍ‑uwssan.

¹⁹ wis kraḍ‑uwssan ra‑yall firɛawn agayu zġ‑gik, yagʷl‑k f‑yan‑uggjdi, ar‑šttan igḍaḍ tifiyi‑nk.»

²⁰ ilkm lɛid n‑tlalit n‑firɛawn ġ‑wis kraḍ‑uwssan, iskr imnsi imqqurn i‑imqasan‑ns kullutn. yall‑d agayu i‑umġar bu‑tissi d‑umġar bw‑uġrum ġ‑gr imɛawann‑ns.

²¹ irar amġar bu‑tissi s‑twuri‑ns, ar‑n‑daġ‑yakka lkas ġ‑ufus n‑firɛawn.

²² imma amġar bw‑uġrum, yugʷl‑t ġmklli‑s‑as‑inna yusf.

²³ walaynni amġar‑lli bu‑tissi ittu yusf, ur‑sul‑a‑t‑id‑iswingim.