isizwur 39 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

yusf ġ‑tgmmi n‑fuṭifar

¹ lliġ ityattay yusf s‑miṣr, isġ‑t fuṭifar gu‑miṣr zġ‑ayt‑ismaɛil lli‑t‑isshuwwdn s‑ġin. iga nttan anmġur n‑waḍafn n‑lqṣr n‑firɛawn.

² imma yusf, illa dids sidi rbbi, iwrri iga wad injḥn, ih̬dm ġ‑tgmmi n‑sidis gu‑miṣr.

³ iẓr sidis is‑dids‑illa sidi rbbi, iẓr kullu ma‑iskar ar‑as‑t‑ijjnjaḥ sidi rbbi.

⁴ yusf ar‑itqasa sidis, yaf rrḍa ġ‑iẓri‑ns, ig‑t ilmma d‑ungabal f‑tgmmi‑ns, ifl kullu ma‑dars‑illan ġ‑ddu‑ufus‑ns.

⁵ zġ‑wass lli‑ġ‑t‑iga d‑ungabal f‑tgmmi‑ns ula f‑kullu ma‑dars‑illan, ha sidi rbbi ibark tigmmi n‑gu‑miṣr‑an f‑ssibt n‑yusf. tlla lbaraka n‑sidi rbbi ġ‑kullu ma‑iṭṭaf, la ġ‑tgmmi ula ġ‑igran.

⁶ ġmkan a‑s‑ifl kullu ma‑dars‑illan ġ‑ddu‑ufus n‑yusf. ur‑sul‑a‑itlhu s‑yat abla tiram lli‑ištta. yusf iga wad ifulkin ġ‑tiddi‑ns d‑uwdm‑ns.

⁷ zrin kra n‑uwssan s‑trẓm‑ṭiṭṭ n‑tmġart n‑sidis ġ‑yusf tini‑as: «ašk‑id tgnt didi.»

⁸ imma nttan yagʷi, irar i‑tmġart n‑sidis: «han sidi ur‑sul‑yusi lhmm i‑yat ġ‑tgmmi ġilad ġ‑gis‑lliġ nkki. ifl kullu ma‑dars‑illan ġ‑ddu‑ufus‑inu.

⁹ awal‑inu ġ‑tgmmi‑ad iga zund awal‑ns. ur‑iyi‑ikks yat abla kmmi, ašku tgit tamġart‑ns. taggug flla lh̬ʷšant‑ad imqqurn iḥrmn ġ‑iẓri n‑rbbi.»

¹⁰ tzayd nttat ass f‑wass ar‑ti‑ttini i‑yusf, imma ntta ur‑jji‑iqbil a‑dids‑ign ula a‑dids‑yili.

¹¹ yan‑wass ġ‑uwssan‑an ikšm yusf s‑tgmmi a‑isala tawuri‑ns, ttaġ‑d ḥtta yan ġ‑ih̬ddamn ur‑illi ġ‑tgmmi.

¹² tġwi‑t‑id zġ‑tmlsit‑ns tini‑as: «gn didi.» imma ntta irwl‑as, ifl timlsit ġ‑ufus‑ns iffuġ s‑brra.

¹³ lliġ‑t‑tẓra ifl‑as timlsit ġ‑ufus irwl s‑brra,

¹⁴ tġr i‑imqasan n‑tgmmi tini‑asn: «ẓrat, yiwi‑d gu‑ɛibr‑an s‑wammas‑nġ a‑ginġ‑iḍṣṣa. ikšm‑d dari a‑didi‑ign, utġ ġakudan s‑tġuyit.

¹⁵ lliġ‑iyi‑isfld ar‑ssġuyyuġ, ifl timlsit‑ns irwl iffuġ s‑brra.»

¹⁶ tḥḍu timlsit ġ‑dars aylliġ‑d‑yuška sidis n‑yusf.

¹⁷ tɛawd‑as zund iwaliwn‑an tini‑as: «ismg‑an gu‑ɛibr lli‑di‑tiwit, ikšm‑d dari a‑gigi‑iḍṣṣa.

¹⁸ utġ ukan s‑tġuyit, ifl timlsit‑ns irwl s‑brra.»

¹⁹ lliġ isfld sidis n‑yusf i‑tmġart‑ns ar‑ttini «ha ma‑gigi‑iskr ismg‑nk», ṭiyr‑as bahra.

²⁰ inkr ġakudan yamẓ yusf, ig‑t‑in ġ‑lḥbs ġ‑illiġ a‑ttilin iḥbbasn n‑ugllid. d‑ġin a‑ġ‑iqama.

²¹ walaynni sidi rbbi illa d‑yusf, issafu‑as lḥnant‑ns izgan, ifk‑as rrḍa ġ‑dar‑ungabal n‑lḥbs.

²² izri ma‑izrin s‑ifl‑ungabal kullu iḥbbasn yaḍni ġ‑ddu‑ufus n‑yusf. hati kullu ma‑ityawskarn ġ‑lḥbs, nttan a‑t‑iskarn.

²³ ur‑sul‑a‑itlhu‑ungabal n‑lḥbs s‑aynna illan ġ‑ddu‑ufus n‑yusf, ašku illa dids sidi rbbi, d‑kullu ma‑iskar ar‑as‑t‑ijjnjaḥ.