isizwur 37 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tiwargiwin n‑yusf

¹ izdġ yaɛqub ġ‑tmazirt lli‑ġ‑ttin‑ikka ar‑itlulliy babas, a‑stt‑igan d‑tmazirt n‑kanɛan.

² ġmkad a‑iga‑warra n‑tasut n‑yaɛqub. yusf, lliġ dars ssa d‑mraw (17) n‑usggʷas ar‑ikssa ulli d‑aytmas, ar‑itɛawan tarwa n‑bilha d‑zilfa timġarin n‑babas. imma yusf ar‑d‑ittaški ar‑isawal i‑babas f‑lh̬ʷšant lli‑skarn aytmas.

³ israyil, iɛzza dars yusf uggʷar n‑tarwa‑ns yaḍni, ašku ilul dars ġ‑tuwssrt‑ns. iskr‑as yan‑uqššab ikʷlan.

⁴ imma aytmas, lliġ‑t‑ẓran iɛzza dar babas uggʷar‑nsn, krhun‑t bahra aylliġ ur‑sul‑ẓḍarn a‑ys‑ttinin awal iɛdln.

⁵ ha yan‑wass iwarga yusf yat‑twargit, yini fllas i‑aytmas, wrrin ġakudan krhun‑t s‑uggʷar.

⁶ ašku inna: «ġir sfldat i‑twargit lli‑wargaġ.

⁷ ha nkkʷni ar‑ntass tadliwin ġ‑igr, s‑tnkr tadla‑nu tbidd, munnt‑d tadliwin‑nun ssutlnt‑as, knunt kullutnt ġ‑lgddam n‑tadla‑nu.»

⁸ rarn‑as‑d aytmas: «wah is‑ra‑fllanġ‑tgt agllid? is‑ra‑fllanġ‑ttḥkamt?» krhun‑t bahra f‑ssibt n‑twargiwin‑ns ula iwaliwn‑ns.

⁹ iwarga daġ yat‑twargit yaḍni, yini fllas i‑aytmas: «wargaġ tawargit yaḍni. ẓriġ tafukt d‑wayyur d‑yan d‑mraw (11) n‑itri ar‑knnun ġ‑lgddam‑inu.»

¹⁰ lliġ fllas inna i‑babas d‑aytmas, yakʷi gis babas yini‑as: «matta tawargit‑ad twargat? is‑ra‑n‑našk, nkki d‑innak d‑aytmak, nknu‑ak ar akal?»

¹¹ ḥsadn‑t aytmas bahra, imma babas iḥḍa mayan ġ‑uwl‑ns.

inza yusf f‑ufus n‑aytmas

¹² yan‑wass ddun aytmas ksn‑in lksibt n‑babatsn ġ‑tsga n‑tmdint n‑šakim.

¹³ isawl israyil s‑yusf yini‑as: «tssnt is‑n‑ksan aytmak ġ‑šakim. nkr a‑k‑aznġ s‑darsn.» yini‑as yusf: «ha nkki».

¹⁴ yini‑as babas: «ġir zayd tẓrt‑n is‑ihnna lḥal dar aytmak d‑uwlli, tawit‑iyi‑d lah̬bar.» yazn‑t zġ‑talat n‑ḥabrun s‑tsgiw n‑šakim.

¹⁵ ijlu yusf ġakudan ġ‑lh̬la, imnaggar d‑yan‑urgaz. isqsa‑t‑urgaz: «ma‑s‑a‑tsiggilt?»

¹⁶ yini‑as: «ar‑siggilġ s‑aytma. ġir ini‑yyi maniġ ksan?»

¹⁷ yini‑as‑urgaz: «han rḥln zġ‑ġid. sfldġ nnan i‑ngratsn: ‹rwaḥat a‑nddu s‑dutan.› » iftu yusf ġakudan iḍfur aytmas, yaf‑tn‑in ġ‑uzaġar n‑dutan.

¹⁸ lliġ‑t‑in‑ẓran aytmas ġ‑tuggugt, ur‑ta‑tn‑in‑ilkim, mšawarn i‑ngratsn mamnk a‑s‑ra‑t‑nġn,

¹⁹ inin: «han bu‑twargiwin yuška‑d.

²⁰ hiya a‑t‑nnġ ġilad, nluḥ‑t‑in ġ‑kra n‑tnuḍfi, nini ‹išša‑t kra n‑luḥš›, a‑nẓr mani rad‑lkmnt‑twargiwin‑ns.»

²¹ walaynni lliġ isfld rawbin i‑ma‑ttinin wiyyaḍ, yiri a‑t‑zġ‑gisn‑ifukku, yini‑asn: «ad‑ur‑nnġ rruḥ.»

²² yini‑asn daġ: «ad‑ur‑tffim idammn n‑bnadm. luḥat‑t‑in ġ‑tnuḍfi‑ad ġ‑lh̬la, walaynni a‑ur‑ti‑tḍrrum.» illa ġ‑uwl n‑rawbin a‑t‑zġ‑gisn‑ifukku irar‑t i‑babas.

²³ lliġ‑d‑ilkm yusf s‑dar aytmas, kksn‑as aqššab ikʷlan lli‑ilsa,

²⁴ amẓn‑t luḥn‑t‑in ġ‑tnuḍfi ih̬wan, ur gis aman.

²⁵ skiwsn ġakudan ad‑ššn, alln ilmma alln‑nsn s‑n‑ẓran yan‑ukabar n‑ayt‑ismaɛil ġ‑tuggugt. kkan‑d tamazirt n‑gilɛad, asin‑d tujjutin d‑isafarn d‑lmurr f‑irɛman‑nsn, irin a‑tn‑awin s‑miṣr.

²⁶ yini yahuda ġakudan i‑aytmas: «iġ‑nnġa gʷmatnġ nḥḍu idammn‑ns, man lfaytt a‑rad‑aġ‑yili?

²⁷ arayat a‑t‑nzznz i‑ayt‑ismaɛil‑an. a‑ur‑fllas‑yili‑ufus‑nġ, ašku iga gʷmatnġ, ig zġ‑ih̬ṣan‑nġ.» rḍun aytmas s‑wawal‑ns.

²⁸ lliġ‑tn‑d‑lkmn isbbabn‑lli n‑ayt‑midyan, ssġlin‑d yusf zġ‑tnuḍfi, zznzn‑asn‑t s‑sin id‑mraw (20) n‑uqarid n‑nnʷqrt. awin‑t s‑miṣr.

²⁹ imma rawbin, ġ‑lliġ idda s‑tnuḍfi, ur‑n‑gis‑yufi yusf, ṭiyr‑as bahra ibbi timlsit‑ns.

³⁰ iwrri‑d dar aytmas yini‑asn: «laḥ afruh̬, aḥḥ‑inu ma‑rad‑skrġ?»

³¹ asin‑d aqššab n‑yusf, ġrṣn i‑yan‑ubukir, ssglan aqššab ġ‑idammn‑ns.

³² awin aqššab‑an ikʷlan i‑babas inin‑as: «hati nufa ġwad. ẓr izd aqššab n‑yuk ayad nġd uhu?»

³³ yakʷz‑t yini‑asn: «aqššab n‑iwi ayad. kra n‑luḥš yʷh̬šnn a‑t‑yuzan. aḥḥ‑inu, yusf iga igzman. yusf iga igzman.»

³⁴ ibbi yaɛqub malssa‑ns ibkis s‑lh̬iš, ar‑yalla f‑yus kigan d‑uwssan.

³⁵ aškin‑d kullu tarwa‑ns d‑istis a‑ti‑tṣbbarn, walaynni yagʷi a‑iṣbr. yini‑asn: «uhu, rad‑sul‑allaġ ard lkmġ iwi s‑tdrut n‑wakal.» ġmkan a‑iqama ar‑fllas‑yalla.

³⁶ imma yusf, iwin‑t ayt‑midyan s‑miṣr. zznzn‑t i‑fuṭifar lli‑igan anmġur n‑waḍafn n‑lqṣr n‑firɛawn agllid n‑miṣr.