isizwur 33 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

imnaggar yaɛqub d‑ɛisu

¹ yall yaɛqub alln‑ns imnad‑n s‑han ɛisu ifta‑d, munn‑d dids kkuẓ id‑miyya (400) n‑urgaz. ibḍu yaɛqub tarwa i‑innatsn, layah d‑raḥil d‑snat‑tsmgin.

² izzwur snat‑tsmgin d‑tarwa‑nsnt lgddam, isstabɛa‑yasn layah d‑tarwa‑ns, issggru raḥil d‑yusf.

³ izayd yaɛqub s‑lgddam izwur‑asn kullu, ar‑iknnu ar akal ssa n‑twal aylliġ‑n‑yakmur s‑gʷmas.

⁴ imma ɛisu yuzzl‑d imnaggar‑t‑id, yamẓ‑t‑id iḥbbl‑t issudn‑t, ar‑allan s‑sin.

⁵ yall ɛisu alln‑ns ar‑itmnad timġarin d‑tarwa, isqsa‑t: «mad‑gan ġwid dik illan?» yini‑as: «tarwa‑inu ayad a‑sidi, ifka‑yyi‑tn‑d rbbi s‑lḥnant‑ns.»

⁶ mattint‑d snat‑tsmgin d‑tarwa‑nsnt knun ar akal.

⁷ tmatti‑d layah ula nttat d‑tarwa‑ns knun ar akal. imatti‑d ilmma yusf d‑raḥil knun ar akal.

⁸ isqsa‑t ɛisu: «ma‑tnuwwat ġ‑ukabar‑an n‑lksibt lli‑mnaggarġ?» yini‑as: «a‑flla‑trḍut a‑sidi.»

⁹ irar‑as ɛisu: «yuwda‑yyi ma‑dari‑illan a‑gʷma. adj ma‑teṭṭaft kiyi i‑ih̬f‑nk.»

¹⁰ yini‑as yaɛqub: «uhu, iġ‑flla‑trḍit, qbl zġ‑gigi tasmġurt‑ad. ašku s‑ṣṣaḥt lliġ ẓriġ udm‑nk, iga dari zund udm n‑rbbi. hati tskrt gigi afulki tssmrḥbat sri.

¹¹ ġir amẓ lbaraka‑yad lli‑ak‑d‑iwiġ, ašku inɛm flla rbbi, yuwda‑yyi mad‑dari‑illan.» izayd iḍalb‑t bahra aylliġ‑tt‑iqbl.

¹² yini‑as ilmma ɛisu: «rwaḥ a‑nmun d‑uġaras, rad‑ak‑zwurġ nkki.»

¹³ imma yaɛqub inna‑yas: «tssnt a‑sidi is‑sul‑mẓẓin tarwa‑nu, ar‑ssngaynt‑ula‑uwlli d‑tmugayin. iġ‑fllasn‑nssigt tawada n‑yan‑wass, hati ra‑tmmt kullu lksibt.

¹⁴ ġir zayd zwar a‑sidi. ha nkki ra‑n‑fttuġ ġir s‑imikk s‑unšk nna‑mi‑tẓḍar lksibt ġ‑lgddam‑inu, ula s‑unšk nna‑mi‑ẓḍarn tarwa, ard‑k‑in‑lkmġ a‑sidi s‑iwrar n‑saɛir.»

¹⁵ yini‑as ɛisu: «hiya ad‑ak‑flġ kra zġ‑irgazn‑ad‑inu.» irar‑as: «ur‑illi f‑mi. ġir a‑flla‑trḍut a‑sidi.»

¹⁶ iddu ɛisu ġassan, iwrri s‑saɛir.

¹⁷ imma yaɛqub inkr imuddu s‑ṣukkut. ibnu gis yat‑tgmmi, iskr gis iḥšaš i‑lksibt‑ns. mayan a‑f‑a‑ttinin i‑udġar‑an ‹ṣukkut› [tga lmɛna‑ns ‹iḥšaš›].

¹⁸ iddu ilmma yaɛqub s‑šakim ġ‑tmazirt n‑kanɛan, ilkm‑tt s‑sslamt. issbidd ih̬iyyamn‑ns ġ‑brra n‑tmdint. ġmkan a‑s‑ikmml amuddu‑ns zġ‑tmazirt n‑aram.

¹⁹ isġ ilmma agzzum n‑wakal lli‑ġ‑issbidd ih̬iyyamn‑ns, s‑miyya n‑uqarid zġ‑ayt‑ḥamur lli‑igan babas n‑šakim.

²⁰ ibnu gis yan‑ukrkur n‑tġrṣi, ig‑as ism ‹il‑iluhi‑israyil› [tga lmɛna‑ns ‹rbbi lli‑igan rbbi n‑israyil›].