isizwur 32 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

iskr yaɛqub f‑umnaggar d‑ɛisu

¹ imun yaɛqub d‑uġaras‑ns s‑t‑id‑mnaggarn kra n‑lmlayka n‑rbbi.

² lliġ‑tn‑iẓra yini: «akabar n‑rbbi ayad.» ig i‑udġar‑an ism ‹maḥanaym› [tga lmɛna‑ns ‹sin ikabarn›].

³ yazn yaɛqub irqqasn a‑t‑zwarn s‑dar gʷmas ɛisu ġ‑iwrar n‑saɛir ġ‑tmazirt n‑adum

⁴ yuṣṣa‑tn: «ġmkad a‑ra‑tinim i‑sidi ɛisu: ‹inna‑yak‑uh̬ddam‑nk yaɛqub, dar laban a‑ġ‑n‑gawrġ, maṭlġ‑n dars ar ġilad.

⁵ ṭṭafġ imugayn d‑iġʷyal d‑uwlli d‑ismgan d‑tsmgin. aznġ‑n ġilad a‑k‑ɛlmġ a‑sidi, baš ad‑dark‑afġ rrḍa.› »

⁶ wrrin‑d irqqasn s‑dar yaɛqub inin‑as: «nkka‑d dar gʷmak ɛisu. hati ifta‑d a‑k‑id‑imnaggar, munn‑d dids kkuẓ n‑id‑miyya (400) n‑urgaz.»

⁷ iġuwḍ yaɛqub yiksaḍ bahra. inkr ibḍu mddn‑ns f‑sin ikabarn, ntni d‑uwlli d‑imugayn d‑irɛman.

⁸ yini d‑ih̬f‑ns: «iġ‑d‑ilkm ɛisu yan zġ‑ikabarn yakʷi gis, a‑ur‑imil injm‑ukabar yaḍni.»

⁹ iẓẓall yaɛqub ġakudan yini: «wa rbbi n‑jddi ibrahim, rbbi n‑baba isḥaq, wa sidi rbbi lli‑yyi‑d‑innan ‹wrri s‑tmazirt‑nk s‑dar ayt‑dark f‑a‑gik‑skrġ afulki.› »

¹⁰ nkki ur‑sthllaġ yat ġ‑kullu mayd tskrt i‑uh̬ddam‑nk s‑lḥnant‑nk izgan ula s‑tayri‑nk idumn. ġakud lliġ bbiġ asif‑ad n‑urdun, aɛmud kad‑ṭṭafġ, imma ġilad ha‑yyi s‑sin ikabarn.

¹¹ ḍalbġ‑ak ġilad a‑yyi‑tjjnjmt zġ‑ufus n‑gʷma, zġ‑ufus n‑ɛisu, ašku ksuḍġ zġ‑gis a‑d‑fllanġ‑yakʷi, inġ ula timġarin d‑tarwa.

¹² is‑ur‑iyi‑tnnit ‹ra‑gik‑skrġ afulki, ssigtġ amud‑nk zund amlal ġ‑tama n‑umda lli‑s‑ur‑iẓḍar yan a‑iḥasb tugtt‑ns›?»

¹³ iqama ġin ġ‑iḍ‑an, iẓli ilmma zġ‑maylli dars illan yat‑tsmġurt ma‑yakka i‑gʷmas ɛisu,

¹⁴ sin id‑miyya (200) n‑taġaṭṭ, d‑sin id‑mraw (20) n‑ubukir, d‑sin id‑miyya (200) n‑thruyt, d‑sin id‑mraw (20) n‑izimmr,

¹⁵ d‑kraṭṭ id‑mrawt (30) n‑trɛmt issngayn ntnti ula tarwa‑nsnt, d‑kkuẓṭ id‑mrawt (40) n‑tmugayt, d‑mraw (10) izgarn, d‑snat id‑mrawt (20) n‑tġyult, d‑mraw (10) iġʷyal.

¹⁶ ifk‑tn tawrut s‑tuwrut i‑ih̬ddamn‑ns, yuṣṣa‑tn: «zwurat‑iyi lgddam, ar‑tffalm tisaɛ ġ‑gr‑tuwrutin.»

¹⁷ yini i‑uh̬ddam amzwaru: «iġ‑k‑imnaggar gʷma ɛisu isqsa‑k ‹win mi a‑tgit? d‑mani trit? d‑tin mit a‑tga lksibt‑ad tṣugm?›

¹⁸ tinit‑as ‹tin‑uh̬ddam‑nk yaɛqub. yuzn‑d tasmġurt‑ad i‑sidi ɛisu. d‑ntta hati ifta‑d tigira‑nġ.› »

¹⁹ yuṣṣa ġmkan wis sin ula wis kraḍ ula kullu willi ṣugnin tawrutin, yini‑asn: «ġmkan a‑s‑a‑ttinim i‑ɛisu iġ‑t‑in‑tlkmm,

²⁰ tinim‑as daġ ‹hay‑ah̬ddam‑nk yaɛqub ifta‑d nttan tigira‑nġ.› » ašku yaɛqub inna d‑ih̬f‑ns: «iġ‑as‑zzwurġ tasmġurt‑ad, a‑ur‑imil ithnna, irḍu flla ur‑ta‑iẓri udm‑inu.»

²¹ ġmkan a‑s‑as‑tzwur‑tsmġurt, imma nttan iqama d‑ukabar‑ns ġ‑iḍ‑an.

rbbi immaġ d‑yaɛqub

²² inkr yaɛqub d‑iyḍ, issmun‑d snat‑tmġarin‑ns d‑snat‑tsmgin‑ns d‑tarwa‑ns s‑yan d‑mraw (11), yazn‑tn ad‑zrin zġ‑umsakkʷi n‑wasif n‑yabbuq.

²³ lliġ issukʷi yaɛqub kullu ma‑iṭṭaf s‑tsga‑yan yaḍni,

²⁴ iqama ntta waḥdut ġin. immaġ dids yan‑urgaz aylliġ‑d‑iġli‑wass.

²⁵ iẓr‑urgaz is‑ur‑iẓḍar a‑inru yaɛqub, yut‑t ilmma ġ‑nnig‑umṣaḍ, yakuf‑uḍar n‑yaɛqub ġ‑tmiġt‑an.

²⁶ yini‑as‑urgaz: «rẓm‑iyi ad‑dduġ, hati iġli‑d‑wass.» imma yaɛqub irur‑as: «ur‑rad‑ak‑rẓmġ ard‑iyi‑tbarkt.»

²⁷ isqsa‑t‑urgaz: «ma‑iga ism‑nk?» yini‑as: «yaɛqub.»

²⁸ yini‑as: «ur‑sul‑ra‑ig ism‑nk yaɛqub. ġilad ra‑ig ism‑nk israyil [tga lmɛna‑ns ‹immaġ d‑rbbi›], ašku tmmaġt d‑rbbi ula mddn tnrut.»

²⁹ iḍalb‑t yaɛqub: «ġir ini‑yyi ma‑iga ism‑nk?» ijawb‑as: «mah̬ a‑tsqsat ġ‑ism‑inu?» ibark‑t ġakudan.

³⁰ adġar‑an, iga‑yas yaɛqub ism ‹fanwil› [tga lmɛna‑ns ‹udm n‑rbbi›], ašku inna: «ẓriġ rbbi udm s‑uwdm sul ddrġ.»

³¹ tġli‑d‑fllas tafukt ġ‑lliġ izri fanwil, ar‑issbiḍir ašku yaġ‑t‑umṣaḍ‑ns.

³² mayan a‑f‑ur‑a‑šttan ayt‑israyil sul s‑ġassad lɛṣbt lli‑illan ġ‑nnig‑umṣaḍ, ašku nttat a‑ġ‑ittut yaɛqub.