isizwur 31 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tarula n‑yaɛqub zġ‑dar laban

¹ imikk s‑isfld yaɛqub is‑a‑ttinin tarwa n‑laban: «han yaɛqub yusi kullu ma‑igan win babatnġ. ẓrat ayda n‑babatnġ a‑zġ‑issġʷna ih̬f‑ns.»

² iẓr yaɛqub udm n‑laban ur‑sul‑srs‑ifrḥ zund ġayd izrin.

³ yini sidi rbbi ilmma i‑yaɛqub: «wrri s‑tmazirt n‑id‑babak d‑ayt‑dark, ha‑yyi lliġ dik nkki.»

⁴ isafḍ yaɛqub ma‑d‑yaqran i‑raḥil d‑layah ad‑d‑aškint s‑lh̬la lli‑ġ‑iksa ulli‑ns,

⁵ yini‑asnt: «ẓriġ udm n‑babatunt ur‑sul‑sri‑ifrḥ zund ġayd izrin, walaynni rbbi n‑baba ad‑bdda‑didi‑illan.

⁶ kunninti tssnmt izd s‑taggʷst‑inu a‑s‑h̬dmġ dar babatunt.

⁷ iġḍr‑iyi babatunt, issbddl tiġrad‑inu mrawt‑twal, walaynni rbbi ur‑t‑yudji a‑yyi‑iskr kra n‑ḍḍrurt.

⁸ iġ‑inna babatunt tibrarin a‑igan tiġrad‑inu, arunt‑kullu‑uwlli tibrarin. iġ‑inna tigzzayin a‑igan tiġrad‑inu, arunt‑kullu‑uwlli tigzzayin.

⁹ ġmkan a‑s‑ikks rbbi lksibt i‑babatunt, ifk‑iyi‑tt nkki.

¹⁰ ašku ġ‑uzmz lli‑ġ‑a‑tragnt‑uwlli, ẓriġ ġ‑yat‑twargit, ibukirn lli‑itragn d‑tiġaṭṭn gan igzzayn d‑ikrkaḍn d‑ibrarn.

¹¹ yini‑yyi lmalak n‑rbbi ġ‑twargit‑an: ‹wa yaɛqub›. iniġ‑as: ‹ha nkki›.

¹² yini‑yyi‑d: ‹all alln‑nk tmnadt kullu ibukirn‑an itragn tiġaṭṭn, gan igzzayn d‑ikrkaḍn d‑ibrarn, ašku ẓriġ kullu mad‑ak‑iskr laban.

¹³ nkki giġ rbbi lli‑ak‑ibann ġ‑bayt‑il lliġ tẓẓġurt ifir tggallt‑iyi. imma ġilad nkr tffuġt tamazirt‑ad, twrrit s‑tmazirt n‑ayt‑dark.› »

¹⁴ tsawl‑d raḥil d‑layah inint‑as: «is‑sul‑nṭṭaf kra n‑taġamt nġd kra n‑lwrt ġ‑dar babatnġ?

¹⁵ is‑urd zund tibrraniyin ad‑dars‑nga? ašku izznza‑yaġ, ar‑ištta iqaridn lli‑ginġ‑yumẓ.

¹⁶ ayda kullu lli‑ikkis rbbi i‑babatnġ, hati winġ a‑iga d‑win tarwa‑nġ. ġilad kullu ma‑s‑ak‑inna rbbi, skr‑t.»

¹⁷ inkr yaɛqub issni tarwa‑ns d‑tmġarin‑ns f‑irɛman,

¹⁸ iṣug kullu lksibt‑ns, yawi kullu ma‑iṭṭaf, ig‑iyt turutin nġd ayda lli‑iskr ġ‑tmazirt n‑aram, iskr f‑a‑imuddu s‑tmazirt n‑kanɛan s‑dar babas isḥaq.

¹⁹ imma laban, lliġ idda a‑ilass ulli‑ns, takʷr‑as raḥil laṣnam n‑tgmmi.

²⁰ ġmkan a‑s‑išmt yaɛqub laban gu‑aram, ašku ur‑as‑inni ra‑iftu.

²¹ iḥarru yawi kullu ma‑iṭṭaf, ibbi asif n‑furat, imuddu s‑tsgiw n‑iwrar n‑gilɛad.

²² wis kraḍ‑uwssan isfld laban is‑irwl yaɛqub.

²³ inkr yawi dids mddn‑ns, iẓẓu gis tawada n‑ssa n‑uwssan, iḍfur‑t ar iwrar n‑gilɛad.

²⁴ walaynni ġ‑iḍ‑an iban‑d rbbi i‑laban gu‑aram ġ‑twargit yini‑as: «han ad‑ur‑tinit yat i‑yaɛqub, la awal imimn wala awal ismmumn.»

²⁵ izayd laban ilkm f‑yaɛqub ġ‑iwrar n‑gilɛad. ġin a‑ġ‑issbidd yaɛqub ih̬iyyamn‑ns. issbidd ula laban d‑mddn‑ns ih̬iyyamn‑nsn ġ‑iwrar‑an.

²⁶ isawl laban s‑yaɛqub yini‑as: «ma‑iga ġayd tskrt, tšmtt‑iyi tawit‑d isti zund iġ‑iyi‑tnt‑tkkist s‑uwzzal?

²⁷ mah̬ aylliġ trwlt s‑tntla tšmtt‑iyi? mra is‑iyi‑tɛlmt, lukun safḍġ‑k s‑uḥwaš d‑umarg s‑wallun d‑luṭar.

²⁸ mah̬ aylliġ ur‑iyi‑tudjt ad‑ssudnġ isti d‑tarwa‑inu? han anufl ayn tskrt.

²⁹ hati ġilad itjhhd‑ufus‑inu a‑kʷn‑ḍrruġ, walaynni rbbi n‑babak isawl‑d sri igḍam inna‑yyi ‹han ad‑ur‑tinit yat i‑yaɛqub, la awal imimn wala awal ismmumn.›

³⁰ ssnġ is‑k‑yaġ‑umarg n‑ayt‑dars n‑babak, mayan a‑f‑di‑tffuġt, walaynni mah̬ a‑yyi‑tukrt id‑rbbi‑nu?»

³¹ isawl‑d yaɛqub i‑laban yini‑as: «skrġ ġmkan ašku ksuḍġ a‑yyi‑tkkst istik s‑ifaddn.

³² imma id‑rbbi‑nk, iġ‑tn‑tufit dar kra n‑yan ginġ, hati ur‑sul‑ra‑iddr. ssmaqql aynna igan wink tasit‑t. mddn‑nġ rad‑kullu‑gn inagan.» yaɛqub ur‑issin is‑tn‑di‑tukr raḥil.

³³ ikšm laban s‑uh̬iyyam n‑yaɛqub, ikšm s‑win layah ula win snat‑tsmgin, walaynni ur‑yufi yat. lliġ‑d‑iffuġ zġ‑uh̬iyyam n‑layah ikšm s‑win raḥil.

³⁴ raḥil nttat tusi yadlli laṣnam n‑tgmmi, tg‑tn‑in ġ‑utllis n‑urɛm tskiws fllasn. issnubbš laban ah̬iyyam kullut, ur‑tn‑yufi.

³⁵ tsawl‑d raḥil s‑babas tini‑as: «ṣamḥ‑iyi a‑sidi, ur‑ẓḍarġ ad‑biddġ ad‑dik‑nsallamġ ašku uškan‑iyi‑d idammn.» ġmkan a‑s‑isiggl laban, ur‑yufi laṣnam.

³⁶ ibzg yaɛqub ġakudan, iẓi d‑laban yini‑as: «mad‑ak‑skrġ? man lɛar gik skrġ aylliġ‑iyi‑di‑tgʷmmrt s‑ġid?

³⁷ yak tqllbt kullu ayda‑nu, ma‑n‑gis‑tufit iga win takat‑nk? ml‑aġ‑t ġ‑umnid n‑ayt‑dari d‑ayt‑dark, f‑ad‑ḥkamn s‑lḥqq ġ‑gratnġ.

³⁸ sin id‑mraw (20) n‑usggʷas a‑n‑dark‑kkiġ. ur‑jji‑srgnt‑thray‑nk ula tiġaṭṭn‑nk. ur‑jji‑ššiġ izamarn n‑tuwrutin‑nk.

³⁹ ur‑jji‑ak‑d‑iwiġ kra n‑yat tmmuḍrs, nkki a‑yusin ġayan. tanna ittšan ġ‑uzal nġd iḍ, tḍalbt zġ‑gigi atig‑ns.

⁴⁰ ass f‑wass ar‑ssaġ tirġi ġ‑uzal ar‑ssaġ asmmiḍ d‑iyḍ, d‑walln‑inu ur‑a‑ẓrrant iṭs.

⁴¹ sin id‑mraw (20) n‑usggʷas lliġ ġ‑tama n‑takat‑nk. han kkuẓ d‑mraw (14) n‑usggʷas h̬dmġ dark f‑snat istik, d‑sḍis isggʷasn h̬dmġ dark f‑uwlli‑nk. tbddlt ula tiġrad‑inu mrawt‑twal.

⁴² mra is‑ur‑didi rbbi n‑baba, lli‑igan rbbi lli‑s‑yumn ibrahim ig walli issḥurma isḥaq, mra is‑ur‑didi‑illi nttan, lukun tsafḍt‑iyi nnit s‑ifassn h̬wanin. walaynni rbbi iẓra tadallit ula tammara lli‑ššiġ, ġayan a‑f‑ak‑issbayyn tanbaṭṭ‑ns ġ‑iḍ‑ad izrin.»

⁴³ isawl‑d laban yini‑as: «timġarin‑ad gant isti, d‑tarwa‑nsnt tarwa‑nu ad‑gan, tawrutin‑ad tinu ad‑gant, d‑kullu mayd tmnadt iga winu. walaynni ma‑rad‑sul‑skrġ ġassad i‑isti ula tarwa lli‑urunt?

⁴⁴ ašk‑id ġilad a‑nskr lɛhd ġ‑griyi dik, ig inigi fllanġ.»

⁴⁵ yasi‑d yaɛqub yan‑uẓru ġakudan, issbidd‑t a‑ig ifir ibayynn.

⁴⁶ yini i‑mddn‑ns: «ssmunat‑d iẓran.» asin‑d iẓran bnun yan‑ukrkur, ššn imkli kullutn ġ‑tama n‑ukrkur‑an.

⁴⁷ ig‑as laban ism ‹yagar‑sahaduta› [tga lmɛna‑ns ‹akrkur n‑tuggʷa›]. ig‑as yaɛqub ‹galɛid› [tga lmɛna‑ns ‹akrkur n‑tuggʷa›].

⁴⁸ yini‑as laban: «akrkur‑ad iga inigi ġassad ġ‑griyi dik.» ġmkan a‑s‑as‑gan ism ‹galɛid›.

⁴⁹ gn ism i‑udġar‑an ‹miṣfah› [tga lmɛna‑ns ‹tiḍaf›], ašku inna‑yas laban: «a‑iḍuf sidi rbbi ġ‑griyi dik ġakud nna‑ur‑sul‑a‑nẓrra i‑ngratnġ.

⁵⁰ iġ‑tssdullit isti nġd iġ‑fllasnt‑tiwit timġarin yaḍni, wah̬h̬a ur‑illi mad‑iyi‑t‑ittinin, han rbbi a‑igan inigi ġ‑griyi dik.»

⁵¹ izayd laban yini i‑yaɛqub: «ssmaqql akrkur d‑ifir lli‑ssbiddġ ġ‑griyi dik.

⁵² akrkur‑ad iga inigi, d‑ifir‑ad iga inigi, ur‑sar‑n‑zriġ awttu‑ad s‑dark a‑k‑ḍrruġ, wala tzrit‑t‑id s‑dari a‑yyi‑tḍrrut.

⁵³ rbbi n‑ibrahim ula naḥur ula babatsn a‑ra‑iḥkam ġ‑griyi dik.» iggall yaɛqub ġakudan s‑rbbi lli‑issḥurma babas isḥaq.

⁵⁴ iġrṣ yaɛqub i‑yat‑tġrṣi ġ‑uwrir‑an, iġr‑d i‑mddn‑ns kullutn ad‑ššn tirmt. ġ‑iḍ‑an nsan kullu ġ‑uwrir‑an.

⁵⁵ zikk ṣbaḥ inkr‑d laban issudn istis d‑tarwa‑nsnt ibark‑tn, iddu iwrri s‑tmazirt‑ns.