isizwur 29 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

yaɛqub itahl layah d‑raḥil

¹ izayd ilmma yaɛqub imun d‑uġaras‑ns aylliġ ilkm yat‑tmazirt ġ‑tsga n‑usġlay n‑tafukt.

² ar‑n‑itmnad s‑iẓra yan‑wanu ġ‑lh̬la. gnnt kraṭṭ‑tuwrutin n‑uwlli ġ‑tama‑ns, ašku anu‑an a‑zġ‑a‑ssant. yili f‑imi n‑wanu‑an yan‑ifir bahra imqqurn.

³ ġakud nna‑d‑munnt‑kullu‑tuwrutin, ar‑dḥḥin imksawn ifir, ssittin‑t f‑imi n‑wanu ar‑sswan ulli‑nsn. tigira ar‑traran ifir f‑imi n‑wanu.

⁴ yini yaɛqub i‑imksawn: «ayt‑mani a‑tgam ay‑aytma?» inin‑as‑d: «ayt‑ḥaran a‑nga.»

⁵ isqsa‑tn: «is‑tssnm laban yus n‑naḥur?» inin‑as: «nssn‑t.»

⁶ isqsa‑tn: «is‑ihnna?» inin‑as: «ihnna. ha illis raḥil, tmun‑d d‑uwlli‑ns.»

⁷ izayd yaɛqub yini‑asn: «hay‑azal sul iġzzif. ur‑ta‑tlkim tizi a‑tssnsm lksibt. sswayt ulli‑nun ġilad, tawim‑tnt ad‑sul‑kksnt.»

⁸ rarn‑as: «ur‑as‑nufi ard kullu munnt‑tuwrutin, nssitti ilmma ifir f‑imi n‑wanu nssu ulli.»

⁹ sul a‑didsn‑isawal s‑di‑tlkm raḥil, tawi‑d ulli n‑babas, ašku nttat a‑tnt‑ikssan.

¹⁰ yaɛqub, lliġ‑n‑iẓra raḥil illis n‑h̬alis laban, nttat d‑uwlli n‑laban, iddu issmatti ifir f‑imi n‑wanu, issu ulli n‑h̬alis.

¹¹ ġakudan issudn yaɛqub raḥil, yall awal‑ns s‑imṭṭawn n‑lfrḥ

¹² yini‑as: «giġ zġ‑tagʷmat n‑babam, gġ yus n‑rifqa.» tazzl raḥil ġakudan s‑dar babas tini‑as‑t.

¹³ lliġ isfld laban i‑lah̬bar n‑yaɛqub lli‑igan yus n‑uwlltmas, yazzl a‑n‑dids‑imnaggar. iḥbbl‑t issudn‑t yawi‑t s‑tgmmi. iɛawd‑as yaɛqub f‑kullu ma‑ijran.

¹⁴ yini‑as laban: «hati ih̬ṣ‑inu d‑idammn‑inu a‑zġ‑tgit.» iqama dars yaɛqub ayyur n‑waḍan.

¹⁵ yini laban ilmma i‑yaɛqub: «izd ġ‑lliġ tgit zġ‑ayt‑dari, a‑ra‑dari‑tth̬damt bla yat? uhu, ml‑iyi ma‑igan tiġrad‑nk?»

¹⁶ laban iṭṭaf snat istis. h̬talli imqqurn iga ism‑ns layah, h̬talli imẓẓin iga ism‑ns raḥil.

¹⁷ layah šḥant‑as‑twallin, imma raḥil nttat tfulki bahra ġ‑tiddi‑ns ula ġ‑uwdm‑ns.

¹⁸ iḥubbu yaɛqub raḥil, yini i‑laban: «ra‑dark‑h̬dmġ ssa n‑isggʷasn f‑ad‑iyi‑tfkt illik lli‑imẓẓin raḥil.»

¹⁹ yini‑as laban: «yuf ad‑ak‑tt‑fkġ, ula fkiġ‑tt i‑kra n‑yan yaḍni. qama dari.»

²⁰ ġmkan a‑s‑dars‑ih̬dm yaɛqub ssa n‑isggʷasn f‑raḥil. zrin isggʷasn‑an zund kra n‑uwssan drusnin, ašku iḥubba‑tt bahra.

²¹ yini ilmma yaɛqub i‑laban: «fk‑iyi taslit‑inu a‑fllas‑kšmġ, ašku kmmln‑uwssan n‑twuri‑nu.»

²² iġr‑d laban i‑ayt‑ġin kullutn, iskr tamġra.

²³ ġ‑iḍ‑an yawi‑as‑d illis yaḍni layah, ikšm fllas.

²⁴ ifk laban tismgt‑ns zilfa i‑layah a‑stti‑ttqasa.

²⁵ zikk ṣbaḥ s‑tt‑iẓra tga layah. yini i‑laban: «ma‑iga ġayad‑iyi‑tskrt? is urd raḥil a‑f‑dark‑h̬dmġ? mah̬ aylliġ‑iyi‑tšmtt?»

²⁶ irar‑as laban: «ur‑darnġ‑tgi lɛada a‑nfk tad imẓẓin iġ‑ur‑ta‑nfki tifh̬ddit.

²⁷ kmml ssa n‑uwssan n‑h̬tad, nfk‑ak ilmma h̬tan yaḍni, th̬dmt daġ dari ssa n‑isggʷasn yaḍni.»

²⁸ iqbl yaɛqub, ikmml ssa n‑uwssan‑ns. ifk‑as ilmma laban illis raḥil a‑tg tamġart‑ns.

²⁹ ifk laban tismgt‑ns bilha i‑illis raḥil a‑stti‑ttqasa.

³⁰ ikšm yaɛqub f‑raḥil ula nttat, tɛzzu dars raḥil uggʷar n‑layah. izayd ih̬dm dar laban ssa n‑isggʷasn yaḍni.

³¹ lliġ iẓra sidi rbbi is‑ur‑tɛzza layah, irẓm aḥlig‑ns, imma raḥil ur‑a‑ttaru.

tarwa n‑yaɛqub

³² twrri layah ar‑trbbu, taru yan‑warraw, tg‑as ism ‹rawbin› [tga lmɛna‑ns ‹ẓr iwi›] ašku tnna: «iẓra‑d sidi rbbi tadallit‑nu. ġilad ra‑yyi‑iḥubbu‑urgaz‑inu.»

³³ ar‑daġ‑trbbu taru arraw yaḍni tini: «isfld sidi rbbi is‑ur‑ɛzzaġ, ifk‑iyi arraw‑ad ula nttan», tg‑as ism ‹šimɛun› [tga lmɛna‑ns ‹isfld›].

³⁴ ar‑daġ‑trbbu taru arraw yaḍni tini: «tawala‑yad ra‑gigi‑yamẓ‑urgaz‑inu, ašku uruġ‑as kraḍ tarwa», tg‑as ism ‹lawi› [tga lmɛna‑ns ‹yumẓ›].

³⁵ ar‑daġ‑trbbu taru arraw yaḍni tini: «tawala‑yad rad‑ttalġġ sidi rbbi», tg‑as ism ‹yahuda› [tga lmɛna‑ns ‹tulġa›]. tk ilmma kra, ur‑sul‑a‑trbbu.