isizwur 28 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

imudda yaɛqub s‑dar laban

¹ iġr‑d isḥaq ġakudan i‑yaɛqub ibark‑t yuṣṣa‑t: «han ad‑ur‑ttahlt kra n‑yat zġ‑ist‑kanɛan.

² nkr tddut ġilad s‑tmazirt n‑aram, s‑tgmmi n‑batwil babas n‑innak, tawit‑d yat zġ‑istis n‑h̬alik laban a‑tg tamġart‑nk.

³ a‑k‑ibark rbbi da‑iẓḍarn i‑kulši, issigt‑ak tasut‑nk, ifk‑ak tarwa ggutnin, f‑a‑twrrit tgt aqbil n‑tqbilin ggutnin.

⁴ ad‑ak‑ifk rbbi lbaraka lli‑s‑ibark ibrahim, ibark‑k kiyi ula amud‑nk, f‑a‑teṭṭaft akal lli‑ġ‑a‑ttlulliyt, ig akal lli‑ifka rbbi i‑ibrahim.»

⁵ ġmkan a‑s‑t‑yuzn isḥaq. inkr yaɛqub ġakudan imuddu s‑uzaġar n‑aram, s‑dar laban lli‑igan yus n‑batwil gu‑aram. laban iga gʷmas n‑rifqa lli‑igan innas n‑yaɛqub d‑ɛisu.

⁶ imma ɛisu issn is‑ifka isḥaq lbaraka i‑yaɛqub yazn‑t s‑uzaġar n‑aram a‑gis‑itahl. yissan is‑t‑yuṣṣa isḥaq ġakud lliġ‑t‑ibark yini: ‹han ad‑ur‑ttahlt kra n‑yat zġ‑ist‑kanɛan›.

⁷ yissan is‑iskr yaɛqub s‑wawal n‑babas d‑innas iddu s‑uzaġar n‑aram.

⁸ ġakudan ġ‑issn ɛisu is‑ur‑ɛzzant ist‑kanɛan dar isḥaq babas,

⁹ iddu s‑dar ismaɛil yus n‑ibrahim, itahl‑d zġ‑dars illis maḥlat ulltmas n‑nabayut f‑tmġarin‑ns yaḍni.

tawargit n‑yaɛqub ġ‑bayt‑il

¹⁰ imma yaɛqub iffuġ bir‑šibaɛ imuddu s‑tsga n‑ḥaran.

¹¹ ilkm yan‑udġar iskr f‑a‑gis‑ins, ašku truḥ takʷya n‑tafukt. yasi yan‑uẓru zġ‑ġin, ig‑t ġ‑ddu ih̬f‑ns ign.

¹² imikk ar‑itwarga s‑iẓra yat‑tskala, ttrsn iḍarn‑ns f‑wakal, ilkm ih̬f‑ns ar ignna, ar‑as‑aqlayn lmlayka n‑rbbi ar‑as‑di‑tgguzn.

¹³ d‑ha sidi rbbi ibidd srs ġ‑twargit yini‑as: «nkki giġ ‹wad bdda illan›, gġ rbbi n‑babak ibrahim ula win isḥaq. hay‑akal‑ad‑f‑tgnt, rad‑ak‑t‑fkġ kiyi d‑wamud‑nk

¹⁴ ra‑yigat‑wamud‑nk zund agdrur n‑wakal. tasutin‑nk rad‑ɛmmrnt ikalln zġ‑tsgiw n‑umṭar n‑tafukt ar tisgiw n‑usġlay‑ns, ula zġ‑tsgiw n‑usmmiḍ ar tisgiw n‑trġi. kiyi d‑wamud‑nk a‑s‑rad‑barkġ kullu tagʷmatin n‑ddunit.

¹⁵ ha‑yyi lliġ bdda dik. ra‑k‑gablġ ġ‑innas tddit, rarġ‑k‑id s‑wakal‑ad. ur‑ra‑k‑flġ, d‑rad‑ssafuġ kullu ma‑s‑ak‑nniġ.»

¹⁶ ifaq‑d yaɛqub zġ‑iyṭs yini: «s‑ṣṣaḥt illa ‹wad bdda illan› ġ‑udġar‑ad, d‑nkki ur‑ssinġ.»

¹⁷ iġuwḍ bahra yini: «mnšk a‑s‑issiksaḍ‑udġar‑ad. s‑lḥqq iga tigmmi n‑rbbi, ig imi n‑ignna.»

¹⁸ inkr yaɛqub zikk ṣbaḥ, yasi aẓru lli‑iga ġ‑ddu ih̬f‑ns, issbidd‑t a‑ig ifir ibayynn, iffi fllas zzit.

¹⁹ ig ism ‹bayt‑il› i‑udġar‑an [tga lmɛna‑ns ‹tigmmi n‑rbbi›]. kkan‑ttin mddn ar‑ttinin i‑tmdint‑an ‹luz›.

²⁰ iggall yaɛqub ġakudan yini: «iġ‑didi‑imun rbbi, igabl‑iyi ġ‑uġaras‑inu iġzzifn, ifk‑iyi mad‑šttaġ ula mad‑lssaġ,

²¹ ard wrriġ s‑sslamt s‑takat n‑baba, rad‑gġ ‹wad bdda illan› d‑rbbi‑nu.

²² aẓru‑ad lli‑ssbiddġ a‑ig ifir ibayynn, ra‑ig tigmmi n‑rbbi‑nu, ar‑ak‑akkaġ ula tis mrawt zġ‑kullu ma‑yyi‑takkat.»