isizwur 27 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

yiwi yaɛqub lbaraka n‑ifh̬ddi

¹ izri ma‑izrin yuwssr‑d isḥaq, llasnt‑walln‑ns ur‑sul‑isfaw. iġr‑d i‑yus ifh̬ddi ɛisu yini‑as: «wa iwi.» yini‑as‑d: «ha‑yyi a‑baba.»

² yini‑as: «ha nkki mqqurġ, ur‑ssinġ man ass a‑rad‑mmtġ.

³ ġir qlld ġilad s‑lqus‑nk d‑uqrab n‑iẓḍkan, tffuġt s‑tagant tgʷmrt‑iyi‑d kra n‑tfiyi,

⁴ tskrt‑iyi‑d tirmt imimn lli‑dari iɛzzan, tawit‑iyi‑stt‑id a‑stt‑ššġ, fkġ‑ak lbaraka n‑uwl‑inu ur‑ta‑mmutġ.»

⁵ lliġ inna isḥaq awal‑an i‑yus ɛisu, hati tsfld‑as rifqa. iddu ɛisu ġakudan s‑tagant a‑d‑igʷmr kra n‑tgʷmrt.

⁶ imma rifqa, hati tsawl d‑yus yaɛqub tini‑as: «hatin sfldġ i‑babak isawl d‑gʷmak ɛisu inna‑yas

⁷ ‹awi‑yyi‑d kra n‑tgʷmrt, tskrt‑iyi‑d tirmt imimn a‑stt‑ššġ, fkġ‑ak lbaraka n‑sidi rbbi ur‑ta‑mmutġ.›

⁸ ġilad a‑iwi, sfld s‑wawal‑inu tskrt ma‑rad‑ak‑iniġ.

⁹ ġir zayd s‑dar‑uwlli, tawit‑iyi‑d zġ‑gis sin ikrwan jjinin, a‑zġ‑gisn‑skrġ i‑babak tirmt imimn ġmklli‑stt‑ira,

¹⁰ tawit‑stt kiyi ġakudan i‑babak a‑stt‑išš ibark‑k ur‑ta‑immut.»

¹¹ isawl yaɛqub yini i‑innas rifqa: «walaynni ha gʷma ɛisu iga kullu ššɛr, imma nkki hati ilm‑inu ur‑gis ššɛr.

¹² ksuḍġ a‑ur‑imil iggr‑iyi‑d baba, gġ dars aṭnnaẓ, awiġ‑d i‑ih̬f‑inu nnɛlt urd lbaraka.»

¹³ tini‑as innas: «nnɛlt nna gis a‑iwi, a‑flla‑tili. ġir sfld s‑wawal‑inu, tddut tawit‑iyi‑tn‑d.»

¹⁴ iddu yawi‑tn‑d i‑innas, tskr yat‑tirmt imimn i‑babas n‑yaɛqub ġmklli‑stt‑ira.

¹⁵ rifqa llant dars ġ‑tgmmi timlsa šwanin n‑yus imqqurn ɛisu, tasi‑tnt‑d tssls‑tnt i‑yus imẓẓin yaɛqub.

¹⁶ tssls ilmawn n‑ikrwan i‑ifassn‑ns d‑umggrḍ‑ns lli‑ġ‑ur‑illi ššɛr.

¹⁷ tasi‑d tirmt imimn d‑uġrum lli‑tskr, tsrs‑tn‑in ġ‑ifassn n‑yus yaɛqub.

¹⁸ ikšm ġakudan s‑dar babas yini‑as: «a‑baba.» yini‑as‑d: «ha nkki. manwa tgit a‑iwi?»

¹⁹ yini yaɛqub i‑babas: «giġ ɛisu ifh̬ddi‑nk. ha‑yyi skrġ s‑aylli‑s‑iyi‑tnnit. ġir nkr ġila tskiwst tššt zġ‑tgʷmrt‑inu f‑a‑yyi‑ibark‑uwl‑nk.»

²⁰ yini isḥaq i‑yus: «ma‑tskrt a‑iwi, aylliġ‑di‑tgʷmrt ḥina?» yini‑as: «rbbi sidik a‑yyi‑ikmmln maylli riġ.»

²¹ yini isḥaq i‑yaɛqub: «ġir akmur‑d ad‑ak‑ggrġ a‑iwi, issanġ izd iwi ɛisu a‑tgit nġd uhu.»

²² yakmur‑n yaɛqub s‑dar babas, iggr‑as isḥaq yini‑as: «awal iga win yaɛqub, walaynni ifassn gan win ɛisu.»

²³ ur‑t‑yukʷz ašku ššɛr n‑ifassn‑ns iga zund win gʷmas ɛisu. yiri ġakudan a‑t‑ibark,

²⁴ walaynni isqsa‑t: «izd s‑ṣṣaḥt iwi ɛisu a‑tgit?» isawl‑d yini‑as: «nkkin a‑t‑igan.»

²⁵ yini‑as: «fk‑iyi‑d ad‑ššġ zġ‑tgʷmrt‑nk a‑iwi f‑a‑k‑ibark‑uwl‑inu.» ifk‑as išš, yawi‑as‑d aman n‑waḍil ktinin isu.

²⁶ isawl daġ babas isḥaq yini‑as: «ġir akmur‑d tssudnt‑iyi a‑iwi.»

²⁷ yakmur‑n issudn‑t. ikḍu isḥaq aḍu n‑tmlsa‑ns, ibark‑t ġakudan yini: «hay‑aḍu n‑iwi iga zund win tagant lli‑ibark sidi rbbi.

²⁸ a‑k‑issu rbbi s‑tġli n‑ignwan, issmġi‑ak‑d ṣṣabt n‑wakal, issigt‑ak imndi d‑waḍil ard afun,

²⁹ gn ayt‑tqbilin ih̬ddamn‑nk, ar‑knnun ayt‑tmizar ġ‑lgddam‑nk, tgt siditsn n‑tarwa n‑innak, ar‑d‑knnun aytmak ġ‑umnid‑nk, tili nnɛlt f‑wanna‑k‑inɛln, tili lbaraka i‑wanna‑yak‑idɛan s‑lbaraka.»

³⁰ lliġ ibark isḥaq ġ‑yaɛqub, ġir iffuġ‑d yaɛqub zġ‑dars s‑d‑iwrri gʷmas ɛisu zġ‑dar‑tgʷmrt.

³¹ iddu iskr ula nttan yat‑tirmt imimn, yawi‑tt‑id i‑babas yini‑as: «nkr a‑baba, tššt zġ‑tgʷmrt‑inu f‑a‑yyi‑ibark‑uwl‑nk.»

³² yini‑as babas isḥaq: «ma‑tgit kiyi?» yini‑as: «ifh̬ddi‑nk ɛisu ad‑giġ.»

³³ isḥaq ṭiyr‑as bahra ar‑itrgigiy s‑kigan, yini‑as: «ma‑iga ġwalli‑yad‑d‑igʷmrn yawi‑yyi‑d tagʷmrt ur‑ta‑di‑tuškit, ššġ zġ‑gis barkġ‑t? hati ġilad nttan a‑yiwin lbaraka.»

³⁴ lliġ isfld ɛisu i‑wawal n‑babas yut s‑yat‑tġuyit bahra ismmumn, yini i‑babas: «bark‑iyi ula nkki a‑baba.»

³⁵ yini‑as: «gʷmak a‑d‑yuškan išmt‑iyi, yawi lbaraka‑nk.»

³⁶ yini‑as ɛisu: «han ism‑ns ‹yaɛqub›, imšaška‑d dids ism‑an, ašku hati snat‑twal ayd‑iyi‑išmt. ikks‑iyi yad tifh̬ddit‑inu. ha ġilad yiwi‑yyi lbaraka.» izayd yini ġakudan: «is‑ur‑iyi‑sul‑tudjit nkki kra n‑lbaraka?»

³⁷ irar‑as‑d isḥaq: «giġ‑t nttan d‑sidik, gġ kullu aytmas d‑ih̬ddamn‑ns. ssdusġ‑t ula s‑imndi d‑waḍil. ma‑rad‑ak‑sul‑fkġ a‑iwi?»

³⁸ yini ɛisu i‑babas: «is a‑baba ur‑dark‑tqama ḥtta yat lbaraka? bark‑iyi ula nkki a‑baba.» ar‑ilmma‑issġuyyu ɛisu ar‑yalla.

³⁹ isawl‑d babas isḥaq yini‑as: «ra‑tzdġt ġ‑illiġ ur‑a‑iṭṭar‑unẓar n‑ignwan ula da‑ttmġay ṣṣabt n‑wakal.

⁴⁰ s‑uwzzal‑nk a‑s‑ra‑ttddrt. ra‑tgt ah̬ddam i‑gʷmak, walaynni iġ‑trit a‑tnjmt, tbbit ilmma iḥlasn‑ns zġ‑umggrḍ‑nk.»

⁴¹ iwrri ɛisu ar‑itkrhu yaɛqub bahra f‑ssibt n‑lbaraka lli‑s‑t‑ibark babas. yini ɛisu d‑ih̬f‑ns: «ġir imikk ra‑immt baba. ad‑ukan‑zrin‑uwssan n‑lɛzzat, rad‑nġġ gʷma yaɛqub.»

⁴² imma rifqa, hati tsfld f‑aylli inna yus imqqurn ɛisu, tazn ma‑d‑yaqran i‑yus imẓẓin yaɛqub tini‑as: «han gʷmak ɛisu ifjjij f‑ih̬f‑ns ašku ira a‑k‑inġ, iskr d‑ih̬f‑ns f‑a‑k‑inġ.

⁴³ ġilad a‑iwi, sfld s‑ma‑rad‑ak‑iniġ. nkr trwlt s‑dar gʷma laban ġ‑tmazirt n‑ḥaran,

⁴⁴ tqamat‑n dars kra n‑uwssan ard zrin iriyn gʷmak.

⁴⁵ iġ‑iwrri ihnna ittu ġaylli gis tskrt, ra‑n‑srk‑aznġ a‑di‑twrrit. mah̬ aylliġ ra‑yyi‑tmmtm s‑sin ġ‑yan‑wass?»

⁴⁶ tsawl rifqa i‑isḥaq tini‑as: «ha‑yyi ḥašaġ tudrt‑inu f‑ssibt n‑tmġarin‑an istis n‑ḥit. iġ‑itahl ula yaɛqub yat zġ‑istis n‑ḥit zund h̬tid, nġd kra n‑uwllt‑tmazirt‑ad, mah̬ aylliġ ra‑sul‑ddrġ?»