isizwur 26 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

lwrt lli‑s‑iqawl rbbi i‑isḥaq

¹ izri ma‑izrin s‑illa‑uġʷni išqan ġ‑tmazirt‑an, zund ġwalli‑stt‑in‑ikkan ġ‑uwssan n‑ibrahim. irḥl isḥaq s‑tmazirt n‑garar dar abimalik agllid n‑ayt‑filisṭin.

² ašku iban‑as‑d sidi rbbi yini‑as: «han a‑ur‑thuwwdt s‑miṣr, walaynni srs ġ‑tmazirt lli‑rad‑ak‑mlġ,

³ tgawrt gis, iliġ dik barkġ gik. ašku kiyi d‑wamud‑nk a‑mi‑rad‑fkġ ikalln‑ad kullutn, ssafuġ tagallit lli‑s‑ggulliġ i‑babak ibrahim.

⁴ rad‑ssigtġ amud‑nk zund itran n‑ignwan, fkġ‑asn ikalln‑ad kullutn. amud‑nk a‑s‑rad‑barkġ kullu iqbiln n‑ddunit.

⁵ ašku ibrahim isfld s‑wawal‑inu, iskr s‑kullu ma‑f‑t‑uṣṣaġ sslmdġ‑as‑t mlġ‑as‑t.»

isḥaq d‑rifqa ġ‑dar abimalik

⁶ ġmkan a‑s‑iwrri isḥaq igawr ġ‑garar.

⁷ sqsan‑t mddn n‑ġin f‑tmġart‑ns, yini‑asn: «ulltma a‑tga.» ašku iksuḍ, ur‑iri ad‑asn‑yini: «tga tamġart‑inu.» iswangm d‑ih̬f‑ns: «ayt‑tmazirt‑ad ẓḍarn a‑yyi‑nġn f‑ssibt n‑rifqa» ašku tfulki bahra ġ‑walln n‑mddn.

⁸ izri ma‑izrin ar yan‑wass, ar‑d‑itmnad abimalik lli‑igan agllid n‑ayt‑filisṭin zġ‑tarryaḥt, s‑iẓra isḥaq ar‑itlɛab d‑tmġart‑ns rifqa.

⁹ iġr‑d abimalik i‑isḥaq yini‑as: «ssnġ ġilad izd tamġart‑nk a‑tga. mah̬ aylliġ‑aġ‑tnnit tga ulltmak?» yini‑as isḥaq: «ašku swangmġ ‹a‑ur‑mmtġ f‑ssibt‑ns.› »

¹⁰ yini‑as abimalik: «ma‑iga ġayd ginġ tskrt? mra is‑ign yan ġ‑mddn‑nġ d‑tmġart‑nk lukun tiwit‑aġ‑d tagat?»

¹¹ yamr ilmma abimalik mddn‑ns kullutn yini: «wanna iggrn i‑urgaz‑ad nġd tamġart‑ns, han lmut a‑s‑ra‑immt.»

¹² iqama isḥaq ġ‑tmazirt‑an ar‑ikkrz akal, yasi ṣṣabt ġasggʷas‑an f‑miyya n‑twal, ašku ibark gis sidi rbbi.

¹³ ar‑dars‑ittigat lh̬ir aylliġ iwrri iṭṭaf ma‑iggutn.

¹⁴ ilint‑dars‑uwlli d‑imugayn d‑mddn ggutnin aylliġ wrrin ayt‑filisṭin ar‑ti‑tḥsadn.

¹⁵ kkan‑ttin ayt‑filisṭin ddan ssgln‑in una n‑waman kullutn lli‑ġzan ih̬ddamn n‑babas ibrahim, ɛmmrn‑tn‑in s‑wakal.

¹⁶ yini ilmma abimalik i‑isḥaq: «zayd itti‑n zġ‑gratnġ, ašku tugʷrt‑aġ ġilad bahra.»

¹⁷ iffuġ isḥaq ġakudan zġ‑wakal‑an, issbidd ih̬iyyamn‑ns ġ‑talat n‑garar igawr gis.

¹⁸ izayd isḥaq iġza una n‑waman lli‑yadlli‑iġza babas ibrahim, ašku ssgln‑tn‑in ayt‑filisṭin lliġ immut. ig‑asn isḥaq ismawn lli‑asn‑iga babas.

¹⁹ walaynni lliġ ġzan ih̬ddamn n‑isḥaq ġ‑talat, afn gis yat talɛint n‑waman ddrnin,

²⁰ ẓin fllas imksawn n‑garar d‑win isḥaq inin‑asn: «aman‑ad winġ ad‑gan.» ig isḥaq i‑talɛint‑an ism ‹ɛisiq› [tga lmɛna‑ns ‹ṭaẓit›], ašku ẓin dids fllas.

²¹ ġzan ilmma anu yaḍni ar‑daġ‑fllas‑tẓin, ig‑as ism ‹siṭna› [tga lmɛna‑ns ‹timiġt›].

²² ifl ġin, iġza anu yaḍni ur‑sul‑a‑fllas‑tẓin, ig‑as ism ‹raḥubut› [tga lmɛna‑ns ‹lusɛat›]. yini: «issusɛa fllanġ sidi rbbi f‑a‑nttigat ġilad ġ‑wakal.»

²³ iffuġ ilmma zġ‑ġin, yawn s‑tmdint n‑bir‑šibaɛ.

²⁴ ġ‑iḍ‑an iban‑as‑d sidi rbbi yini‑as: «nkkin a‑igan rbbi n‑babak ibrahim. ad‑ur‑tiksaḍt, ašku lliġ dik a‑gik‑barkġ, ssigtġ amud‑nk f‑ssibt n‑ibrahim ah̬ddam‑inu.»

²⁵ ibnu isḥaq yan‑ukrkur n‑tġrṣi ġin, ar‑yaqra i‑ism n‑rbbi da‑bdda‑illan. issbidd ih̬iyyamn‑ns ġ‑udġar‑an, ġzan gis ih̬ddamn‑ns yan‑wanu.

²⁶ yašk‑id ilmma dars abimalik zġ‑garar, ntta d‑aḥuzzat lli‑igan amšawar‑ns d‑fikul lli‑igan ariyas n‑inmmaġn‑ns.

²⁷ yini‑asn isḥaq: «mah̬ a‑d‑dari‑tuškam? yak tḥašam‑iyi tssmsrm‑iyi‑d zġ‑darun.»

²⁸ inin‑as: «nẓra mamnk a‑dik‑illa rbbi da‑illan, nini ġir a‑nggall i‑ngratnġ, nskr lɛhd nkkʷni dik s‑tgallit,

²⁹ f‑a‑ur‑aġ‑tḍrrut ġmklli‑ur‑k‑nḍrra. ha‑yaġ ur‑gik‑nskir abla afulki, nazn‑k s‑sslamt. ašku ambarki n‑sidi rbbi a‑tgit.»

³⁰ iskr‑asn isḥaq imnsi imqqurn ššn sun.

³¹ nkrn‑d zikk ṣbaḥ ggalln i‑ngratsn, yazn‑tn ilmma isḥaq, ddun ġ‑sslamt.

³² aškin‑d ih̬ddamn n‑isḥaq ġassan, sawln‑as f‑wanu yaḍni lli‑ġzan inin‑as: «ha‑yaġ nlkm aman.»

³³ ig i‑wanu‑an ism ‹šibaɛ› [tga lmɛna‑ns ‹tagallit›]. ar‑ttinin i‑tmdint‑an ‹bir‑šibaɛ› sul s‑ġassad.

³⁴ imma ɛisu, lliġ ikka kkuẓ id‑mraw (40) n‑usggʷas, itahl yahudit illis n‑biyri gu‑ḥit, itahl ula basimat illis n‑ilun gu‑ḥit.

³⁵ gnt ntnti wasmmum ġ‑uwl n‑isḥaq d‑rifqa.