isizwur 25 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

lmut n‑ibrahim ula timḍlt‑ns

¹ izayd ibrahim itahl yat‑tɛyyalt ism‑ns qaṭurah,

² taru‑as zimran d‑yaqšan d‑madan d‑midyan d‑išbaq d‑šuḥ.

³ tarwa n‑yaqšan gan šaba d‑dadan. tarwa n‑dadan gan ayt‑aššur d‑ayt‑laṭuš d‑ayt‑lawmm.

⁴ tarwa n‑midyan gan ɛayfa d‑ɛifr d‑ḥanuk d‑abidaɛ d‑aldaɛa. ġwid kullu gan tarwa n‑tarwa n‑qaṭurah.

⁵ ifl ibrahim kullu ma‑iṭṭaf i‑isḥaq,

⁶ imma tarwa n‑tsmgin lli‑itahl, ifka‑yasn tiwafkiw lliġ sul iddr, yazn‑tn s‑tsgiw n‑usġlay n‑tafukt issaggug‑tn‑in f‑yus isḥaq.

⁷ ġunškad ad‑gan isggʷasn n‑tudrt n‑ibrahim, ikka miyya d‑ssa n‑id‑mraw d‑smmus (175) n‑usggʷas.

⁸ immt tigira n‑uwssan ggutnin lli‑izzri ġ‑tudrt iġzzifn ifulkin. tfl‑t rruḥ‑ns lliġ imqqur bahra išbɛ ussan, ityattay s‑gr mddn‑ns lli‑zrinin.

⁹ awin‑t tarwa‑ns isḥaq d‑ismaɛil mḍln‑t‑in ġ‑ifri n‑makfila lli‑illan ġ‑igr n‑ɛifrun yus n‑ṣuḥar gu‑ḥit. illa ġ‑tsga n‑mamra lli‑iwalan asġlay n‑tafukt.

¹⁰ igr‑an, ikka‑ttin isġa‑t ibrahim ġ‑dar ayt‑ḥit, imḍl‑n gis tamġart‑ns sarah, ityawmḍal gis ula ntta.

¹¹ lliġ immut ibrahim, ibark rbbi ġ‑yus isḥaq. igawr isḥaq ġ‑tama n‑bir‑laḥay‑ruwi.

talalit n‑ɛisu d‑yaɛqub

¹⁹ ġmkad a‑tga tasut n‑isḥaq lli‑igan yus n‑ibrahim. ibrahim iga babas n‑isḥaq.

²⁰ lliġ ikka isḥaq kkuẓ id‑mraw (40) n‑usggʷas, itahl rifqa illis n‑batwil gu‑aram lli‑izdġn ġ‑uzaġar n‑aram. rifqa tga ulltmas n‑laban gu‑aram.

²¹ ar‑itẓalla isḥaq i‑sidi rbbi, ar‑as‑itḍalab f‑tmġart‑ns, ašku ur‑tẓḍar a‑trbbu. isfld sidi rbbi i‑tẓallit‑ns, tffuġ‑tmġart‑ns rifqa ar‑trbbu.

²² walaynni ar‑tmmaġn tarwa i‑ngratsn ġ‑waḥlig‑ns aylliġ a‑ttini: «mah̬ a‑yyi‑ijra ġmka?» tddu ġakudan tsqsa sidi rbbi.

²³ yini‑as‑d sidi rbbi: «snat‑tasutin a‑illan ġ‑waḥlig‑nm. sin iqbiln a‑ra‑tarut. rad‑bḍun i‑ngratsn. ra‑itjhhd yan f‑wayya. ġwalli imqqurn a‑ra‑ig ah̬ddam i‑walli imẓẓin.»

²⁴ lliġ tkmml ussan‑ns, taru ikniwn.

²⁵ ġwalli‑d‑izwurn iga azggʷaġ, d‑ilm‑ns iga kullu ššɛr zund ahiḍur, gn‑as ġakudan ism ‹ɛisu›.

²⁶ iḍfur‑t‑id gʷmas, iġwi‑d ġ‑uwurz n‑ɛisu s‑ufus‑ns, gn‑as ism ‹yaɛqub› [tga lmɛna‑ns ‹iġwi›]. lliġ‑tn‑turu, illa dar isḥaq sḍis id‑mraw (60) n‑usggʷas.

²⁷ zaydn iḥšmiyn ar‑tmqqurn. ig ɛisu angmar iḥaršn, izri ussan‑ns ġ‑tagant. imma yaɛqub iga aɛyyal ihnnan ar‑itqama ġ‑gr ih̬iyyamn.

²⁸ isḥaq babatsn, iɛzza dars ɛisu bahra, ašku ar‑ištta zġ‑tfiyi n‑tgʷmrt‑ns. imma rifqa, iɛzza dars yaɛqub.

²⁹ yan‑wass ar‑issnwa yaɛqub kra n‑tlh̬ša, ikšm‑d ɛisu zġ‑tagant inġ‑t‑id laẓ bahra.

³⁰ yini ɛisu i‑yaɛqub: «ġir fk‑iyi ad‑ššġ zġ‑uzggʷaġ‑an, hati inġa‑yyi laẓ.» mayan a‑f‑as‑gan ism ‹adum› [tga lmɛna‑ns ‹azggʷaġ›].

³¹ imma yaɛqub irur‑as: «ssnfl‑iyi srs lḥqq n‑tfh̬ddit‑nk.»

³² yini‑as ɛisu: «ha‑yyi ar‑tmmtatġ s‑laẓ, ma‑yyi‑akkʷ‑tga‑th̬fddit?»

³³ yini‑as yaɛqub: «ggall‑iyi zwar fllas.» iggall‑as fllas. ġmkan a‑s‑izznza tifh̬ddit‑ns i‑yaɛqub.

³⁴ ifk‑d ilmma yaɛqub i‑ɛisu aġrum d‑tlh̬ša n‑tniltit, išš isu inkr iddu. ɛisu ur‑igi tifh̬ddit‑ns d‑yat.