isizwur 22 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

asattuy n‑isḥaq

¹ izri ma‑izrin iqṣad rbbi a‑yarm ibrahim, isawl srs yini: «ibrahim.» yini‑as: «ha nkki.»

² yini: «nkr tawit yuk lli‑dark‑igan yan, iga‑t isḥaq da‑dark‑iɛzzan, tddut s‑uwrir lli‑rad‑ak‑mlġ ġ‑tmazirt n‑muriyah, tssattuyt‑t ġin a‑d‑yattuy.»

³ lliġ ifaw‑wass inkr ibrahim, ig aḥlas i‑uġyul‑ns, yawi dids sin iɛyyaln‑ns, yawi ula yus isḥaq. ibbi ikššuḍn ma‑s‑a‑ijddr tiġrṣi, inkr iftu s‑illi‑s‑as‑inna rbbi.

⁴ wis kraḍ‑uwssan yall ibrahim alln‑ns, iẓr‑n awrir ġ‑tuggugt.

⁵ yini ibrahim i‑iɛyyaln‑ns: «qamat ġid d‑uġyul. nkki d‑uḥšmi ra‑nddu ar‑ntsjad, nwrri‑d ilmma s‑darun.»

⁶ yasi ibrahim ikššuḍn ma‑s‑a‑ijddr tiġrṣi, isrs‑tn‑in f‑tġʷraḍ n‑yus isḥaq, yasi ġ‑ufus‑ns asafu d‑tuzzalt, ftun ntni s‑sin.

⁷ yini isḥaq i‑babas ibrahim: «wa baba.» yini‑as: «ha nkki.» yini‑as‑d: «hay‑asafu d‑ikššuḍn, walaynni manza alqqaġ ma‑ittattuyn?»

⁸ yini‑as ibrahim: «rbbi a‑ra‑d‑ifk alqqaġ ma‑ittattuyn a‑iwi.» zaydn s‑sin ftun.

⁹ lliġ ruḥn adġar lli‑s‑as‑inna rbbi, ibnu ibrahim yan‑ukrkur, issasstwa fllas ikššuḍn, ikrf yus isḥaq isrs‑t‑in f‑ukrkur ġ‑iggi n‑ikššuḍn.

¹⁰ yasi ibrahim tuzzalt, imdi‑n afus‑ns a‑iġrṣ i‑yus.

¹¹ iġr‑d lmalak n‑sidi rbbi ġakudan zġ‑ignna yini‑as: «ibrahim ibrahim.» yini‑as: «ha nkki.»

¹² yini‑as‑d: «ad‑ur‑n‑tgt afus s‑uḥšmi ula tskrt‑as kra. ssnġ ġilad is‑a‑yyi‑ttuqqart bahra, ašku ur‑flla‑tḥḍit yuk lli‑dark‑igan yan.»

¹³ yall ibrahim alln‑ns, iẓr‑n ġ‑tġurdin‑ns yan‑izimmr, ityamaẓ ġ‑waskawn ġ‑tzggʷart. iddu ibrahim yamẓ izimmr, iġrṣ‑as issattuy‑t a‑n‑yattuy ġ‑usnfl n‑yus.

¹⁴ ig ibrahim ism i‑udġar‑an ‹yahwah‑yirah› [tga lmɛna‑ns ‹sidi rbbi ra‑d‑yawi›], ġmklli‑s‑a‑ttinin mddn sul s‑ġassad: «f‑uwrir n‑sidi rbbi a‑f‑ra‑d‑yawi.»

¹⁵ iġr‑d lmalak n‑sidi rbbi i‑ibrahim tis snat‑twal zġ‑ignna yini‑as:

¹⁶ «ha‑yyi ggulliġ‑ak ġilad s‑ism‑inu da‑igan ‹wad bdda illan›, iniġ‑ak f‑ssibt n‑mayd tskrt, lliġ ur‑flla‑tḥḍit yuk lli‑dark‑igan yan,

¹⁷ ra‑k‑barkġ s‑lbaraka iggutn, ssigtġ amud‑nk zund itran n‑ignwan, ula zund amlal n‑tama n‑umda. ra‑inru‑wamud‑nk kullu inuwwašn‑ns.

¹⁸ amud‑nk a‑s‑rad‑barkġ kullu iqbiln n‑ddunit, ašku tskrt s‑wawal‑inu.»

¹⁹ iwrri‑d ilmma ibrahim s‑dar iɛyyaln‑ns, nkrn ddun kullu s‑bir‑šibaɛ. igawr ibrahim ġ‑bir‑šibaɛ.

²⁰ izri ma izrin isfld ibrahim f‑gʷmas naḥur is‑as‑turu milka tarwa.

²¹ ifh̬ddi iga ism‑ns ɛuṣ, ig gʷmas buz. yili ula qamwil lli‑iwrrin ig babas n‑aram.

²² yili kasad d‑ḥazu d‑fildaš d‑idlaf d‑batwil.

²³ iwrri batwil yaru rifqa. tam tarwa‑yad a‑turu milka i‑naḥur gʷmas n‑ibrahim.

²⁴ ula tismgt lli‑itahl naḥur, iga ism‑ns rawma, turu‑as ṭabaḥ d‑jaḥam d‑taḥaš d‑maɛka.