isizwur 21 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

talalit n‑isḥaq

¹ izri ma‑izrin issafu sidi rbbi awal‑ns, ibark sarah iskr‑as ġmklli‑s‑inna.

² tffuġ ar‑trbbu, taru yan‑warraw i‑ibrahim ġakud lliġ yuwssr, ġ‑tizi lli‑as‑imla rbbi.

³ ig ibrahim ism ‹isḥaq› i‑yus lli‑as‑turu sarah.

⁴ iskr ibrahim taẓallit n‑ddat i‑yus isḥaq ġ‑wis tam‑uwssan‑ns, ġmklli‑t‑yuṣṣa rbbi.

⁵ ikka ibrahim miyya n‑usggʷas lliġ‑dars‑ilul yus isḥaq.

⁶ tini sarah: «ifka‑yyi rbbi ad‑ḍṣṣaġ. kullu wanna flla isfldn ra‑didi‑iḍṣṣa.»

⁷ tzayd tini: «han ur‑illi ma‑iẓḍarn a‑yini i‑ibrahim ‹ha sarah ra‑tssngay tarwa.› imma ġilad ha‑yyi uruġ‑as arraw ġ‑twssrt‑ns.»

rbbi iɛawn hagar d‑ismaɛil

⁸ ar‑d‑ittimġur‑warraw, kksn‑as ilmma tibbišt. iskr ibrahim imnsi imqqurn ġ‑wass‑an ġ‑as‑kkisn tibbišt.

⁹ imma sarah tẓra arraw lli‑turu hagar ullt‑miṣr i‑ibrahim, ar‑iḍṣṣa ġ‑yus isḥaq,

¹⁰ tini i‑ibrahim: «ssufġ tismgt‑ad nttat d‑yus, ašku yus n‑tsmgt ur‑ra‑iwrt d‑iwi isḥaq.»

¹¹ ibrahim ṭiyr‑as bahra f‑wawal‑ad f‑ssibt n‑yus.

¹² imma rbbi inna i‑ibrahim: «ad‑ak‑ur‑ṭiyr f‑ssibt n‑uḥšmi ula f‑ssibt n‑tsmgt‑nk. kra‑s‑ak‑tnna sarah, sfld srs. ašku isḥaq a‑zġ‑rad‑ak‑yili‑wamud‑nk.

¹³ imma yus n‑tsmgt, ra‑zġ‑gis‑skrġ aqbil, ašku arraw‑nk a‑iga.»

¹⁴ zikk ṣbaḥ inkr ibrahim, yawi‑d aġrum ifk‑t i‑hagar, yawi‑d tayddidt n‑waman isrs‑tt‑in f‑tġruṭṭ‑ns, issufġ‑tt nttat d‑uḥšmi. tftu ar‑ttlulliy ġ‑lh̬la n‑bir‑šibaɛ.

¹⁵ lliġ tmman‑waman n‑tayddidt, tfl aḥšmi ġ‑ddu yat‑tṣġart,

¹⁶ tftu taggug‑n fllas ma‑itggan miyya n‑uẓmmuẓẓl tskiws tini: «a‑ur‑tmnadġ aḥšmi ar‑itmmtat.» tqama ġmkan ġ‑tuggugt ar‑talla ar‑tssġuyyu.

¹⁷ imma rbbi isfld i‑tġuya n‑uḥšmi. iġr‑d lmalak n‑rbbi zġ‑ignwan s‑hagar yini‑as: «ma‑km‑yaġn a‑hagar? ad‑ur‑tiksaḍt, ašku rbbi isfld i‑tġuya n‑uḥšmi ġ‑illiġ illa.

¹⁸ nkr tssbiddt aḥšmi, tamẓt‑as ġ‑ufus, ašku ra‑zġ‑gis‑skrġ yan‑uqbil imqqurn.»

¹⁹ irẓm rbbi alln n‑hagar ġakudan, tẓr‑n yan‑wanu n‑waman. tddu tɛmmr‑d tayddidt s‑waman, tfk i‑uḥšmi a‑issu.

²⁰ aḥšmi‑an, illa dids rbbi ar‑ittimġur. iqama ntta ġ‑lh̬la, iwrri iga angmar iḥaršn s‑lqus.

²¹ lliġ igawr ġ‑lh̬la n‑faran, tawi‑as‑d innas yat‑tslit zġ‑tmazirt n‑miṣr.

ggullan ibrahim d‑abimalik

²² izri ma‑izrin s‑d‑yuška abimalik, nttan d‑fikul lli‑igan ariyas n‑inmmaġn‑ns, sawln s‑ibrahim inin‑as: «iban‑aġ is‑dik‑illa rbbi ġ‑kullu ma‑tskart.

²³ ggall‑iyi ġilad ġ‑umnid n‑rbbi ur‑sar‑iyi‑ttġḍart ula tġḍrt tarwa‑nu ula tarwa‑nsn. ġmklli‑bdda‑srk‑tfulkiġ ad‑bdda‑sri‑ttfulkit, nkki d‑tmazirt‑ad ġ‑tgawrt.»

²⁴ yini‑as ibrahim: «ha‑yyi ggulliġ.»

²⁵ yaštkka ilmma ibrahim f‑abimalik f‑ssibt n‑yan‑wanu n‑waman, ašku kkisn‑as‑t ih̬ddamn n‑abimalik.

²⁶ yini‑as abimalik: «ur‑ssinġ manwa iskrn ġayan. ur‑iyi‑srs‑tɛlmt d‑ur‑fllas‑sfldġ ar ġila.»

²⁷ yawi‑d ibrahim kra n‑uwlli d‑imugayn ifk‑tn i‑abimalik, skrn lɛhd i‑ngratsn.

²⁸ iẓli ibrahim zġ‑gr‑uwlli‑ns ssa n‑tlqqaġin waḥdutnt.

²⁹ isqsa‑t abimalik: «mad‑gant ssa n‑tlqqaġin‑ad lli‑tẓlit waḥdutnt?»

³⁰ yini‑as ibrahim: «a‑tawit kiyi ssa n‑tlqqaġin‑ad zġ‑ufus‑inu, f‑ad‑gnt tuggʷa n‑izd nkkin a‑iġzan anu‑ad.»

³¹ gn ism ‹bir‑šibaɛ› ġakudan i‑udġar‑an [tga lmɛna‑ns ‹anu n‑ssa› nġd ‹anu n‑tgallit›], ašku ġin a‑ġ‑ggullan s‑sin.

³² lliġ skrn lɛhd ġ‑bir‑šibaɛ, inkr abimalik d‑fikul lli‑igan ariyas n‑inmmaġn‑ns, wrrin s‑tmazirt n‑ayt‑filisṭin.

³³ iẓẓu ibrahim yat‑tṣġart n‑tammayt ġ‑bir‑šibaɛ, ar‑yaqra ġin i‑ism n‑rbbi da‑bdda‑illan, ig wad izgan idum.

³⁴ igawr ibrahim ġ‑tmazirt n‑ayt‑filisṭin ussan ggutnin.