isizwur 20 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ibrahim d‑sarah ġ‑dar abimalik

¹ iffuġ ibrahim zġ‑ġin, imuddu s‑lh̬la n‑nagab, igawr ġ‑gr qadaš d‑šur. ik kra ġ‑tmdint n‑garar

² yini‑asn ibrahim f‑tmġart‑ns sarah «hatti ulltma a‑tga.» yazn‑d abimalik lli‑igan agllid n‑garar ma‑d‑itawin sarah.

³ iban‑d rbbi ġ‑iḍ‑an i‑abimalik ġ‑twargit yini‑as: «han ra‑tmmtt, ašku h̬talli tiwit, tga tamġart n‑wayya.»

⁴ imma abimalik ur‑ta‑stt‑ilkim, yini ġakudan: «wa rbbi, is‑ra‑thlkt mddn lli‑ur‑iskirn kra yʷh̬šnn?

⁵ is‑urd nttan ad‑iyi‑innan tga ulltma? is‑urd nttat a‑innan ‹iga gʷma›? ha‑yyi s‑uwl iṣfan d‑ifassn ġusnin a‑s‑skrġ mayad.»

⁶ yini‑as rbbi ġakudan ġ‑twargit: «ssnġ izd ul iṣfan a‑s‑ti‑tskrt. ḥṣarġ‑k nnit a‑ur‑tskrt kra n‑lɛib ġ‑umnid‑inu. ur‑k‑udjiġ a‑n‑srs‑tgt afus.

⁷ ġilad rar tamġart i‑urgaz‑ns. han ntta nnabi a‑iga, ra‑fllak‑iẓẓall a‑sul‑tddrt. walaynni iġ‑ur‑tti‑trurt, nniġ‑ak s‑ṣṣaḥt ra‑tmmtt kiyi ula kullu mddn‑nk.»

⁸ zikk ṣbaḥ inkr abimalik, iġr‑d i‑imġarn‑ns s‑dars, iɛawd‑asn f‑kullu mayan, wrrin iksaḍn bahra.

⁹ iġr‑d abimalik i‑ibrahim ġakudan s‑dars yini‑as: «ma‑iga ġayd‑aġ‑tskrt? is‑fllak‑ttɛddaġ aylliġ‑iyi‑tšškšmt nkki d‑tgldit‑inu s‑lɛib‑ad yʷh̬šnn? han tskrt ġaylli‑s‑ur‑ih̬ṣṣa yan a‑t‑iskr.»

¹⁰ yini abimalik i‑ibrahim: «ma‑ġ‑tswangmt aylliġ tskrt ġmka?»

¹¹ yini‑as ibrahim: «ašku nniġ d‑ih̬f‑inu ‹mddn ġ‑tmazirt‑ad ur‑a‑tiksaḍn rbbi. ra‑yyi‑nġn awin tamġart‑inu.›

¹² d‑nttat s‑ṣṣaḥt ulltma a‑tga, ašku tga illis n‑baba, wah̬h̬a ur‑tgi illis n‑inna, iwiġ‑tt a‑tg tamġart‑inu.

¹³ ġakud lliġ‑iyi‑d‑issufġ rbbi zġ‑gr ayt‑takat n‑baba f‑ad‑tlulliyġ ġ‑ddunit iniġ‑as: ‹afulki‑ad a‑ra‑yyi‑tskart. kullu mani ntkka tinit flla: iga gʷma.› »

¹⁴ yawi‑d abimalik ġakudan ulli d‑imugayn d‑ismgan d‑tsmgin ifk‑tn i‑ibrahim, irar‑as‑d tamġart‑ns sarah.

¹⁵ izayd abimalik yini‑as: «ha tamazirt‑inu ġ‑lgddam‑nk. inna‑k‑iɛjbn, tzdġt gis.»

¹⁶ yini i‑sarah: «ha‑yyi fkiġ i‑gʷmam alf n‑uqarid n‑nnʷqrt f‑ad‑gn tamatart n‑is‑tbrrat zġ‑kullu kra igan lɛib, issann mddn‑nm ula wiyyaḍ kullutn is‑ur‑darm yat flla.»

¹⁷ iẓẓall ibrahim ġakudan ar‑itḍalab rbbi, s‑ijjuji rbbi abimalik, ijjuji tamġart n‑abimalik ula tismgin‑ns aylliġ wrrint ar‑tarunt.

¹⁸ ašku ikka‑ttin sidi rbbi iqqn iḥlgan n‑ist‑tgmmi n‑abimalik f‑ssibt n‑sarah tamġart n‑ibrahim.