isizwur 2 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

rbbi iskr argaz d‑tmġart

¹ ġmkan ad‑kmmln ignwan d‑wakal ula kullu ma‑gisn‑illan.

² isunfu rbbi ġ‑wis ssa‑uwssan ašku ikmml tawuri lli‑iskr.

³ ibark rbbi wis ssa‑uwssan iẓli‑t zġ‑uwssan yaḍni, ašku isunfa gis zġ‑twuri lli‑ġ‑ih̬lq kullu ma‑illan.

⁴ ġmkad a‑iga isizwur n‑ignwan d‑wakal ġakud lliġ‑tn‑ih̬lq rbbi. lliġ iskr sidi rbbi akal d‑ignwan,

⁵ ur‑ta‑tlli‑tzgzut ġ‑lh̬la ula tmġi tuga, ašku sidi rbbi ur‑ta‑d‑yuzn anẓar s‑wakal, d‑ur‑ta‑illi ma‑t‑ikkrzn,

⁶ walaynni ar‑d‑aqlayn‑waman zġ‑ddu‑wakal ar‑sswan akal kullut.

⁷ yasi ilmma sidi rbbi kra zġ‑ugdrur n‑wakal iskr zġ‑gis argaz, issunfs‑n ġ‑infurn n‑urgaz s‑rruḥ n‑tudrt, iwrri iddr.

⁸ ikka‑ttin iẓẓa sidi rbbi yat talɛrṣt ġ‑tmazirt n‑ɛadan ġ‑tsga n‑usġlay n‑tafukt, ig gis argaz lli‑iskr.

⁹ issmġi‑d sidi rbbi kullu ma‑igan aṣġar ifulkin ġ‑iẓri ula i‑umššu. tili‑gis‑tṣġart n‑tudrt ġ‑tuẓẓunt n‑talɛrṣt, nttat d‑tṣġart n‑twassna n‑ma‑ifulkin ula ma‑yʷh̬šnn.

¹⁰ yili yan‑wasif ingi‑n ġ‑tmazirt n‑ɛadan ar‑isswa talɛrṣt. ibḍu gis f‑kkuẓ isaffn.

¹¹ amzwaru iga asif n‑fišun, ilulliy i‑kullu‑tmazirt n‑ḥawila lli‑ġ‑illa‑uwrġ.

¹² ifulki‑uwrġ lli‑illan ġ‑tmazirt‑an, ilint gis ula tujjutin mimnin d‑tẓratin ġʷlanin.

¹³ wis sin iga asif n‑giḥun, ilulliy i‑kullu‑tmazirt n‑ḥabaš.

¹⁴ wis kraḍ iga asif n‑ḥiddaql, ikka tamazirt n‑aššur ġ‑tsga n‑usġlay n‑tafukt. d‑wis kkuẓ iga asif n‑furat.

¹⁵ yawi ilmma sidi rbbi argaz ig‑t ġ‑talɛrṣt n‑ɛadan a‑stt‑ikkrz igabl‑tt.

¹⁶ yuṣṣa‑t sidi rbbi yini‑as: «a‑tšttat aynna trit zġ‑kullu tiṣġarin n‑talɛrṣt

¹⁷ abla taṣġart n‑twassna n‑ma‑ifulkin ula ma‑yʷh̬šnn. a‑ur‑zġ‑gis‑tššt nttat, ašku ass nna‑zġ‑gis‑tššit, lmut a‑k‑id‑iqqann.»

¹⁸ yini sidi rbbi: «ur‑ifulki a‑iqama‑urgaz waḥdut. rad‑as‑skrġ ma‑d‑dids‑yuškan a‑t‑iɛawn»

¹⁹ iskr sidi rbbi ġ‑wakal kullu ma‑igan luḥuš n‑tagant d‑igḍaḍ n‑ignwan. yawi‑tn‑d s‑dar‑urgaz, a‑iẓr man ism a‑ra‑ig i‑kraygatt yan ġ‑lmh̬luqat‑an ddrnin. d‑ism nna‑ysn‑iga‑urgaz i‑kud yan, ġmkan a‑iqama ism‑ns.

²⁰ ig‑urgaz ism i‑kullu lbhaym d‑igḍaḍ n‑ignwan d‑luḥuš n‑tagant, walaynni ur‑gisn‑ityafa ma‑d‑yuškan d‑urgaz a‑t‑itɛawan.

²¹ izzugz ilmma sidi rbbi iṭs iẓẓayn f‑urgaz. lliġ iṭṭas ikks yan zġ‑iġzdisn‑ns, irar aggas n‑ddat‑ns s‑tfiyi.

²² aġzdis lli‑ikkis sidi rbbi i‑urgaz, iskr zġ‑gis tamġart, yawi‑tt‑id s‑dars.

²³ yini‑urgaz ġakudan: «h̬tad ġila tga ih̬ṣ zġ‑ih̬ṣan‑inu, tg tifiyi zġ‑tfiyi‑nu. rad‑as‑ttiniġ ‹tawtmt› ašku ttyawkkas zġ‑uwtm.»

²⁴ mayan a‑f‑ra‑ifl‑urgaz babas d‑innas imun d‑tmġart‑ns. hatni sin rad‑wrrin gn yat ddat.

²⁵ ġakudan argaz d‑tmġart‑ns ur‑lsin yat, walaynni ur‑a‑tn‑issḥššam mayan.