isizwur 19 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

afukku n‑luṭ zġ‑sadum

¹ tadggʷat‑an lkmn‑in sin lmlayka‑lli s‑sadum. han luṭ iskiws ġ‑imi n‑tmdint. lliġ‑tn‑iẓra, inkr a‑tn‑in‑imnaggar, iknu s‑wakal

² yini: «wa id‑sidi, ġir aškat‑d s‑tgmmi n‑uh̬ddam‑nun, a‑gis‑tsirdm iḍarn‑nun, tnsm ar zikk ṣbaḥ, tkmmlm ilmma f‑uġaras‑nun.» inin‑as: «uhu, ra‑nns ġ‑usays.»

³ izayd luṭ iḍalb‑tn bahra, munn ilmma dids s‑tgmmi. iskr‑asn imnsi imqqurn, issnu‑asn‑d arh̬ṣiṣ ar‑šttan.

⁴ imikk ur‑ta‑ginn inbgiwn, munn‑d kullu irgazn n‑tmdint, kullu irgazn n‑sadum, zġ‑wad imqqurn ar wad imẓẓin, sutln kullu i‑tgmmi,

⁵ ar‑aqran i‑luṭ inin‑as: «manza irgazn‑an dark igguzn ġ‑iḍ‑ad? awi‑tn‑d a‑didsn‑ngn.»

⁶ iffuġ luṭ s‑dar ayt‑sadum‑lli, iqqn‑n tiflut n‑tgmmi tiġurdin‑ns,

⁷ yini‑asn: «way‑aytma, ġir ad‑ur‑tskrm wan lɛib‑ad.

⁸ ha dari snat isti, ur‑jji‑tnt‑d‑ikki kra n‑urgaz. rad‑awn‑tnt‑d‑ssufġġ, tskrm gisnt mknna tram. walaynni irgazn‑ad dari illan, ad‑ur‑asn‑tskrm yat ašku inbgiwn ad‑gan ġ‑tgmmi‑nu.»

⁹ rarn‑as‑d: «itti‑n fllanġ.» inin: «ġwad iga darnġ ġir abrrani, yiri ġilad a‑ginġ‑itḥkam. rad‑ak‑nskr ġilad ma‑iɛibn uggʷar n‑irgazn‑an.» ar‑kullu‑dḥḥin luṭ aylliġ rad‑rẓn tiflut.

¹⁰ imma inbgiwn mdin‑in ifassn‑nsn ġakudan, ldin‑d luṭ s‑ugʷns n‑tgmmi, rgln‑d tiflut,

¹¹ ssbukḍn kullu irgazn lli‑illan dar imi n‑tgmmi, zġ‑wad imẓẓin ar wad imqqurn, gammin ad‑sul‑afn tiflut.

¹² sin irgazn‑lli sqsan luṭ: «is‑llan kra n‑ayt‑dark yaḍni ġ‑tmdint, iḍulan‑nk nġd tarwa‑nk nġd istik nġd kra n‑tawjja yaḍni? ssufġ‑tn zġ‑tmdint‑ad.

¹³ han ra‑nhlk tamdint‑ad, ašku isfld sidi rbbi i‑tġuya n‑mddn ar‑bahra‑ssmummuyn s‑ayt‑sadum. yuzn‑aġ‑d ġilad a‑stt‑nhlk.»

¹⁴ iffuġ luṭ ġakudan isawl s‑iḍulan‑ns lli‑ra‑itahl istis yini‑asn: «nkrat tffuġm zġ‑ġid, ašku sidi rbbi ġilad ra‑ihlk tamdint‑ad.» imma ntni ġaln izd ġir taḍṣa a‑s‑t‑inna.

¹⁵ lliġ‑d‑iġli‑wass inin lmlayka i‑luṭ: «ḥarru tawit tamġart‑nk d‑snat istik‑ad, a‑ur‑tmmtm s‑lɛqubit lli‑ra‑iḍr f‑tmdint‑ad.»

¹⁶ imma ntta sul imaṭl. amẓn‑t‑id irgazn ġakudan zġ‑ufus‑ns, d‑ufus n‑tmġart‑ns d‑ufus n‑istis, ašku irḥm‑t sidi rbbi. ssufġn‑tn zġ‑tmdint awin‑tn s‑brra.

¹⁷ lliġ‑tn‑ssufġn lmlayka yini‑asn yan gisn: «rwlat tjjnjmm tudrt‑nun. a‑ur‑tmnadm s‑tġurdin ula tbiddm ard‑n‑taggugm zġ‑uzaġar. rwlat s‑iwrar a‑ur‑thlkm.»

¹⁸ imma luṭ irur‑asn: «uhu a‑id‑sidi.

¹⁹ ssnġ is‑trḍam f‑uh̬ddam‑nun, tskrm‑iyi lh̬ir iggutn tfukkam tudrt‑inu, walaynni ur‑ẓḍarġ ad‑rwlġ s‑iwrar, a‑ur‑imil izri flla lhalak mmtġ ġ‑uġaras.

²⁰ han tamdint‑an yaḍni takmur‑d a‑srs‑rwlġ. tamdint imẓẓin a‑tga. ġir adjat‑iyi a‑srs‑rwlġ ašku ġir tmẓẓi, jjnjmġ gis tudrt‑inu.»

²¹ yini‑as: «rad‑fllak‑rḍuġ ula s‑mayad, ur‑rad‑hlkġ tamdint lli‑s‑tnnit.

²² walaynni ḥarru trwlt srs, ašku ur‑ẓḍarġ ad‑skrġ kra ard‑stti‑tlkmt.» mayan a‑f‑a‑ttinin i‑tmdint‑an ‹ṣuɛar› [tga lmɛna‑ns ‹tmẓẓi›].

sidi rbbi ihlk sadum s‑lɛafiyt

²³ tġli‑d‑tafukt lliġ iruḥ luṭ tamdint n‑ṣuɛar.

²⁴ izzugz‑d sidi rbbi ġakudan iẓilliḍ n‑lkʷbrit d‑lɛafiyt f‑sadum ula f‑ɛamura zġ‑ignwan.

²⁵ ihlk timdinin‑an ula kullu ma‑gisnt‑izdġn, ihlk azaġar ula kullu ma‑d‑imġin ġ‑wakal.

²⁶ walaynni tamġart n‑luṭ tmnad‑n tiġurdin, twrri tg ifir n‑tisnt.

²⁷ zikk ṣbaḥ iddu ibrahim s‑illiġ‑ttin‑ikka ibidd ġ‑lgddam n‑sidi rbbi.

²⁸ issmaqql‑n s‑tsga n‑sadum d‑ɛamura ula s‑tsga n‑uzaġar kullut, iẓr‑n awwu iġli‑d zġ‑wakal‑an s‑lkušt imqqurn.

²⁹ imma rbbi, ġakud lliġ ihlk timdinin n‑uzaġar, iswangm ġ‑ibrahim, ijjnjm‑d luṭ zġ‑lhalak lli‑s‑ihlk timdinin lli‑ġ‑izdġ luṭ.

luṭ d‑snat istis

³⁰ iffuġ luṭ ġakudan zġ‑tmdint n‑ṣuɛar, iddu s‑iwrar ntta d‑snat istis, ašku iksuḍ ur‑iẓḍar a‑izdġ ġ‑ṣuɛar. ġmkan a‑f‑idda izdġ d‑snat istis ġ‑yan ifri.

³¹ imikk tini‑tfh̬ddit i‑ṭayyaḍ: «babatnġ hati yuwssr. ur‑sul‑illi kra n‑urgaz ġ‑ddunit mad‑aġ‑itawin a‑nskr tarwa ġmklli kullu skarn mddn.

³² ẓr a‑nfk i‑babatnġ a‑isu aman n‑waḍil iktin, ngn dids, nili dids tarwa f‑a‑idum‑wamud n‑babatnġ.»

³³ ġ‑iḍ‑an awint‑as‑d aman n‑waḍil iktin, tkšm‑tfh̬ddit tgn d‑babas, d‑nttan ur‑issin managu tgn ula managu tnkr.

³⁴ ndid azkka tini‑tfh̬ddit i‑uwlltmas: «gnġ nkki d‑baba igḍam. ẓr ad‑as‑daġ‑nfk a‑isu ġ‑iḍ‑ad, tgnt dids ula kmmi ad‑dids‑nili tarwa f‑a‑idum‑wamud‑ns.»

³⁵ ġ‑iḍ‑an daġ awint‑as‑d aman n‑waḍil iktin, tkšm ula h̬talli imẓẓin tgn dids, ur‑issin managu tgn ula managu tnkr.

³⁶ ġmkan a‑s‑wrrint ar‑rbbunt istis n‑luṭ zġ‑babatsnt.

³⁷ taru‑tfh̬ddit arraw tg‑as ism ‹muwab›, ig nttan babas n‑uqbil n‑ayt‑muwab sul s‑ġassad.

³⁸ taru h̬talli imẓẓin yan‑warraw ula nttat, tg‑as ism ‹bn‑ɛammi›, ig nttan babas n‑uqbil n‑ayt‑ɛammun sul s‑ġassad.