isizwur 17 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

lɛhd lli‑iskr rbbi d‑abram

¹ lliġ ilkm abram ṭẓa n‑id‑mraw d‑ṭẓa (99) n‑usggʷas, iban‑as‑d sidi rbbi yini‑as: «nkki giġ rbbi da‑iẓḍarn i‑kulši. mun bdda didi, tgt wad ikmmln,

² ašku rad‑skrġ lɛhd ġ‑griyi dik, ssigatġ amud‑nk bahra.»

³ iknu abram ar akal. izayd rbbi yini‑as:

⁴ «ġmkad a‑iga lɛhd lli‑rad‑dik‑skrġ. ra‑tgt babas n‑iqbiln ggutnin.

⁵ ur‑sul‑ra‑ig ism‑nk abram [tga lmɛna‑ns ‹baba imqqurn›]. walaynni ra‑ig ism‑nk ibrahim [tga lmɛna‑ns ‹babas n‑mddn ggutnin›], ašku ra‑k‑gġ d‑babatsn n‑iqbiln ggutnin.

⁶ rad‑bahra‑ssigtġ amud‑nk ard ig iqbiln, ġlin zġ‑gisn igldan.

⁷ rad‑zzgaġ lɛhd ġ‑griyi dik ula kullu tasutin n‑tarwa‑nk tigira‑nk. lɛhd idumn a‑rad‑skrġ baš ad‑gġ rbbi‑nk, gġ rbbi n‑wamud‑nk tigira‑nk.

⁸ akal‑ad ġ‑a‑ttlulliyt, rad‑ak‑t‑fkġ kiyi ula amud‑nk tigira‑nk. akal‑ad n‑kanɛan kullut, ra‑t‑ṭṭafn kullu mayd iftan, gġ nkki rbbi‑nsn.»

⁹ izayd rbbi yini i‑ibrahim: «illa fllak a‑tzzgat lɛhd‑ad, kiyi ula kullu tasutin n‑tarwa‑nk tigira‑nk.

¹⁰ ġmkad a‑tga‑tmatart n‑lɛhd ġ‑griyi dik ula amud‑nk tigira‑nk.

^11-12 ra‑tskarm taẓallit n‑ddat i‑kraygatt awtm ġ‑gratun, tbbim ilmš i‑kraygatt azzan ġ‑wis‑tam‑uwssan‑ns.

¹³ kullu mayd iftan ra‑ttẓallam i‑iwtman kullutn, gn‑iyt ġwilli iluln ġ‑ih̬iyyamn‑nun ula willi‑di‑tsġam zġ‑dar mddn iġribn lli‑ur‑igin zġ‑wamud‑nk. ġmkad a‑ra‑tzzgam lɛhd ġ‑griyi didun, tissanm izd lɛhd idumn a‑iga.

¹⁴ awtm nna‑ur‑izrin ġ‑tẓallit n‑ubbay n‑ilmš‑ns, ra‑ingara d‑mddn‑inu, ašku ur‑izga ġ‑lɛhd ngriyi dik.»

awal n‑rbbi f‑warraw n‑saray

¹⁵ yini daġ rbbi i‑ibrahim: «tamġart‑nk saray, ur‑sul‑rad‑as‑ttinit s‑ism saray [tga lmɛna‑ns ‹h̬talli immaġn›]. ra‑ig ism‑ns sarah [tga lmɛna‑ns ‹illis n‑ugllid›].

¹⁶ ra‑stt‑barkġ, fkġ‑ak dids yan‑warraw. ra‑stt‑barkġ a‑twrri tg nttat innas n‑iqbiln. rad‑ġlin igldan zġ‑gr tarwa n‑tarwa‑ns.»

¹⁷ iknu ibrahim ar akal, imikk ar‑iḍṣṣa yini d‑ih̬f‑ns: «is‑ra‑sul‑yaru yan ikkan miyya n‑usggʷas? is‑ra‑sul‑taru sarah d‑nttat tzri ṭẓa n‑id‑mraw (90) n‑usggʷas?»

¹⁸ yall ibrahim awal‑ns i‑rbbi yini: «mra is‑ufiġ a‑trḍut f‑ismaɛil.»

¹⁹ irar‑as‑d rbbi: «uhu, tamġart‑nk sarah a‑rad‑ak‑yaru yan‑warraw, tgt‑as ism isḥaq [tga lmɛna‑ns ‹ar‑iḍṣṣa›]. rad‑zzgaġ lɛhd ġ‑griyi dids ula amud‑ns tigira‑ns. ra‑ig lɛhd idumn.

²⁰ imma ismaɛil, sfldġ i‑ma‑fllas‑tḍalbt. ra‑t‑barkġ ula nttan, ssigtġ‑as tarwa‑ns bahra. ra‑ig babas n‑sin d‑mraw (12) n‑umġar, skrġ zġ‑gis yan‑uqbil imqqurn.

²¹ walaynni lɛhd‑inu ra‑t‑zzgaġ d‑isḥaq lli‑rad‑ak‑taru sarah ġasggʷas‑ad‑d‑yuškan ġ‑uzmz‑ad.»

²² ġmkan a‑s‑isawl rbbi d‑ibrahim, yattuy ilmma fllas.

²³ yawi ibrahim yus ismaɛil, yawi ih̬ddamn kullutn, ġwilli iluln ġ‑ih̬iyyamn n‑mddn‑ns ula ġwilli‑d‑isġa, iẓẓall‑asn kullutn, ibbi‑asn ilmš ġassan ġmklli‑s‑as‑inna rbbi.

²⁴ ibrahim, ṭẓa n‑id‑mraw d‑ṭẓa (99) n‑usggʷas ad‑dars‑illan lliġ izri ġ‑tẓallit n‑ddat‑ns.

²⁵ yus ismaɛil, kraḍ d‑mraw (13) n‑usggʷas ad‑dars‑illan.

²⁶ ġassan a‑ġ‑iẓẓulla ibrahim d‑yus ismaɛil,

²⁷ ntni d‑iwtman kullutn, ġwilli iluln ġ‑ih̬iyyamn‑ns ula ġwilli‑d‑isġa zġ‑dar mddn iġribn lli‑ur‑igin zġ‑wamud‑ns.