isizwur 16 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

saray d‑hagar

¹ saray tamġart n‑abram ur‑jji‑as‑turu kra n‑warraw. tlla dars yat‑tsmgt ullt‑miṣr, ism‑ns hagar.

² tsawl saray s‑abram tini‑as: «sidi rbbi ur‑iyi‑yudji ad‑aruġ. zayd tkšmt f‑tsmgt‑inu a‑ur‑imil ṭṭafġ tarwa zġ‑gis.» isfld abram s‑wawal n‑tmġart‑ns saray.

³ ġakud lli‑ġ‑ikka abram mraw isggʷasn ġ‑tmazirt n‑kanɛan a‑ġ‑as‑tfka saray tismgt‑ns hagar ullt‑miṣr ad‑as‑tg tamġart.

⁴ ikšm fllas abram tffuġ ar‑trbbu. lliġ tẓra hagar ih̬f‑ns ar‑trbbu, twrri tḥgr lallas.

⁵ tsawl saray ġakudan s‑abram tini‑as: «ad‑fllak‑yili lbaḍl‑ad dari illan. fkiġ‑ak tismgt‑inu ġ‑gr ifassn‑nk, imma ġilad ġ‑a‑trbbu, ur‑sul‑iyi‑tgi d‑yat. aḥḥ‑inu, a‑iḥkam sidi rbbi ġ‑griyi dik.»

⁶ irar‑as abram: «han tismgt‑nm ġ‑ufus‑nm. skr‑as aynna ifulkin ġ‑iẓri‑nm.» tddu saray ġakudan ar‑ttšqu bahra d‑hagar aylliġ trwl nttat zġ‑dars.

⁷ yaf‑tt‑in lmalak n‑sidi rbbi ġ‑dar yat talɛint ġ‑lh̬la, ġ‑tama n‑uġaras lli‑itawin s‑šur.

⁸ yini‑as: «wa hagar tismgt n‑saray, mani‑di‑tkkit ula mani trit?» tini‑as: «rwlġ‑d zġ‑lalla saray.»

⁹ yini‑as lmalak n‑sidi rbbi: «wrri s‑dar lallam, tknut ġ‑ddu‑ufus‑ns.»

¹⁰ izayd lmalak n‑sidi rbbi ġakudan yini‑as: «rad‑ssigtġ amud‑nm uggʷar n‑ma‑mi‑iẓḍar bnadm a‑t‑iḥasb.»

¹¹ yini‑as daġ lmalak n‑sidi rbbi: «ha kmmi ar‑trbbut, ra‑tarut yan‑warraw, tgt‑as ism ismaɛil [tga lmɛna‑ns ‹rbbi isfld›], ašku isfld rbbi sidim i‑usmammi‑nm.

¹² ra‑ig yum wad itazzaln zund aġyul n‑lh̬la. ra‑ikkat kud yan d‑ra‑t‑ikkat kud yan. ra‑ingara d‑kullu aytmas yaggug fllasn.»

¹³ tg ism ġakudan i‑sidi rbbi lli‑srs‑isawln, tini‑as ‹rbbi lli‑yyi‑iẓran›, ašku tnna d‑ih̬f‑ns: «hati ẓriġ ġid walli‑yyi‑igabln.»

¹⁴ ar‑sul‑ttinin mddn i‑wanu‑an ‹bir‑laḥay‑ruwi› [tga lmɛna‑ns ‹anu n‑walli iddrn iẓr‑iyi›]. illa ġ‑gr qadaš d‑barad.

¹⁵ taru hagar arraw i‑abram, ig‑as ism ismaɛil.

¹⁶ abram illa dars tam id‑mraw d‑sḍis (86) n‑usggʷas lliġ‑as‑turu hagar ismaɛil.