isizwur 15 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

lwrt lli‑s‑iqawl rbbi i‑abram

¹ tigira n‑mayan yašk‑id‑wawal n‑sidi rbbi i‑abram ġ‑twaẓrit yini‑as: «way‑abram, ad‑ur‑tiksaḍt. nkkin a‑igan antal‑nk, gġ walli‑k‑ijazan s‑lh̬ir.»

² isawl‑d abram irar‑as: «wa sidi rbbi, man lh̬ir a‑rad‑iyi‑yili, lliġ a‑zzrayġ tudrt‑inu bla tarwa? kullu mad‑ṭṭafġ, ra‑t‑iwrt liɛazr gu‑dimašq.»

³ izayd abram yini: «hati yan zġ‑willi iluln ġ‑ih̬iyyamn‑inu a‑rad‑iyi‑ig awrrat, ašku ur‑iyi‑tfkit arraw.»

⁴ yašk‑id‑wawal n‑sidi rbbi ġakudan i‑abram yini‑as: «urd ġwan a‑ra‑ig awrrat‑nk. ašku yuk lli‑ra‑tarut, nttan a‑ra‑k‑iwrt.»

⁵ yawi‑t rbbi s‑brra yini‑as: «mnad‑n ġ‑ignwan, tḥasbt‑n itran iġ‑tẓḍart a‑tn‑tḥasbt. ġmkan a‑ra‑ig‑wamud‑nk.»

⁶ yamn abram sidi rbbi ġakudan, ig‑t rbbi d‑wad‑f‑irḍa,

⁷ yini‑as: «nkki giġ wad bdda illan, gġ ġwalli‑k‑id‑yiwin zġ‑tmdint n‑ur n‑ayt‑kaldan f‑ad‑ak‑fkġ tamazirt‑ad a‑stti‑teṭṭaft.»

⁸ isqsa‑t abram ġakudan: «wa sidi rbbi, mamnk a‑s‑rad‑issanġ izd s‑ṣṣaḥt ra‑stt‑ṭṭafġ nkki?»

⁹ yini‑as: «awi‑yyi‑d yat‑tmugayt dar kraḍ isggʷasn, d‑yat taġaṭṭ dar kraḍ isggʷasn, d‑yan‑izimmr dar kraḍ isggʷasn d‑yat‑tmilli d‑yat‑ttbirt.»

¹⁰ yawi‑as‑tn‑d abram ibbi‑tn ibḍu‑tn f‑mnaṣṣ, isrs kraygatt mnaṣṣ ġ‑umnid n‑gʷmas, imma igḍaḍ isrs‑tn‑in bla‑tn‑ibbi.

¹¹ d‑ġakud nna‑d‑gguzn igadrn f‑tġrṣiw, ar‑tn‑iṭṭay abram.

¹² lliġ a‑n‑teṭar tafukt, ign abram yawi‑t‑in‑iyṭs iẓẓayn, ḍrnt‑d fllas tugtt n‑tillas ssiwidnin.

¹³ isawl‑d srs sidi rbbi ġ‑twargit yini‑as: «sfld a‑tissant ma‑ra‑ijru. han amud‑nk rad‑gn iġribn ġ‑yat‑tmazirt lli‑ur‑igin tinsn. rad‑gis‑gn ismgan, ar‑tn‑ssdullun ayt‑tmazirt‑an kkuẓ id‑miyya (400) n‑usggʷas.

¹⁴ walaynni rad‑utġ lḥukm f‑ayt‑tmazirt‑an lli‑tn‑igan d‑ismgan, ssufġġ‑tn‑d zġ‑gis tigira, asin‑d didsn lh̬ir iggutn.

¹⁵ kiyi ra‑truḥt s‑sslamt dar imzwura‑nk, ttyawmḍalt tigira n‑tudrt iġzzifn tfulki.

¹⁶ imma ntni rad‑d‑wrrin ġ‑tis kkuẓṭ n‑tasutin‑nsn, ar‑tɛmmarn tamazirt‑ad n‑ayt‑amur, ašku ayt‑amur ur‑ta‑kmmiln lh̬ʷšanat‑nsn.»

¹⁷ truḥ ilmma tafukt ḍrnt‑d tillas, imikk s‑di‑tban yat takat s‑lɛafiyt d‑wawwu iggutn, tzri zġ‑gr igzman n‑tġrṣiw.

¹⁸ iskr sidi rbbi ġakudan lɛhd ġ‑gras d‑abram yini‑as: «amud‑nk a‑mi‑rad‑fkġ akal‑ad kullut, zġ‑wasif n‑miṣr ar asif n‑furat imqqurn,

¹⁹ fkġ‑asn gis timizar n‑ayt‑qin d‑ayt‑qaniz d‑ayt‑qadmun

²⁰ d‑ayt‑ḥit d‑ayt‑fariz d‑ayt‑rafaɛ

²¹ d‑ayt‑amur d‑ayt‑kanɛan d‑ayt‑girgaš d‑ayt‑yabus.»