isizwur 14 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

abram ijjnjm luṭ

¹ ġ‑uwssan n‑amrafil agllid n‑šinɛar d‑aryuk agllid n‑alasar d‑kidarlɛumr agllid n‑ɛilam d‑tidɛal agllid n‑guyim,

² mmaġn ntni d‑baraɛ agllid n‑sadum d‑bršaɛ agllid n‑ɛamura d‑šinab agllid n‑adma d‑šmibr agllid n‑ṣabwim d‑ugllid n‑balaɛ lli‑igan ṣuɛar.

³ igldan‑ad ssmunn ikabarn‑nsn ġ‑uzaġar n‑siddim. azaġar‑an ġilad illa‑gis‑umda immutn.

⁴ ašku sin d‑mraw (12) n‑usggʷas a‑tqasan ġ‑ddu‑ufus n‑kidarlɛumr, imma wis kraḍ d‑mraw (13) n‑usggʷas ɛṣan‑t.

⁵ iffuġ kidarlɛumr ġ‑wis kkuẓ d‑mraw (14) n‑usggʷas, ntta d‑igldan lli‑dids‑munnin, nrun ayt‑rafaɛ ġ‑tmdint n‑ɛaštarut‑qarnaym, nrun ayt‑zuzi ġ‑ham, nrun ayt‑aymi ġ‑šawa‑qritaym,

⁶ nrun ayt‑ḥur zġ‑iwrar n‑saɛir ar aṣġar n‑igg n‑faran ġ‑tama n‑lh̬la.

⁷ wrrin ilmma f‑uġaras‑nsn s‑ɛin‑mišfaṭ lli‑igan qadaš, nrun kullu tamazirt n‑ayt‑ɛamaliq, nrun ula ayt‑amur lli‑izdġn ġ‑ḥaṣaṣun‑tamar.

⁸ ġakudan ad‑ffuġn igldan n‑sadum d‑ɛamura d‑adma d‑ṣabwim d‑balaɛ lli‑igan ṣuɛar. ssmunn‑d ikabarn‑nsn ġ‑uzaġar n‑siddim

⁹ baš ad‑mmaġn d‑kidarlɛumr agllid n‑ɛilam d‑tidɛal agllid n‑guyim d‑amrafil agllid n‑šinɛar d‑aryuk agllid n‑alasar. smmus igldan a‑d‑iffuġn ad‑mmaġn d‑kkuẓ.

¹⁰ walaynni ggutn igʷḍyan n‑zzft ġ‑uzaġar n‑siddim. lliġ rwln igldan n‑sadum d‑ɛamura, iḍr kra gisn ġ‑igʷḍyan, rwln wiyyaḍ s‑iwrar.

¹¹ aškin‑d kkuẓ igldan‑an yaḍni, amẓn kullu ma‑igan win sadum d‑ɛamura, la ayda wala amššu, munn ilmma d‑uġaras‑nsn.

¹² awin didsn luṭ lli‑igan yus n‑gʷmas n‑abram ašku izdġ ġ‑sadum, awin‑t ntta ula kullu ma‑iṭṭaf.

¹³ yašk‑id yan injm zġ‑imiġ, yawi‑d lah̬bar i‑abram. iga abram zġ‑ayt‑ɛibr, isrs ġ‑tama n‑uṣġar n‑tasaft n‑mamra n‑ayt‑amur. mamra iga gʷmas n‑aškul d‑ɛanir, ntni kullutn skrn yadlli lɛhd ġ‑gratsn d‑abram.

¹⁴ lliġ isfld abram is‑ityamaẓ yus n‑gʷmas, issmun‑d irgazn dusnin lli‑iluln ġ‑ih̬iyyamn‑ns. kraḍ id‑miyya d‑mraw d‑tam (318) ad‑gan. ffuġn ġakudan ẓẓun gisn ar tamdint n‑dan.

¹⁵ ibḍu fllasn abram ih̬ddamn‑ns ġ‑iḍ‑an, yakʷi‑n fllasn inru‑tn, iẓẓu gisn ar ḥuba ġ‑tsga n‑dimašq lli‑iwalan asmmiḍ.

¹⁶ ikks‑asn‑d ayda kullut, yawi‑d ula luṭ lli‑igan yus n‑gʷmas, ntta d‑wayda‑ns d‑tmġarin ula mddn‑ns kullutn.

malkiṣadq ibark abram

¹⁷ lliġ‑d‑iwrri abram tigira n‑ma‑inra kidarlɛumr d‑igldan lli‑dids‑illan, iffuġ‑d‑ugllid n‑sadum a‑t‑in‑imnaggar ġ‑talat n‑šawa lli‑igan talat n‑ugllid.

¹⁸ yašk‑id ula malkiṣadq agllid n‑salim, yawi‑d aġrum d‑waman n‑waḍil iktin. ig nttan amsakmur ġ‑gr mddn d‑rbbi amattuy.

¹⁹ malkiṣadq ibark abram ġakudan yini: «a‑tili lbaraka f‑abram zġ‑rbbi amattuy lli‑iskrn ignwan d‑wakal.

²⁰ a‑yili lḥmd i‑rbbi amattuy lli‑irurn inuwwašn‑nk s‑ddu‑ufus‑nk.» ifk‑as ilmma abram tis mrawt n‑kullu ma‑d‑yumẓ.

²¹ yini‑ugllid n‑sadum ġakudan i‑abram: «rar‑iyi‑d mddn, tasit ayda a‑ig wink.»

²² yini abram i‑ugllid n‑sadum: «hati ggulliġ i‑sidi rbbi amattuy lli‑iskrn ignwan d‑wakal,

²³ ur‑tasiġ ifili ula tassamt ula ḥtta yat‑tġawsa zġ‑ġaylli igan wink, a‑ur‑imil tinit ‹nkki a‑issġnan abram.›

²⁴ walu abla maylli ššan iɛyyaln, ula taġamt n‑ɛanir d‑aškul d‑mamra lli‑didi‑imunn, ad‑asn‑tfkt taġamt‑nsn.»