isizwur 13 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ibḍa abram d‑luṭ

¹ yawn‑d abram zġ‑miṣr ntta d‑tmġart‑ns ula kullu ma‑iṭṭaf, imuddu s‑lh̬la n‑nagab. imun dids luṭ.

² abram, tggut dars lksibt d‑nnʷqrt d‑uwrġ.

³ izri ġ‑nagab ar‑itkka tisgiw‑an aylliġ yakmur s‑bayt‑il. ilkm adġar lli‑ġ‑ttin ikka‑uh̬iyyam‑ns ġ‑gr bayt‑il d‑ɛay,

⁴ ibna gis yadlli akrkur n‑tġrṣi. izayd abram ar‑daġ‑gis‑yaqra i‑ism n‑sidi rbbi.

⁵ imma luṭ lli‑imunn d‑abram, iṭṭaf ula ntta ulli d‑imugayn d‑ih̬iyyamn.

⁶ tggut bahra lksibt n‑abram ula tin luṭ, aylliġ ur‑tn‑sul‑yumi‑wakal‑an s‑sin.

⁷ ilin ula ayt‑kanɛan d‑ayt‑fariz ġ‑tmazirt ġ‑uwssan‑an. tnkr ṭaẓit ġ‑gr imksawn n‑abram d‑win luṭ.

⁸ yini abram ġakudan i‑luṭ: «ġir a‑ur‑tili kra n‑ṭaẓit ġ‑griyi dik ula ġ‑gr imksawn‑inu d‑wink, ašku aytmatn a‑nga.

⁹ is‑ur‑yusɛi‑wakal ġ‑lgddam‑nk? nkr a‑nbḍu nkki dik. iġ‑trit tasga taẓlmaṭṭ, dduġ nkki s‑tfasiyt. iġ‑trit tafasiyt, dduġ s‑tẓlmaṭṭ.»

¹⁰ yall luṭ alln‑ns ar‑n‑itmnad azaġar n‑wasif n‑urdun, iẓr‑n akal‑an išbɛ aman ar tamdint n‑ṣuɛar, ig zund tamazirt n‑miṣr, zund talɛrṣt n‑sidi rbbi. ġ‑uwssan‑an ur‑ta‑ihlk sidi rbbi timdinin n‑sadum d‑ɛamura.

¹¹ isti luṭ i‑ih̬f‑ns kullu azaġar‑an n‑urdun, bḍun i‑ngratsn. imuddu luṭ s‑tsga n‑usġlay n‑tafukt,

¹² iqama abram ġ‑tmazirt n‑kanɛan. izdġ luṭ ġ‑gr‑tmdinin n‑uzaġar, issmatti ih̬iyyamn‑ns s‑tama n‑sadum.

¹³ imma ayt‑sadum, ayt‑tḥramiyt ad‑gan, ʷh̬šnn bahra iskkirn‑nsn ġ‑iẓri n‑sidi rbbi.

¹⁴ isawl sidi rbbi s‑abram ġ‑lliġ dids ibḍa luṭ, yini‑as: «all alln‑nk ġin ġ‑tllit, tmnadt s‑lgddam‑nk ula tiġurdin‑nk, tmnadt ula s‑ufasi‑nk d‑uẓlmaḍ‑nk.

¹⁵ hati kullu tamazirt‑ad tẓrit, rad‑ak‑tt‑fkġ a‑tg tink ula tin tarwa‑nk kullu mayd iftan.

¹⁶ rad‑ssigtġ amud‑nk zund tiẓratin n‑ugdrur ġ‑wakal. mra is‑illa yan iẓḍarn a‑iḥasb tiẓratin n‑ugdrur n‑wakal, ra‑yiẓḍar a‑iḥasb amud‑nk.

¹⁷ nkr ar‑ttkkat kullu tamazirt‑ad zġ‑ttmi‑ns ar ttmi yaḍni, ašku kiyi a‑mi‑ra‑stt‑fkġ kullutt.»

¹⁸ issmatti abram ih̬iyyamn‑ns ġakudan, iddu izdġ ġ‑dar‑uṣġar n‑tasaft n‑mamra ġ‑tama n‑ḥabrun. ibnu ġin yan‑ukrkur n‑tġrṣi i‑sidi rbbi.