isizwur 12 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

izuyd abram s‑wakal n‑kanɛan

¹ isawl‑d sidi rbbi s‑abram yini‑as: «ffuġ zġ‑tmazirt‑nk, tflt aqbil‑nk d‑tawjja n‑babak, tddut s‑tmazirt lli‑rad‑ak‑mlġ.

² rad‑zġ‑gik‑skrġ yan‑uqbil imqqurn. ra‑k‑barkġ, ssimġurġ ism‑nk f‑ad‑kšmn mddn ggutnin s‑lbaraka‑yad dark illan.

³ rad‑barkġ willi‑k‑ibarkn, ḥgrġ wanna‑k‑iḥgrn. d‑kiyi a‑s‑rad‑barkġ kullu tagʷmatin n‑ddunit.»

⁴ iffuġ‑d abram ġakudan ġmklli‑s‑as‑inna sidi rbbi, imun dids luṭ. ssa n‑id‑mraw d‑smmus (75) n‑usggʷas a‑illan dar abram ġakud lliġ ifl tamdint n‑ḥaran.

⁵ yawi dids tamġart‑ns saray, yawi ula luṭ lli‑igan yus n‑gʷmas. yawi kullu ayda lli‑ssmunn ntni ula mddn lli‑ṭṭafn ġ‑ḥaran. ffuġn‑d kullu muddun s‑tmazirt n‑kanɛan.

⁶ lliġ lkmn kanɛan, iftu sul abram aylliġ iruḥ dar‑uṣġar n‑tasaft lli‑mi‑ttinin ‹mura› ġ‑tsga n‑šakim. ayt‑kanɛan a‑sul‑iɛmmrn tamazirt‑an ġ‑uwssan‑an.

⁷ iban‑d sidi rbbi i‑abram ġakudan yini‑as: «amud‑nk a‑mi‑rad‑fkġ tamazirt‑ad.» ibnu ġin abram yan‑ukrkur ma‑f‑a‑n‑issakmur tiġrṣiw i‑sidi rbbi lli‑as‑d‑ibann.

⁸ izayd ilmma s‑iwrar ġ‑tama n‑bayt‑il ġ‑tsga n‑usġlay n‑tafukt. issbidd ah̬iyyam‑ns ġ‑yan‑udġar ġ‑gr bayt‑il d‑ɛay. tlla‑yas ɛay ġ‑tsga n‑usġlay n‑tafukt, tili bayt‑il ġ‑tsga n‑umṭar‑ns. ibnu gis abram yan‑ukrkur n‑tġrṣi ar‑daġ‑yaqra i‑ism n‑rbbi da‑bdda‑illan.

⁹ izayd ilmma f‑umuddu‑ns s‑lh̬la n‑nagab.

abram d‑saray ġ‑miṣr

¹⁰ izri ma‑izrin s‑illa‑uġʷni ġ‑wakal‑an, ihuwwd abram s‑tmazirt n‑miṣr a‑gis‑igawr, ašku išqa‑uġʷni bahra.

¹¹ lliġ‑n‑akmurn s‑tama n‑miṣr, yini i‑tmġart‑ns saray: «ssnġ is‑ra‑tgt tamġart ifulkin ġ‑walln n‑mddn.

¹² iġ‑km‑ẓran ayt‑miṣr, rad‑inin ‹tamġart‑ns a‑tga,› nġn‑iyi ġakudan awin‑km sul tdrt.

¹³ ġir ini‑asn ‹hati ulltmas ad‑giġ› f‑ad‑gigi‑skrn lh̬ir f‑uwdm‑nm, tnjm ula tudrt‑inu f‑ssibt‑nm.»

¹⁴ lliġ ikšm abram s‑miṣr, ẓrn ayt‑miṣr tamġart tfulki bahra.

¹⁵ ẓrn‑tt ula imɛawann n‑firɛawn, alġn‑as‑tt. awin tamġart ġakudan s‑tgmmi n‑firɛawn,

¹⁶ iskr nttan afulki ġ‑abram f‑ssibt‑ns, ifk‑as ulli d‑imugayn d‑iġʷyal, ifk‑as ismgan d‑tsmgin d‑tġʷyal d‑irɛman.

¹⁷ walaynni sidi rbbi yut firɛawn d‑ayt‑tgmmi‑ns s‑tmuḍan šqanin f‑ssibt n‑saray tamġart n‑abram.

¹⁸ iġr‑d firɛawn i‑abram ġakudan yini‑as: «ma‑iga ġayd‑iyi‑tskrt? mah̬ aylliġ‑ur‑iyi‑tnnit ‹tga tamġart‑inu›?

¹⁹ ma‑f‑tnnit ‹ulltma a‑tga› aylliġ‑tt‑iwiġ a‑tg tamġart‑inu? ġilad ha tamġart‑nk. awi‑tt tddut.»

²⁰ yuṣṣa fllas firɛawn ih̬ddamn‑ns, ssmsrn‑t nttan d‑tmġart‑ns ula kullu ma‑dars‑illan.