isizwur 11 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

lbrj yattuyn n‑babil

¹ kkan‑ttin mddn lli‑llanin ġ‑ddunit ar‑sawaln s‑iwaliwn lli‑ssnn kullutn, ar‑kullu‑tfhamn i‑ngratsn.

² ffuġn munn s‑tsga n‑usġlay n‑tafukt aylliġ lkmn azaġar n‑wakal n‑šinɛar, zdġn gis.

³ inin i‑ngratsn: «rwaḥat a‑nskr uṭṭibn, nssnu‑tn ġ‑ufrran.» nkrn ġakudan bnun s‑uṭṭibn‑lli, zdin‑tn s‑zzft,

⁴ inin: «zaydat a‑nskr i‑ih̬f‑nġ yat‑tmdint, nbnu yan lbrj yattuyn ar ignna, nssimġur ism‑nġ a‑ur‑sar‑nakut ġ‑tsgiw n‑ddunit aggugnin.»

⁵ issmaqql‑d sidi rbbi tamdint ula lbrj lli‑bnan tarwa n‑bnadm.

⁶ yini sidi rbbi ġakudan: «han yan‑uqbil ad‑gan, ar‑sawaln s‑iwaliwn lli‑ssnn kullutn. bḥra bdan skrn yad mayad, ġilad aynna‑ġ‑swangmn ur‑ra‑fllasn‑išqu a‑t‑skrn.

⁷ hiya a‑n‑srsn‑ngguz nssmuttl‑asn iwaliwn‑nsn, a‑ur‑sul‑tfhamn i‑ngratsn.»

⁸ issukt‑tn sidi rbbi ġakudan s‑kullu tisgiw n‑ddunit. ur‑ẓḍarn ad‑kmmln tabnnayt n‑tmdint‑an.

⁹ mayan a‑f‑as‑gan ism ‹babil›, ašku ġin a‑ġ‑issmuttl sidi rbbi iwaliwn n‑kullu mddn, issukt‑tn s‑kullu tisgiw n‑ddunit.

tasutin n‑taraḥ d‑tarwa‑ns

²⁷ ġmkad a‑iga‑warra n‑tasutin n‑taraḥ. taraḥ yuru abram d‑naḥur d‑haran. haran yuru luṭ.

²⁸ immt ilmma haran ur‑ta‑immut babas taraḥ. ġ‑wakal n‑tlalit‑ns a‑ġ‑immut haran ġ‑tmdint n‑ur ġ‑tmazirt n‑ayt‑kaldan.

²⁹ imma abram d‑naḥur, tahln ntni. tamġart n‑abram tga saray. tamġart n‑naḥur tga malka illis n‑haran lli‑igan babas n‑malka d‑yiska.

³⁰ walaynni saray ur‑tẓḍar a‑trbbu, ur‑jji‑dars kra n‑warraw.

³¹ inkr taraḥ yawi yus abram d‑luṭ lli‑igan yus n‑yus haran, ntni d‑saray lli‑igan tamġart n‑yus abram, ffuġn tamdint n‑ur n‑ayt‑kaldan, irin tamazirt n‑kanɛan. walaynni lliġ lkmn tamdint n‑ḥaran, qaman zdġn gis.

³² irgl taraḥ sin id‑miyya d‑smmus (205) n‑usggʷas, immt ilmma ġ‑tmdint n‑ḥaran.