isizwur 1 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

rbbi ih̬lq ignwan d‑wakal

¹ ġ‑isizwur ih̬lq rbbi ignwan d‑wakal.

² ih̬wa‑wakal, ur‑gis‑illi yat. tillas ad‑kullu‑idln aman dranin, ar‑itkka rruḥ n‑rbbi f‑iggi n‑waman.

³ yini rbbi: «a‑tili tifawt» s‑tlla tifawt.

⁴ iẓr rbbi is‑tfulki tifawt. ibḍu rbbi tifawt d‑tillas,

⁵ ig i‑tifawt ‹azal›, ig i‑tillas ‹iḍ›. tzri‑tdggʷat ifaw ṣbaḥ, ig ass amzwaru.

⁶ yini rbbi: «a‑yili lhawa ġ‑wammas n‑waman a‑tn‑ibḍu s‑sin,»

⁷ s‑illa ġmkan. iskr rbbi lhawa, ibḍu srs aman n‑ddu lhawa d‑waman n‑iggi n‑lhawa,

⁸ ig i‑lhawa ‹ignwan›. tzri‑tdggʷat ifaw ṣbaḥ, ig wis sin‑uwssan.

⁹ yini rbbi: «ad‑kullu‑munn‑waman n‑ddu ignwan ġ‑yat‑tsga, f‑a‑di‑tban taġart,» s‑illa ġmkan.

¹⁰ ig i‑taġart ‹akal›, ig i‑waman lli‑munnin ‹amda›. iẓr rbbi mayan ifulki.

¹¹ yini ilmma: «a‑di‑tmġi‑tzgzut ġ‑wakal, gn igʷlasn s‑imadn‑nsn d‑iṣġarn s‑lġllat lli‑ġ‑llant taqqayin‑nsn, kraygatt kra d‑mklli iga ġ‑wakal,» s‑illa ġmkan.

¹² tmġi‑tzgzut ġ‑wakal, gn igʷlasn kraygatt kra d‑mklli iga‑wamud‑ns, gn iṣġarn kraygatt kra d‑mklli tga lġllt‑ns. iẓr rbbi mayan ifulki.

¹³ tzri‑tdggʷat ifaw ṣbaḥ, ig wis kraḍ‑uwssan.

¹⁴ yini rbbi: «ad‑ilint tifawin ġ‑lhawa n‑ignwan, ar‑aṭṭunt azal d‑iyḍ, ar‑malant timitar d‑izmaz, ar‑ssbayannt ussan d‑isggʷasn.

¹⁵ ad‑sufunt ġ‑ignwan ar‑tisfiwnt i‑wakal,» s‑illa ġmkan.

¹⁶ iskr rbbi snat tifawin mqqurnin, iskr tafukt a‑tḥkam azal, iskr ayyur a‑iḥkam iḍ, iskr itran ula ntni.

¹⁷ ig‑tn‑in ġ‑lhawa n‑ignwan ad‑isfiwn i‑wakal,

¹⁸ ar‑tḥkamn azal d‑iyḍ ar‑aṭṭun tifawt d‑tillas. iẓr rbbi mayan ifulki.

¹⁹ tzri‑tdggʷat ifaw ṣbaḥ, ig wis kkuẓ‑uwssan.

²⁰ yini rbbi: «ad‑ɛmmrn‑waman s‑kullu ma‑igan lmh̬luqat ddrnin, ilin ula igḍaḍ ar‑taylaln ġ‑ignwan f‑iggi n‑wakal.»

²¹ ih̬lq rbbi luḥuš mqqurnin n‑umda, ula kullu lmh̬luqat lli‑itmussun ġ‑waman kraygatt kra d‑mklli iga, ula kullu ma‑itaylaln kraygatt kra d‑mklli iga. iẓr rbbi is‑ifulki.

²² ibark‑tn yini‑asn: «tarwat tigatm tɛmmrm imdwan, tigatm ula kunni n‑igḍaḍ f‑wakal.»

²³ tzri‑tdggʷat ifaw ṣbaḥ, ig wis smmus‑uwssan.

²⁴ yini rbbi: «ad‑ilint lmh̬luqat ddrnin f‑wakal, gn lbhaym d‑luḥuš n‑lh̬la d‑kullu ma‑itštutuln f‑wakal, kraygatt kra d‑mklli iga,» s‑illa ġmkan.

²⁵ iskr rbbi luḥuš kraygatt kra d‑mklli iga, iskr lbhaym kraygatt kra d‑mklli iga, iskr kullu ma‑itštutuln f‑wakal kraygatt kra d‑mklli iga. iẓr rbbi mayan ifulki.

²⁶ yini rbbi ġakudan: «a‑nskr adam f‑ṣṣurt‑nġ ad‑gn zund nkkʷni. rad‑ḥkamn f‑islman n‑imdwan d‑igḍaḍ n‑ignwan d‑lbhaym d‑luḥuš n‑lh̬la ula kullu ma‑itštutuln f‑wakal.»

²⁷ ih̬lq rbbi mddn f‑ṣṣurt‑ns. awtm d‑tuwtmt, f‑ṣṣurt n‑rbbi a‑f‑tn‑ih̬lq.

²⁸ ibark‑tn yini‑asn: «tarwat tigatm, tɛmmrm ddunit tḥkamm fllas, tili kullu ġ‑ddu‑ufus‑nun. a‑tḥkamm f‑islman n‑imdwan ula igḍaḍ n‑ignwan ula kullu ma‑iddrn ar‑ittidu f‑wakal.»

²⁹ yini‑asn rbbi: «hati fkiġ‑awn kullu ma‑igan imndi s‑wamud‑ns ula kullu ma‑igan aṣġar s‑lġllt‑ns a‑zġ‑gisn‑tšttam.

³⁰ fkġ kullu tazgzut nna‑itmġayn i‑luḥuš n‑lh̬la d‑igḍaḍ n‑ignwan d‑ma‑itštutuln f‑wakal a‑zġ‑gis‑šttan ntni ula kullu ma‑ġ‑tlla rruḥ n‑tudrt.» s‑illa ġmkan.

³¹ iẓr rbbi kullu ma‑iskr, hati ifulki bahra. tzri‑tdggʷat ifaw ṣbaḥ, ig wis sḍis‑uwssan.