išaɛyah 9 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

rad‑aġ‑d‑ilal yan‑warraw

¹ imma willi‑f‑yadlli‑tzri‑tkrrayt, ur‑ra‑n‑qaman ġ‑imula. ikka‑ttin issdulla akal n‑zabulun d‑win naftali, walaynni rad‑ttmjdn ayt‑tama n‑umda, ula tisgiw yaḍni n‑wasif n‑urdun, ula tamazirt n‑jalil lli‑ġ‑llan ayt‑tmizar n‑ddunit.

² mddn lli‑ifttun ġ‑tillas, hatni ẓran tifawt ihiyyan. ġwilli izdġn ġ‑wakal n‑umalu n‑lmut, hati tġli‑d fllasn tifawt.

³ tssfrḥt aqbil‑nk a‑rbbi, tssfjjijt f‑mddn‑nk. hatni frḥn bahra s‑mayd tskrt, ġmklli tfraḥn mddn ġakud nna‑ssmunun tamgra nġd ar‑aṭṭun ma‑d‑gʷmrn.

⁴ ašku trẓit iḥlasn ẓẓaynin, tkkst aɛmud f‑tġʷraḍ‑nsn, trẓt akuray n‑walli fllasn itɛddan, zund tirẓi lli‑ijran i‑ayt‑midyan ġayd izrin.

⁵ ašku lɛafiyt a‑ra‑išš ṣṣbbaṭ n‑iḍarn n‑ayt‑imiġ, tjdr ula malssa‑nsn lli‑iġʷman s‑idammn.

⁶ hati rad‑aġ‑d‑ilal yan‑warraw, ittfk‑aġ‑d yan iwitnġ. lamr n‑mddn‑ns a‑ra‑yasi f‑tġʷraḍ‑ns. rad‑as‑aqran s‑ismawn‑ad: amslmd n‑lɛjayb, rbbi itjhhdn, babatnġ idumn, bab n‑sslamt.

⁷ lamr‑ns a‑rad‑bdda‑izayd f‑lɛrš n‑dawd. sslamt n‑tgldit‑ns ur‑sar‑rad‑dars‑yili ttmi. lḥqq d‑ufulki a‑s‑ra‑stt‑izzga, issdus‑as ġilad ula kullu mayd iftan. rbbi n‑lmlayka, s‑tayri‑ns itjhhdn a‑s‑ra‑t‑iskr.