išaɛyah 8 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ra‑d‑yašk lɛskr n‑ayt‑aššur

¹ isawl‑d daġ sidi rbbi yini‑yyi: «asi‑d yat talluḥt imqqurn, tarat fllas s‑id‑lif n‑mddn‑an: ‹mahir‑šalal ḥaš‑baz› [tga lmɛna‑ns ‹ayda idda, tagʷmrt ttyattay›].»

² awiġ‑d ilmma nkki sin mddn ġ‑illa laman ad‑flla‑gn inagan. gan‑tn uriyah anmġur n‑tgmmi n‑rbbi d‑zakaryah yus n‑yabrakyah.

³ munġ ilmma d‑tnnabit, tffuġ ar‑trbbu, taru yan‑warraw. yini‑yyi‑d sidi rbbi: «g‑as ism ‹mahir‑šalal ḥaš‑baz›.

⁴ ašku lliġ ur‑ta‑jji‑issin‑wazzan a‑yini ‹wa baba› nġd ‹wa inna›, rad‑kullu‑ityattay‑wayda n‑dimašq ula tagʷmrt n‑samira s‑ufus n‑ugllid n‑aššur.»

⁵ yini‑yyi daġ sidi rbbi:

⁶ «mddn‑ad agʷin ad‑ssun zġ‑waman n‑šiluh lli‑ftanin s‑tawil, hajn s‑raṣin d‑yus n‑ramalyah.

⁷ imma rbbi siditun ra‑d‑srsn‑issngi asif imqqurn lli‑igan agllid n‑aššur s‑lquwwa‑ns iggutn, izzri fllasn anggay itjhhdn, ar‑d‑aqlayn‑waman ard ssurfn tamiw, ġwin zġ‑ugmmaḍ ar wayya.

⁸ ra‑d‑ffin s‑jjhd f‑wakal n‑yahuda, ġlin‑d fllas ard ruḥn taqqayt i‑bnadm. rad‑fsrn ifrawn‑nsn f‑wakal‑nk a‑‹ɛimmanwil›.»

⁹ šqwat ay‑ayt‑tmizar walaynni ra‑trẓm. sfldat a‑iqbiln aggugnin. bkisat s‑imqlad‑nun walaynni ra‑trẓm.

¹⁰ mšawarat i‑ngratun, walaynni ur‑ra‑gis‑tili lfaytt. tssufġm awal, walaynni ur‑ra‑izga. ašku hati rbbi illa didnġ.

afus idusn n‑rbbi da‑illan

¹¹ yamẓ gigi sidi rbbi s‑ufus‑ns idusn, issuggḍ‑iyi f‑ad‑ur‑munġ d‑uġaras n‑mddn‑ad, yini‑yyi:

¹² «ad‑ur‑ttinim ‹ssiba› i‑kullu ma‑mi‑ttinin mddn‑ad ‹ssiba›. ad‑ur‑tiksaḍm zġ‑ġaylli‑zġ‑a‑tiksaḍn wala tuggʷdm.

¹³ walaynni swangmat ġ‑sidi rbbi n‑lmlayka, tissanm izd nttan a‑igan amẓlay, d‑nttan a‑zġ‑a‑ttiksaḍm d‑nttan a‑zġ‑ra‑ttuggʷdm.

¹⁴ ġwalli igan antal‑nun amẓlay, nttan a‑ra‑ig ifir ma‑tn‑issknukin, ig tabayḍḍrt i‑sin iqbiln n‑israyil, ig taẓqqurt ula ššbkt i‑imzdġn n‑urušalim.

¹⁵ han iggut ma‑ra‑yut ifikš, ḍrn rẓn, tyamaẓn awin‑tn.»

¹⁶ ssmuttl‑d arra n‑tuggʷa, trglt almmud ġ‑uwlawn n‑imḥḍarn‑inu.

¹⁷ rad‑sul‑qlġ s‑sidi rbbi lli‑issntaln udm‑ns f‑ayt‑yaɛqub, ra‑n‑sul‑gis‑rjuġ.

¹⁸ ha nkki d‑tarwa‑yad‑iyi‑ifka sidi rbbi. nga timitar d‑lɛjayb ġ‑israyil, zġ‑dar sidi rbbi n‑lmlayka lli‑ibiddn ġ‑uwrir n‑ṣiyun.

¹⁹ rad‑awn‑ttinin mddn: «sqsayt išuwwafn d‑iqddašn lli‑ijrubbujn ar‑sshiṭṭirn. is‑ur‑ih̬ṣṣa ayt‑tmazirt ad‑sqsan id‑rbbi‑nsn? is‑ur‑tn‑d‑iqqan ad‑sqsan willi mmutnin f‑willi ddrnin?»

²⁰ trart‑asn: «amẓat ġ‑ulmmud d‑tuggʷa.» ašku iwaliwn lli‑s‑a‑sawaln ntni ur‑sugirn yat.

²¹ taġuft ula laẓ a‑s‑ra‑tlulliyn ġ‑wakal. ġakud nna‑tn‑yaġ laẓ, rad‑d‑gisn‑nkrn iriyn, rgmn agllid‑nsn d‑id‑rbbi‑nsn. mnadn‑in s‑ignwan,

²² mnadn ilmma s‑wakal. han taġuft d‑tillas d‑imula n‑tkrrayt a‑rad‑asn‑gis‑yili, ard‑tn‑idḥi rbbi s‑tillas ssiwidnin.