išaɛyah 7 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

awal n‑rbbi i‑ugllid n‑yahuda

¹ ġ‑uwssan n‑aḥaz agllid n‑ayt‑yahuda lli‑igan yus n‑yutam lli‑igan yus n‑ɛuzziyah, inkr raṣin agllid n‑aram ntta d‑faqaḥ yus n‑ramalyah agllid n‑israyil, awnn‑d s‑tmdint n‑urušalim ad‑dids‑ssnkrn imiġ, walaynni ur‑ẓḍarn a‑stt‑nrun.

² ilkm‑wawal agllid n‑yahuda: «han ayt‑aram d‑ayt‑afraym [israyil] munn‑d fllanġ.» ar‑itrgigiy‑uwl n‑aḥaz d‑win mddn‑ns, ġmklli tmussun iṣġarn n‑tagant s‑ijawan.

³ isawl‑d sidi rbbi s‑išaɛyah yini‑as: «ffuġ ġilad kiyi d‑yuk ‹šar‑yašub›, tftum a‑n‑tmnaggarm aḥaz ġ‑dar ih̬f n‑trga n‑ifrḍ n‑uflla, ġ‑uġaras lli‑itawin s‑igr n‑umssird.

⁴ tinit‑as: ‹rar lɛaql. ġir thnna. a‑ur‑tiksaḍt ula iġuwḍ‑uwl‑nk zġ‑lġaḍab ijddrn n‑raṣin d‑ayt‑aram ula yus n‑ramalyah, ašku ġir iġd d‑wawwu a‑iqaman ġ‑sin ikššuḍn‑an rġanin.

⁵ han ayt‑aram mšaškan‑d d‑yus n‑ramalyah d‑ayt‑afraym, skrn f‑a‑k‑nrun ar‑ttinin:

⁶ ftwat a‑nnkr s‑tmazirt n‑yahuda, nssiwd imzdġn‑ns, namẓ‑tt i‑ih̬f‑nġ, ng yus n‑ṭabil d‑ugllid fllas.

⁷ ha ma‑inna siditnġ rbbi da‑bdda‑illan. mayan ur‑ra‑yili wala ra‑ijru.

⁸ ašku ih̬f n‑aram tga‑t dimašq. ih̬f n‑dimašq iga‑t raṣin. sḍis id‑mraw d‑smmus (65) n‑usggʷas a‑ra‑izri, s‑ra‑trẓ‑tqbilt n‑afraym, laḥ‑tt.

⁹ ih̬f n‑afraym tga‑t samira. ih̬f n‑samira iga‑t yus n‑ramalyah. iġ‑ur‑tzgam ġ‑liman, ur‑ra‑tilim ġ‑laman.› »

tamatart n‑ɛimmanwil

¹⁰ isawl daġ sidi rbbi s‑aḥaz yini‑as:

¹¹ «ḍalb yat‑tmatart i‑rbbi da‑illan ig rbbi‑nk. a‑tdru ar tadrut n‑wakal, nġd a‑tattuy ar tattuyt n‑ignna.»

¹² imma aḥaz irur‑as: «ur‑rad‑ḍalbġ ula rad‑armġ sidi rbbi.»

¹³ isawl‑d išaɛyah yini‑as: «sfldat a‑tasut n‑dawd. is‑ur‑kʷn‑yuwdi a‑tssrmaym mddn, aylliġ tram a‑tssrmaym ula rbbi‑nu.

¹⁴ imma siditnġ nttan a‑rad‑awn‑d‑ifk yat‑tmatart. ha taɛyyalt ra‑trbbu, taru yan‑warraw, tg‑as ism ‹ɛimmanwil› [tga lmɛna‑ns ‹rbbi didnġ›].

¹⁵ ra‑ištta tikkilt d‑tammnt, lliġ issn a‑yagʷi ma‑yʷh̬šnn, yamẓ ġ‑ma‑ifulkin.

¹⁶ ašku lliġ ur‑ta‑issin‑wazzan a‑yagʷi ma‑yʷh̬šnn yamẓ ġ‑ma‑ifulkin, rad‑kullu‑h̬lunt‑tmizar n‑igldan s‑sin lli‑zġ‑tġuwḍm.

¹⁷ imma kiyi d‑mddn‑nk ula tasut n‑babak, ra‑d‑fllawn‑izzri sidi rbbi kra n‑uwssan, ur‑jji‑llin zund ntni zġ‑lliġ tngara‑tqbilt n‑afraym d‑tin yahuda, ašku ra‑d‑srun‑issawn agllid n‑aššur.

¹⁸ ġassan ra‑issinsg sidi rbbi i‑izan ad‑d‑aylln zġ‑talɛinin n‑isaffn n‑miṣr, issinsg i‑tizzwa ad‑d‑ayllnt zġ‑ikalln n‑aššur.

¹⁹ aškin‑d kullu ttrsn ġ‑talatin ula ġ‑ijarifn, ɛmmrn izggʷarn d‑igʷdlan.

²⁰ ġassan ra‑ywn‑issmakkrḍ sidi rbbi s‑tuzzalt lli‑d‑ikʷra zġ‑tsga yaḍni n‑wasif n‑furat, a‑stt‑igan d‑ugllid n‑aššur. rad‑awn‑ikks azzar n‑ugayu d‑inẓaḍn n‑iḍarn, issitti‑awn ula tamart.

²¹ ġassan a‑ra‑iḥḍu‑ukssab yat‑tmugayt imẓẓin nġd snat‑thray,

²² ar‑zġ‑gisnt‑issa agʷfay iggutn ar‑di‑ttšaḍ tikkilt. ašku wanna iqaman isul ġ‑tmazirt ra‑ištta tikkilt d‑tammnt.

²³ innaġ yadlli tlla alf n‑ddilit n‑waḍil iskarn alf n‑uqarid n‑nnʷqrt, ra‑iwrri ar‑issmġay taskra d‑isnnann ġ‑uwssan‑an,

²⁴ ar‑gis‑gʷmmrn mddn s‑lqus d‑iẓḍkan, ašku iɛmmr‑wakal kullut s‑isnnann d‑tskra.

²⁵ han iwrar lli‑ġ‑a‑tkkrzm ar‑ttnqašm, ur‑sul‑ra‑tn‑ttkkam, ašku ɛmmrn s‑tskra d‑isnnann. ra‑gisn‑trẓẓmm i‑imugayn, frdnt‑gisn‑uwlli.