išaɛyah 65 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

willi njmnin ula willi tthlknin

¹ [yini sidi rbbi:] «ujadġ ġ‑uwssan‑an ad‑jawbġ i‑willi ur‑iyi‑iḍalbn, ssbayynġ ih̬f‑inu i‑willi ur‑sri‑isiggln, ar‑ttiniġ ‹ha nkki, ha nkki› i‑uqbil lli‑ur‑yaqran i‑ism‑inu.

² mdiġ‑n ifassn‑inu ass kullut i‑mddn lli‑yyi‑iḍaḍḍan, ḍfurn ntni aġaras ur‑iṣlaḥn. ar‑skarn mad‑ran i‑ih̬f‑nsn,

³ ar‑iyi‑bdda‑sshrašn. ar‑n‑ssakmurn tiwafkiw ġ‑uwrtan lli‑ẓlin i‑larwaḥ. ar‑ssaqlayn lbh̬ur f‑ikʷrkar n‑uṭṭibn.

⁴ ar‑tgabaln imḍḍaln, ar‑tgawarn iḍ kullut ġ‑idġarn ntlnin. ar‑šttan tifiyi n‑walfan, yili ma‑iḥrmn ġ‑tmkilin‑nsn.

⁵ ar‑ttinin: ‹bidd‑n ġin a‑ur‑iyi‑di‑tlkmt, ha‑yyi ġusġ fllak.› wan mddn‑an gan dari zund awwu yaqlayn s‑tnzar, zund lɛafiyt ijddrn ass kullut.

⁶ ha mad‑dari‑ityaran ġ‑lḥsab‑nsn: ‹ur‑rad‑fssaġ. rad‑asn‑rarġ mad‑asn‑igan. s‑lḥqq rad‑asn‑rarġ f‑lh̬ʷšanat lli‑skrn ntni ula lh̬ʷšanat lli‑skrn lajdud‑nsn.› inna‑t rbbi da‑bdda‑illan.

⁷ ašku ar‑tbh̬h̬arn i‑larwaḥ f‑idrarn, ar‑iyi‑tḥgarn f‑iggi n‑iwrar. rad‑asn‑ɛbbrġ atig n‑kullu ġaylli skrn.»

⁸ ha ma‑inna sidi rbbi: «iġ‑ẓran mddn tizrmt ġ‑ddilit, issann is‑ra‑gis‑ilin‑waman n‑waḍil, ar‑ttinin: ‹a‑ur‑tti‑tluḥt, ašku tlla gis lbaraka.› ġmkan a‑rad‑dari‑gn ih̬ddamn‑inu. ur‑ra‑tn‑kullu‑luḥġ.

⁹ rad‑d‑ssufġġ amud i‑ayt‑yaɛqub, fkġ i‑ayt‑yahuda tarwa ma‑itwrratn iwrar‑inu. mddn‑inu imẓlayn a‑ra‑iṭṭafn tamazirt‑ad, zdġn gis ih̬ddamn‑inu.

¹⁰ akal n‑šarun ra‑ig igʷdlan i‑uwlli n‑mddn‑inu lli‑sri‑isiggiln. tg talat n‑ɛah̬ur ma‑ġ‑a‑kllan imugayn‑nsn.

¹¹ imma kunni lli‑ifln rbbi da‑illan, tettum awrir‑inu amẓlay, ar‑n‑tssakmurm tiram i‑‹zzhr›, ar‑n‑tffim aman iktin i‑‹lqadar›,

¹² ha nkki qddrġ fllawn a‑tmmtm s‑uwzzal, tadrm i‑ih̬f‑nun a‑ttyawġraṣm. ašku ġriġ‑awn ur‑iyi‑tjawbm, sawlġ srun ur‑iyi‑tsfldm. han ar‑tskarm ma‑yʷh̬šnn bahra ġ‑iẓri‑nu, ar‑ttnawalm ġaylli ur‑ḥmilġ.»

¹³ ġayan a‑f‑a‑ywn‑ittini rbbi siditun: «han rad‑šbɛn ih̬ddamn‑inu, imma kunni ra‑tqamam s‑laẓ. rad‑ssan ih̬ddamn‑inu, imma kunni ra‑tqamam s‑irifi. rad‑tfraḥn ih̬ddamn‑inu, imma kunni ra‑tnḥaššamm.

¹⁴ ha‑ih̬ddamn‑inu ra‑ttirirn s‑lfrḥ n‑uwl‑nsn, imma kunni ra‑tssġuyyum s‑tiggas n‑uwl‑nun, ar‑tnddrm s‑tguḍi lli‑ibbin ġ‑rruḥ‑nun.

¹⁵ ur‑ra‑ig ism‑nun abla nnɛlt f‑ils n‑mddn‑inu. ra‑kʷn‑hlkġ nkki rbbi siditun, fkġ ism yaḍni i‑ih̬ddamn‑inu.

¹⁶ wanna itdɛun s‑lbaraka ġ‑tmazirt‑ad, ism n‑‹rbbi n‑lḥqq› a‑s‑ra‑itdɛu. wanna itgallan ġ‑tmazirt‑ad, ‹rbbi n‑lḥqq› a‑s‑ra‑itgalla. ašku laḥ kullu tiguḍiwin n‑ġayd izrin, ssittiġ‑tnt‑in f‑iẓri‑nu.

ignwan n‑ljdid d‑wakal n‑ljdid

¹⁷ «ẓrat, ha‑yyi skrġ ignwan n‑ljdid d‑wakal n‑ljdid. ur‑ra‑di‑tkttim ġaylli‑awn‑ijran ġayd izrin wala tswangmm‑t.

¹⁸ nkrat tfrḥm s‑mayd skrġ ġilad s‑lfrḥ idumn. ašku ha‑yyi skrġ urušalim ad‑kullu‑tg lfrḥ, gġ mddn‑ns d‑isaɛdiyn.

¹⁹ rad‑rḍuġ f‑urušalim, frḥġ s‑mddn‑inu. ur‑sul‑ra‑gis‑tsflidm i‑ma‑yallan s‑imṭṭawn ula ma‑issġuyyun f‑tguḍi.

²⁰ ur‑sul‑ra‑gis‑immt‑wazzan ikkan ġir kra idrusn, wala illa‑urgaz ur‑ikmmiln ussan‑ns. wanna izrin miyya n‑usggʷas, rad‑darun‑ig zund wad imẓẓin. mra is‑ur‑ilkim miyya, lukun tnnam ‹ittut fllas lɛiqab›.

²¹ rad‑bnnun tigʷmma ar‑gisnt‑zddġn, ar‑tẓẓun aṣġar n‑waḍil ar‑šttan lġllt‑ns.

²² ur‑sul‑rad‑bnnun tigʷmma, zdġn gisnt wiyya. ula da‑tẓẓun aṣġar, ar‑zġ‑gis‑šttan wiyya. ašku ġunšk lli‑gan‑uwssan n‑iṣġarn a‑rad‑gn‑uwssan n‑mddn‑inu. rad‑frḥn mddn‑inu imẓlayn s‑twuri n‑ifassn‑nsn s‑lfrḥ idumn.

²³ ur‑ra‑tnhatafn bla lfaytt, wala ra‑tarun tarwa a‑fllasn‑zraynt tawdiwin. ra‑fllasn‑tili lbaraka n‑rbbi da‑illan, ntni ula tasutin n‑tarwa‑nsn.

²⁴ hati ur‑ta‑yyi‑ġrin, a‑rad‑asn‑jawbġ, sul a‑sawaln, sfldġ‑asn.

²⁵ hati uššn d‑ulqqaġ rad‑ffrdn, d‑izm ra‑ištta alim zund amugay, ig‑ugdrur amššu n‑ulgʷmaḍ. ur‑ra‑yili ma‑issyagasn ula ma‑ithlakn ġ‑kullu awrir‑inu amẓlay. inna‑t rbbi da‑bdda‑illan.»