išaɛyah 64 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

a‑tbbit lh̬amiya n‑ignna tgguzt‑d

¹ amar yufan a‑tbbit lh̬amiya n‑ignna tgguzt‑d. rad‑mmassn idrarn ġ‑umnid‑nk.

² zund amdggʷig‑n‑yukʷin ġ‑ifskan, tzayd lɛafiyt ard a‑tbrburn‑waman. ġmkan a‑ra‑ig ism‑nk ġ‑dar inuwwašn‑nk, ard a‑trgigiyn ayt‑tmizar ġ‑umnid‑nk.

³ ġayd izrin lɛjayb ssiwidnin a‑tskrt, ur‑jji‑nẓri zund ntnti. tgguzt‑d aylliġ mmussan idrarn ġ‑umnid‑nk.

⁴ zġ‑zman ur‑jji‑isfld‑umẓẓuġ ula tmnad ṭiṭṭ kra n‑rbbi bla kiyi ar‑iskar lfaytt i‑willi‑n‑gis‑irjan.

⁵ s‑ṣṣaḥt ar‑ttmunut d‑wanna ifrḥn a‑iskar afulki, d‑wanna iswingimn ġ‑maylli‑gis‑ttirit. imma nkkʷni tġḍbt fllanġ. ha‑yaġ sul nunf i‑wawal‑nk. mnšk ayad nqama ġ‑ddnub‑nġ? mamnk a‑ra‑naf a‑nnjm?

⁶ nwrri kullwaġ ng zund kra indsn. kullu ifulkitn‑nġ gan zund timlsit imsln. ha‑yaġ nsllaw aylliġ nqqur zund ifrawn, awint‑aġ lh̬ʷšanat‑nġ zund ijawan.

⁷ ur‑illi yan yaqran i‑ism‑nk. ur‑illi ma‑inkrn a‑gik‑yamẓ. hati tssntalt‑n udm‑nk fllanġ, tflt‑aġ ġ‑tassast lɛyub‑nġ.

⁸ imma kiyi a‑sidi rbbi, sul tgit babatnġ. nkkʷni nga idqqi, tgt kiyi afh̬h̬ar, ng kullwaġ tawuri n‑ifassn‑nk.

⁹ ad‑ur‑tġḍbt bahra a‑sidi rbbi, wala ad‑bdda‑tswingimt ġaylli nskr yʷh̬šn. mnad‑d ginġ, tissant izd kullwaġ mddn‑nk a‑nga.

¹⁰ ha timdinin lli‑tẓlit i‑ih̬f‑nk wrrint gant lh̬la, thlk ṣiyun, th̬wu nnit urušalim.

¹¹ afulki n‑tgmmi tamẓlayt lli‑ġ‑a‑k‑ttalġn lajdud‑nġ, hati ijdr s‑lɛafiyt. ula kullu idġarn lli‑darnġ‑ɛzzanin, wrrin gan ih̬rubba.

¹² lliġ‑aġ‑kullu‑ijra ġayan, a‑sidi rbbi, is‑ur‑rad‑aġ‑tskrt yat? is‑ra‑tfssat, tadjt‑aġ ġ‑tdallit‑ad?