išaɛyah 63 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

iwrri ig‑asn anjjam

⁷ rad‑sawlġ f‑lḥnant izgan n‑sidi rbbi, ar‑ti‑ttalġġ f‑kullu mad‑aġ‑iskr. ašku iggut bahra mayd‑aġ‑ifka sidi rbbi. afulki iggutn ayd iskr ġ‑ayt‑israyil s‑rrḥmt‑ns ula tugtt n‑lḥnant‑ns izgan.

⁸ ašku inna: «s‑ṣṣaḥt gan ntni mddn‑inu, gn tarwa‑nu lli‑ur‑ra‑yyi‑iġḍr.» iwrri ig‑asn anjjam.

⁹ ġ‑kullu tarfufnt‑nsn, irfufn didsn ula nttan, iggʷz‑d ad‑didsn‑yili ijjnjm‑tn. s‑tayri d‑lḥnant‑ns a‑s‑tn‑d‑ifukka, yall‑tn yasi‑tn kullu ussan n‑zman.

¹⁰ imma ntni ɛṣan‑t, ssṭiyrn‑tt i‑rruḥ‑ns iṣfan. iwrri ntta ar‑tn‑itḍaḍḍa ar‑didsn‑itmmaġ.

¹¹ swangmn‑d ilmma mddn‑ns ussan n‑musa ula tasut‑ns lli‑izrin. ar‑ssmqsan: «maniġ illa rbbi lli‑d‑issiwnn tawrut d‑umksa‑ns zġ‑wammas n‑umda? maniġ illa walli igan rruḥ‑ns iṣfan ġ‑wammas‑nsn?

¹² maniġ illa walli‑n‑igan afus‑ns itjhhdn f‑ufus n‑musa, ibḍu aman n‑umda ġ‑umnid n‑mddn‑ns, aylliġ iwrri ism‑ns imqqur ġ‑dar kraygatt tasut n‑tasutin?»

¹³ hati izwur‑asn ġ‑gr‑waman dranin, zaydn ar‑fttun zund iysan ġ‑lh̬la, ur‑a‑tn‑ikkat ifikš.

¹⁴ yawi‑tn‑d rruḥ n‑sidi rbbi s‑maniġ a‑tsunfun, zund imugayn huwwdnin s‑uzaġar. ġmkan a‑s‑tzwurt i‑mddn‑nk ġ‑umuddu‑nsn, aylliġ iwrri ism‑nk imqqur bahra.

¹⁵ ssmuqql‑d ġilad zġ‑ignwan, tmnadt‑d zġ‑tattuyt tamẓlayt n‑lmajd‑nk. mah̬ aylliġ ur‑a‑di‑ttbayyan tayri‑nk itjhhdn ula lquwwa n‑tẓḍḍart‑nk? is‑ur‑k‑yaġ‑umarg‑nġ, iqama gik lḥal‑nġ?

¹⁶ kiyi a‑igan babatnġ. wah̬h̬a ur‑aġ‑issin ibrahim, ula yukʷz‑aġ yaɛqub, kiyi a‑sidi rbbi ad‑bdda‑igan babatnġ, tgt walli‑aġ‑d‑itfukkun zġ‑zman.

¹⁷ wa sidi rbbi, mah̬ a‑yaġ‑tudjt a‑njllu zġ‑uġaras‑nk? mah̬ a‑tssiqart ulawn‑nġ aylliġ‑ur‑tt‑gik‑niwi? wrri‑d tɛawnt ih̬ddamn‑nk d‑tqbilin n‑mddn‑nk.

¹⁸ tigmmi‑nk tamẓlayt tkka‑ttin tga tin imẓlayn‑nk, imma ġilad inuwwašn‑nġ ukʷln fllas.

¹⁹ nwrri nga zund willi ur‑jji‑igin mddn‑nk, zund iġ‑ur‑jji‑nusi ism‑nk.